Tomiño - galiciasuroeste

Title
Vaya al Contenido

Tomiño

COMARCA
Tomiño saca a licitación a explotación da cafetería do Espazo Fortaleza por un prazo de dous anos
Tomiño, 31 de maio de 2021.- O Concello de Tomiño vén de sacar por segunda vez a licitación a explotación da cafetería do Espazo Fortaleza de Goián. Trátase dun espazo equipado convenientemente cun canon base de licitación fixado en 1.210,00 euros (IVE incluído) para un prazo de aluguer de 2 anos.
A convocatoria completa pode consultarse no Perfil do Contratante da páxina web (https://www.contratosdegalicia.gal/consultaOrganismo.jsp?lang=gl&N=71&ID=800) e o prazo para a presentación de ofertas permanecerá aberto ata o día 11 de xuño.
Para resolver dúbidas ou obter máis información, pódese chamar ao Concello de Tomiño no 986 62 20 01/03 e contactar coa Axente de Emprego e Desenvolvemento Local.
 

Tomiño investirá case un millón de euros en obras de asfaltado de camiños, saneamento e acondicionamento de edificios municipais
Tomiño, 1 de xuño de 2021.- O goberno local de Tomiño levou onte a pleno un expediente de modificación de créditos de case un millón de euros (999.524,88€) financiados con fondos propios (Remanente Líquido de Tesourería para Gastos).
A través dunha proposta da Alcaldía, o goberno propuxo para a súa aprobación na sesión ordinaria de pleno que tivo lugar onte á tarde, unha serie de obras que se levarán a cabo con cargo ao citado remanente de tesourería. Entre as intervencións máis relevantes figuran as que se farán dentro do Plan de Mellora de Camiños Municipais 2021, por un importe de 350.000€; o Plan Municipal de Saneamento (100.000€) e a parte financiada polo Concello para a construción do camiño escolar do CEP Pedro Caselles e arredores (85.870,52€), establecida nun convenio coa Deputación de Pontevedra.
Así mesmo, son salientables outros investimentos que se levarán a cabo con cargo a estes fondos, coma a construción dunha marquesina da entrada e remate do peche do CEIP Pintor Antonio Fernández (69.000€); acondicionamento do mercado municipal de Goián como centro de creatividade e emprendemento; muros en diversas estradas de Tebra (45.000€); acondicionamento da contorna do Centro Social de Estás (40.000€); acondicionamento dos vestiarios do Campo de Fútbol do Alivio (25.000€); acondicionamento de bens culturais e etnográficos (25.000€); Plan Municipal de Melloras nos Colexios (20.000€); acondicionamento de espazos públicos (20.000€) e sinalización horizontal e seguranza viaria (20.000€), entre outros.
O concelleiro de Urbanismo, Uxío Benítez foi explicando as diferentes actuacións que se realizarán con cargo a este expediente de modificación de créditos, coma o asfaltado de camiños e obras de saneamento en diversas parroquias; ou a rehabilitación de muros de elevado coste que se atopan en moi  mal estado.
Respecto do acondicionamento do edificio do mercado de Goián, explicou que na actualidade está a reformarse a estrutura do mesmo cunha subvención do IDAE (Instituto de Diversificación y Ahorro Energético). “A cantidade consignada nesta modificación servirá para acondicionar  un espazo nas instalacións para a realización de proxectos por parte de empresas e autónomos que se instalarán de forma temporal, algo semellante á aula de estudo creada na Casa da Cultura, ou a un centro de interpretación”, precisou.
A proposta da Alcaldía foi aprobada cos votos do BNG e PSdG-PSOE, absténdose o PP.
 
Un documental das “traídas de augas” abre a Semana do Medio Ambiente de Tomiño
Tomiño, 1 de xuño de 2021.- A estrea do documental “Da nosa man. As traídas de auga de Tomiño”, marca mañá o comezo dos actos organizados polo Concello, baixo o lema Tomiño Natural, para conmemorar o Día Internacional do Medio Ambiente.
Ás 20.30h a cinta será subida ao Facebook do Concello, e no Auditorio de Goián terá lugar a presentación do traballo ás directivas das traídas, con acceso restrinxido. O acto contará coa presencia da alcaldesa de Tomiño, Sandra González, e do presidente de COXAPO (Asociación de Traídas de Augas de Pontevedra), Juan Joaquín Pousa.
O vídeo, no que participaron unhas 25 persoas relacionadas coas comunidades de augas veciñais, amosa a historia das chamadas traídas de auga de Tomiño, da man dalgunhas das persoas que as fixeron posibles a partir dos ’70, desenvolvendo un traballo heroico; exemplo da boa xestión comunitaria dun ben común sen axuda, daquela, das administracións.
O traballo pretende ser unha homenaxe do Concello á xestión veciñal en man común da auga das 36 comunidades de augas existentes na actualidade en Tomiño, e das que se sirve máis dun terzo dos seus habitantes.
As Concellerías de Medio Ambiente e de Servizos Públicos, uníronse para a organización desta primeira Semana do Medio Ambiente, vertebrada polo impulso da compostaxe como forma de reducir os residuos e pola mellora integral das augas.
Por outra banda, a partir de hoxe e até o día 6, pode visitarse no primeiro andar do Mercado Municipal a exposición das obras presentadas ao concurso “Como ves ti as árbores senlleiras de Tomiño?”. A mostra reúne unha escolma de relatos e outras obras artísticas (pinturas, colaxes, etc.) nas diferentes categorías convocadas (benxamín, xuvenil e persoas adultas).
Resto de actividades programadas:
O xoves 3 de xuño haberá dúas actividades principais. Ás 17.00 horas, plantación de árbores autóctonas a cargo do Consello da Infancia e Adolescencia “Voces Novas”, e ás 20.30h no Facebook do Concello, “Conversa sobre alternativas para o tratamento e depuración das augas”, coa alcaldesa; o enxeñeiro experto en enerxías renovables e tratamento de augas residuais, José Luis Peraza, e a xefa de servizo de Aqualia en Tomiño, Marián Lago.
O programa continúa o venres 4 de xuño con outra conversa a través das redes do Concello (Facebook); neste día falarán sobre a compostaxe Ana Belén Casaleiro, concelleira de Medio Ambiente; Carlos Pérez, químico asesor de residuos da Deputación de Pontevedra, e Sandra Alonso, mestra composteira.
O sábado 5 de xuño será o día grande da Semana, coincidindo co Día Internacional do Medio Ambiente. Na Praza do Seixo haberá xogos e talleres infantís (de 10.00 a 14.00 e de 17.00 a 20.00h) a cargo da Granxa Escola Corazón de Carballo, cunha temática vinculada ao Medio Ambiente e a riqueza natural de Tomiño. Sorpresas e agasallos relacionados co medio ambiente e a sustentabilidade para as persoas que se acheguen.
Ademais, ás 12.00h efectuarase a entrega de premios do concurso “Como ves ti as árbores senlleiras de Tomiño?”.
Por último, dende o mércores 2 de xuño até o sábado 5, haberá na Praza do Seixo un posto de información sobre compostaxe e reciclaxe, a cargo da Asociación Ecoloxista Amigos da Terra, con horario de tarde, de 18.00 a 20.00 horas, excepto o mércores que tamén estará de mañá. En Goián o posto informativo estará o día 3, entre as 11.00 e as 13.00 horas, coincidindo co mercadiño ambulante.
 
32m2, a traxicomedia sobre o confinamento, despídese do público coa derradeira función en  Tomiño
Tomiño, 1 de xuño de 2021.- A xira de 32m2 chega ao seu fin.
O espectáculo é a última creación teatral de ButacaZero, que conta cunha banda sonora orixinal creada polo músico Rodrigo Cuevas, e nace coa vontade de ofrecer unha ollada reflexiva e “sandadora” sobre o confinamento. A través da mestura de elementos cómicos e tráxicos, 32m2 pon o foco sobre a convivencia habitual que a sociedade mantén coa precariedade e as desigualdades, mais sen reparar nelas. Así, ButacaZero presenta a Mar e a Xan (Nuria Gullón e Xurxo Cortázar) unha parella que se considera “antisistema” e que habita nun pequeno ático de 32 metros cadrados “con total tranquilidade” cando, de súpeto, confinan a toda a poboación. E o país transfórmase, á vez, nunha HiberNación.
O domingo 20, terá lugar a derradeira representación da peza en Tomiño. O espazo elixido para este peche é o Auditorio de Goián. Reserva a túa praza (prezo: 5 euros) en cultura@tomino.gal ou chamando ao 986622001.
  

O documental “Xela Arias. Poeta nas marxes”, chega este sábado a Tomiño
Tomiño, 2 de xuño de 2021.- O Concello de Tomiño proxectará o vindeiro sábado o documentalXela Arias. Poeta nas marxes”, dirixido por Beatriz Pereira, moza graduada en Comunicación Audiovisual e veciña da parroquia tomiñesa de Tebra.
A proxección encádrase dentro do proxecto  que leva a Secretaría Xeral de Política Lingüística (SXPL) a concellos da Rede de Dinamización Lingüística (RDL) da Xunta de Galicia (á que pertence Tomiño) no marco da programación institucional Letras Galegas 2021 para dar a coñecer a figura, a vida e a obra da autora homenaxeada pola RAG este ano.
O traballo documental vaise proxectar no Auditorio de Goián o vindeiro sábado 5 de xuño, ás 20 horas, para persoas a partir de 12 anos, e haberá un coloquio posterior. As entradas, de balde, poden reservarse chamando ao Concello nos teléfonos 986 622001/03, ou enviando un correo electrónico a cultura@tomino.gal.
“Con esta iniciativa queremos facer partícipe da programación institucional das Letras a concellos e entidades da RDL e á súa cidadanía para que a festa da lingua galega se estenda máis alá do propio 17 de maio, do mes das Letras, e teña presenza ao longo de todo o ano", explican os organizadores”.
A partir dos testemuños de figuras da cultura galega coma Xosé María Álvarez Cáccamo, María Xesús Nogueira, Manuel Bragado, Susana Trigo, Marga do Val e Humberto Heredia, o documental percorre a vida e obra da homenaxeada, “deténdose en todas as arestas que fixeron de Xela Arias unha muller situada nas marxes da literatura, analizando o seu labor como poeta, tradutora e correctora, así como o seu impacto na vida cultural galega”.
 

Tomiño homenaxea o labor das traídas de auga veciñais co documental “Da nosa man”
Tomiño, 3 de xuño de 2021.- Onte foi presentado no auditorio de Goián o documental “Da nosa man”, unha peza audiovisual que rende homenaxe ao labor desenvolvido polas 36 comunidades de augas veciñais existentes no municipio nunha tarefa tan importante como o é a autoxestión dun ben imprescindible para a sociedade.
O acto, ao que asistiron moitos dos membros destas comunidades, contou tamén coas intervencións iniciais da alcaldesa Sandra González e do vicepresidente de COXAPO (Asociación de Traídas de Augas de Pontevedra), Humberto M. González, que resaltaron o “heroísmo” daqueles veciños que alá pola década dos anos 70, sen medios económicos nin axuda da administración, decidiron loitar por cumprir o soño de ter auga encanada nas súas casas. “A capacidade de asociarse, o esforzo e o sacrificio da veciñanza para xestionar un ben común é verdadeiramente exemplar, e desde o Concello o mínimo que podemos facer é que poñer en valor é apoiar ese modelo de autoxestión para que sirva como exemplo noutros lugares”, destacou a alcaldesa.
Pola súa parte, o vicepresidente de COXAPO puxo en valor o traballo desenvolvido pola asociación, creada fai 15 anos co fin de defender os intereses das traídas de auga. “Podemos dicir con orgullo que en dez anos realizamos un aforro de máis de tres millóns de euros ás administracións, un traballo que tamén fai que as nosas traídas sexan referentes en Galicia e España, pero tamén en países como Irlanda, Austria ou Suecia. Por iso tamén queremos agradecer que o Concello de Tomiño fose o primeiro en apostar pola autoxestión da auga, ese ben tan apreciado”, destacou.
Unha vez rematada a proxección da emotiva peza, que emocionou a máis de un dos presentes, a alcaldesa aproveitou para agradecer o excepcional traballo da súa directora, Marta Piñeiro, quen mostrou a súa satisfacción polo proxecto. “Eu non coñecía a realidade das traídas e cando vin a importancia que tiñan foi toda unha sorpresa. Ao comezo a idea era facer un pequeno vídeo de cinco minutos pero había tantas cousas interesantes que contar que ao final rematou sendo unha historia máis longa coa que homenaxear non só aos pioneiros, senón tamén ás persoas que traballan na actualidade nas traídas e as continúan mantendo vivas”, comenta a directora.
Semana do Medio Ambiente
Ademais da proxección do documental, o Concello de Tomiño continúa organizando diversas actividades do 2 ao 5 de xuño con motivo da celebración da Semana do Medio Ambiente. O xoves 3 de xuño haberá dúas actividades principais. Ás 17.00 horas está prevista a plantación de árbores autóctonas a cargo do Consello da Infancia e Adolescencia “Voces Novas”, e ás 20.30h emitirase no Facebook do Concello unha conversa sobre alternativas para o tratamento e depuración das augas, que contará coa presenza da alcaldesa, Sandra González; o enxeñeiro experto en enerxías renovables e tratamento de augas residuais, José Luis Peraza, e a xefa de servizo de Aqualia en Tomiño, Marián Lago.
O programa continúa o venres 4 de xuño con outra conversa a través das redes do Concello (Facebook); neste día falarán sobre a compostaxe Ana Belén Casaleiro, concelleira de Medio Ambiente; Carlos Pérez, químico asesor de residuos da Deputación de Pontevedra, e Sandra Alonso, mestra composteira.
O sábado 5 de xuño será o día grande da Semana, coincidindo co Día Internacional do Medio Ambiente. Na Praza do Seixo haberá xogos e talleres infantís (de 10.00 a 14.00 e de 17.00 a 20.00h) a cargo da Granxa Escola Corazón de Carballo, cunha temática vinculada ao Medio Ambiente e a riqueza natural de Tomiño. Haberá sorpresas e agasallos relacionados co medio ambiente e a sustentabilidade para as persoas que se acheguen.
 

Tomiño únese ao “apagón” para concienciar sobre o cambio climático
Tomiño, 4 de xuño de 2021.- O Concello de Tomiño, no marco da conmemoración da Semana do Medio Ambiente, súmase á convocatoria lanzada polo Fondo Galego de Cooperación e Solidariedade para este sábado 5 de xuño. A partir das 23:00 horas, o edifcio do consistorio municipal apagarase co fin de concienciar sobre o consumo enerxético.
A acción encádrase no proxecto europeo People and Planet, que implica á mocidade e aos gobernos locais na loita contra o cambio climático, e xunto con Tomiño participarán da convocatoria outros 22 concellos galegos. Aínda que o consumo eléctrico en Galicia caeu un 5,8% no ano 2020, tratouse dun descenso coxuntural debido á paralización da actividade por mor da Covid-19, de aí que cumpra seguir fomentando o aforro de enerxía para evitar o impacto ambiental que supón producila. Tanto as institucións como a cidadanía poden tomar medidas neste senso, como empregar o transporte público ou a bicicleta, elixir aparellos de baixo consumo, programar unha temperatura racional no fogar, encher ben a lavadora e o lavalouza ou apagar as luces e dispositivos como o ordenador cando non os utilicemos.
En xeral, consumir menos e facelo dun xeito responsable contribúe a combater a emerxencia climática e, polo tanto, a protexer os ecosistemas, que é o tema no que este ano se centra o Día Mundial do Medio Ambiente, baixo o lema ‘Reimaxina, rexenera, restaura’. Ademais, o “apagón” proposto polo Fondo Galego é unha das máis de 50 actividades que se impulsarán nos concellos socios dentro do proxecto ‘People and Planet’ e que van desde accións de rúa como o flashmob e a performance ata obradoiros de cociña sustentable, debuxo urbano, exposicións virtuais, retos virais, etc. Búscase así contribuír a acadar os Obxectivos de Desenvolvemento Sostible fixados por Nacións Unidas e, en especial, ao ODS 13: adoptar medidas urxentes para loitar contra o cambio climático e os seus efectos.
O Fondo Galego
O Fondo Galego de Cooperación e Solidariedade está integrado por 100 concellos e as deputacións de Pontevedra, A Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Recoñecido como axencia municipal da cooperación galega, desde a súa fundación en 1997 o Fondo Galego ten desenvolvido uns 170 proxectos en 32 países e promove numerosas actividades e materiais en relación aos desequilibrios Norte-Sur e a Axenda 2030.
 

Obradoiro de relacións afectivo-sexuais para a mocidade de Tomiño
Tomiño, 7 de xuño de 2021.- Tomiño organiza a través da Oficina Municipal de Información Xuvenil (OMIX), o obradoiro "Así si: relacións afectivo-sexuais sans", dirixido á mocidade adulta e á adolescencia.
A actividade será impartida por profesionais da empresa "IGUALADAS" no mes de xullo, pero é preciso inscribirse previamente, a través da páxina web do Concello (https://tomino.gal/asi-si-obradoiro-sobre-relacions-afectivo-sexuais-sans).
Entre os obxectivos principais da actividade figuran os de replantexarse (e rachar con eles) os estereotipos e roles de xénero; valorar as novas masculinidades e as diferentes formas do feminino; rexeitar a cosificación e hipersexualización dos corpos femininos, desmitificar crenzas erróneas sobre sexualidade; identificar relacións baseadas en desigualdades e comportamentos abusivos e sumisos. Tamén concienciar sobre as prácticas sexuais de risco e das ETS (enfermidades de transmisión sexual); fomentar as relacións afectivas baseadas na igualdade e nos respecto mutuo e fomentar a tolerancia á diversidade.
"Cremos que a nosa obriga, coma institución pública é contribuir a mellorar a vida das persoas; as diferenzas fannos únicas e a diversidade é un valor que suma. A este obradoiro serán benvidas todas as mozas e mozos con ganas de formarse e informarse para desfrutar das súas relacións afectivo sexuais dun xeito san", explican dende a OMIX Tomiño.
O obradoiro terá lugar no salón de plenos do Concello de Tomiño, os días 6, 7 e 8 de xullo, en horario de mañá (de 10.30h a 13.30h).
 

Aberto o prazo para inscribirse no campamento musical "IMAXINA"
Tomiño, 8 de xuño de 2021.- En colaboración coa Agrupación Musical de Goián, o Concello de Tomiño organiza "IMAXINA. Campamento Musical 2021", destinado a nenas e nenos de 3 a 12 anos.
A actividade, que consistirá nunha aprendizaxe musical lúdica e en convivencia, celebrarase en Goián na segunda quincena do mes de agosto. As prazas son limitadas, polo que é imprescindible realizar pre-inscrición a través da páxina web municipal (https://tomino.gal/campamento-musical-2021).
O horario do campamento será matutino (de 10.00 a 14.00 horas) coa posibilidade de solicitar o Plan Madruga (de 9.00 a 10.00 horas)
O prezo será de 30 euros una semana(persoas socias da banda 15€), e de 45€ dúas semanas(persoas socias da banda 25€). Se se escolle o Plan Madruga, serán 5 euros máis por semana.
Por outra banda, por mor da Covid-19, este ano non se ofertará o campamento urbano que se acostuma organizar cada verán nas instalacións do CEP Pedro Caselles Beltrán. O motivo é que, polas súas características (actividade sen límite de prazas, con máis de 100 nenos e nenas), en caso de choiva, disponse só dun ximnasio con espazo reducido, polo que non se poderían cumprir as medidas de distanciamento físico establecidas pola lei.
 

Tomiño busca solucións naturais para reducir a calor do verán nas aulas das escolas infantís
Tomiño, 9 de xuño de 2021.- Tomiño busca solucións naturais para problemas derivados das condicións meteorolóxicas e os seus efectos nos edificios da vila. É o caso das dúas escolas infantís Galiña Azul coas que conta o municipio; unha no Seixo (Tomiño centro) e outra en Goián (segunda parroquia máis habitada do concello), e que suman un centenar de prazas de 0 a 3 anos.
Nesta última, coa axuda dunha paisaxista, o Concello propuxo ao Consorcio Galego de Servizos de Igualdade e Benestar facer unha plantación dunha vintena de árbores, tales coma cedros, fotinias e arces; especies que cando crezan reducirán notablemente o paso da calor ao edificio durante os meses de verán. A colocación das árbores e duns toldos o Concello investiu 12.942,33 euros. “En Goián había un problema de excesivo calor nas aulas e procurouse unha solución ecolóxica que é unha plantación de árbores”, amais de colocar uns toldos nas ventás”, explica a concelleira de Benestar Social, Igualdade e Educación, Cristina Martínez.
Por outra banda, na escola infantil do Seixo instalouse unha pérgola de madeira feita a medida e con teito de metacrilato para crear unha zona de abrigo onde nais e pais poidan agardar aos/ás escolares en épocas de chuvia. Neste caso o investimento, que ascendeu a 5.971,51 euros, viu  dar solución a un requirimento das familias que a partir da pandemia do Covid-19, víronse obrigadas a manter unha distancia maior da entrada do edificio.
Na elección do arbolado, segundo apunta a paisaxista Sinda Davila, de Verdeon Jardinería, para a escola de Goián tivéronse en conta varias vertententes: a ornamentación do conxunto, o acompañamento ao edificio e dar resposta ás necesidades de sombra demandadas dende a dirección do centro. As árboes elexidas pola súas caracteríticas foron: Cedrus atlantica, Glauca péndula, Acer platanoides “Globosum”, Photinia x fraseri “Red Robin”e Albizia julibrissin.
"Os cedros acompañan a entrada do edificio antigo nomeado como a casa do médico, pola sua porte, o seu peso e caracter, son árbores maxestuosos, de folla perenne e color azulado, piñas cara arriba, acompañan ademáis en cor ao logotipo da Galiña Azul", comenta.
No interior plantados no xardín hai unha combinación de arce e albizia, plantados na zona de máis sol para proporcionar sombra de dúas formas; unha tamizada polas follas da albizia e outra máis densa dos arces.
As photinias marcarán cor vermello na primavera, violáceo no verán e verde no outono. "Estas especies foron elexidas polo seu crecemento controlado, xa que admiten ben as podas e pola interese paisaxística. Ademais, foron plantadas cunha barreira de proteción anti-raíces para evitar destrozos nos saneamento", explica a profesional.
 

Tomiño habilita un formulario para inscribirse na verbena piloto do próximo 19 de xuño
Tomiño, 10 de xuño de 2021.- O Concello de Tomiño vén de habilitar un formulario na súa páxina web para que poidan inscribirse as persoas interesadas en participar na verbena piloto prevista para o sábado 19 de xuño. Co fin de facilitar o proceso, desde a institución recalcan que este será o único método válido para rexistrarse, non sendo posible facelo por teléfono ou a través de correo electrónico. É completamente gratuíto dado que se trata dunha reserva, non dunha compra.
En total serán mil as persoas que poderán asistir ao evento, que se desenvolverá de 21:00 a 23:00 horas no campo de festas do Alivio da man da orquestra Ocaband. O recinto estará completamente perimetrado con vallas, podendo acceder ao mesmo soamente aquelas persoas debidamente rexistradas mediante o formulario. Desde o consistorio piden que aquelas que non o fixeran se absteñan de acudir ao lugar do evento para evitar posibles aglomeracións, xa que non poderán acceder.
No interior do recinto as persoas poderán estar de pé, aínda que estarán separadas en grupos de conviventes. Estará permitido bailar, mais só entre os integrantes dos grupos burbulla e respectando debidamente o espazo de separación de 1,5 metros cos restantes grupos. Nesta área estará prohibido comer, beber e fumar, non obstante no exterior do espazo vai estar habilitado un bar no que as persoas poderán consumir sentadas e cumprindo coas medidas de seguridade e prevención do Covid-19. Para garantir o seu debido cumprimento haberá vixilancia e presenza policial constante.
O formulario pode cubrirse na seguinte ligazón: https://tomino.gal/verbena-piloto-2021/
 

A lírica e a radio fusiónanse no IES Antón Alonso Ríos
Tomiño, 11 de xuño de 2021.- A radio pode ser unha ferramenta excelente para a divulgación da poesía entre o estudantado e iso é algo que teñen moi claro no IES Antón Alonso Ríos de Tomiño. Desde o ano 2018, as instalacións da radio municipal Radio Mocidade foron trasladadas ao centro educativo co fin de aproveitar o seu uso para actividades académicas e educativas. Programas de debate, difusión de actividades e eventos do centro, curiosidades científicas… Moitos son os programas desenvolvidos a través deste medio nos últimos tempos, aos cales recentemente se lles sumou unha nova sección: Poesía Urxente.
Trátase dun programa semanal que ten como obxectivo a participación do estudantado na divulgación da poesía a través da radio. “Comezamos fai un par de meses e a verdade é que están tendo moi boa acollida. Facemos unha por semana e estanse animando a participar bastantes rapaces e rapazas”, comenta o profesor Luis Lechuga, que se encarga do control técnico da radio.
A dinámica é ben simple: cada semana un alumno ou alumna ten que preparar un poema para recitar e, a ser posible, indagar tamén sobre a vida do autor. Adoitan escollerse poemas de poetas con compromiso social, accesibles e de doada comprensión para todo o mundo: Nicanor Parra, María do Cebreiro, Roque Dalton ou Xela Arias son algúns dos persoeiros que xa contan cun programa dedicado na sección. Combinado cunha pequena introdución feita por algún dos profesores e cun fío musical de fondo, o resultado é o dunha peza amena, dinámica e sinxela que atrae tanto aos oíntes coma ao propio alumnado, que mostra un gran interese por participar no proxecto. Tal e o caso de Laura González e María Fernández, alumnas de 4º da ESO, que malia non ter pensado estudar nada vinculado coa radio se interesaron por participar “para coller experiencia e aprender cousas novas”.
Simón Santos, profesor de Xeografía e Historia e impulsor da sección, comenta que normalmente anímase a participar o alumnado que non só lle gusta ler na radio, senón que tamén está interesado na lingua e na cultura e que desfruta co proceso. “A idea con isto é que máis alá de facer promoción da radio e buscar que a xente nos escoite sirva tamén por un lado para achegar un xénero como a poesía ao alumnado e por outro achegalos tamén a eles á radio como medio. Ademais, moitos profesores están empregando os programas nas súas clases como recurso educativo”, explica.
Nun mundo no que cada vez pesa máis a brevidade e o inmediato, o dinamismo e a duración da sección que non adoita superar os 5 minutos parecen ser unha das claves do seu éxito. Isto facilita a participación de máis estudantes, xa que a gravación das pezas se realiza de forma áxil, en non máis de dez minutos, algo que adoitan facer en cambios de clase ou en horas libres, o que evita restar moito tempo ás demais actividades académicas. Tamén fai que sexa máis doado conseguir unha constancia na creación de contido para a sección, un aspecto moito máis difícil de conseguir noutros programas cun formato máis complexo e desenvolvido.
Polo de agora esperan continuar coa sección durante unhas 9 semanas máis, ata o final de curso, aínda que non se descarta darlle continuidade en vindeiros anos se a disposición do profesorado e o alumnado o permiten.
Os programas de Poesía Urxente poden ser escoitados na páxina web de Radio Mocidade a través da ligazón: http://radiomocidade.gal/poesia-urxente/
 

O Concello forma a dez persoas desempregadas no manexo de plataformas dixitais
Tomiño, 14 de xuño de 2021.- “Recursos dixitais para a busca de emprego” é o curso de 15 horas organizado polos departamentos de Benestar Social e Orientación Laboral do Concello de Tomiño, co obxectivo de formar a dez persoas desempregadas usuarias dos servizos, os manexo das principais plataformas útiles para a busca de traballo (Linkedin, Infojobs, Randstad, Adecco, etc.), ou aquelas propias de empresas con procesos de selección abertos.
O obxectivo do Concello é o de dotar ás persoas usuarias dos servizos sociais de ferramentas dixitais que lles permitan acceder ao mercado laboral. “Hoxe en día, a maioría das ofertas e demandas de emprego realízanse a través de internet; e se non manexamos as plataformas online non podemos acceder en igualdade de condicións que outros colectivos”, explica a concelleira de Benestar Social, Igualdade e Educación, Cristina Martínez.
As dez persoas seleccionadas polos servizos de Benestar e Orientación son na súa grande maioría mulleres de mediana idade que levan en paro moito tempo. Durante a semana pasada, tiveron que acudir ás instalacións da Aula CeMit de Tomiño para recibir as clases impartidas por unha academia especializada. Unha media de 3 horas por día, nas que aprenderon como moverse polas distintas redes e plataformas ou presentar a súas candidaturas. Elaborar un currículo online e manexar nubes para a xestión de datos persoais, foron outros dos aspectos abordados.
Este mediodía celebrouse no Salón de Plenos do Concello a clausura e entrega de diplomas. Presidiu o acto a alcaldesa Sandra González, acompañada da concelleira de Benestar Social e da orientadora laboral do Concello.
Entre as alumnas que recibiron o seu diploma, atopábase Laura González, veciña de Goián, ama de casa en paro, con dous fillos de 13 e 7 anos, que fixo o ciclo superior de FP administrativo, pero debido ás obrigas familiares e problemas de saúde non puido traballar nos últimos anos. Este curso foi para ela decisivo na súa reciclaxe no mercado laboral e tras os primeiros intentos de atopar emprego a través de internet, xa ten a súa primeira entrevista en Baiona.
Un caso similar é o de María Pérez (veciña de Tomiño centro), moi contenta co curso, sobre todo, por poder agora moverse polas páxinas de supermercados e outras empresas con ofertas de traballo. Licenciada en filoloxía francesa, traballou en atención ao público e recepcionista, pero quedou no paro en decembro do 2020.
 

32m2, a traxicomedia de ButacaZero sobre o confinamento, despídese dos escenarios o domingo 20 en Tomiño
Tomiño, 15 de xuño de 2021.- A xira de 32m2 chega ao seu fin. A última creación teatral de ButacaZero, a compañía creativa dirixida por Esther F. Carrodeguas e Xavier Castiñeira, celebrará o vindeiro domingo 20, a partir das 18.00 horas, a súa derradeira función, no Auditorio de Goián.
A compañía, dirixida por Xavier Castiñeira e Esther F. Carrodeguas, propón unha obra de teatro absurdo que parte da propia experiencia do tándem artístico durante o encerro da primavera do pasado ano.
A peza, candidata pola súa escenografía aos Premios Max, representarase por derradeira ocasión en Tomiño. A función, que coincide coa celebración do fin do primeiro Estado de Alarma decretado en marzo de 2020, supón o peche da Xira confinada, a serie de actuacións coas que 32m2 percorreu 21 localidades galegas durante esta primavera.
O espectáculo, que conta cunha escenografía xiratoria asinada por Beatriz de Vega -pola que 32m2 é candidata aos Premios Max de Teatro 2020/2021-, e cunha banda sonora orixinal creada polo músico Rodrigo Cuevas, naceu coa vontade de ofrecer unha ollada reflexiva e “sandadora” sobre o confinamento.
32m2 presenta a Mar e a Xan (interpretados por Nuria Gullón e Xurxo Cortázar), unha parella que se considera antisistema e que habita nun pequeno ático de 32 metros cadrados con total tranquilidade, nun mundo que non deixa de xirar cando, de súpeto, a presenza dun virus fai que a vida pare e confinen a toda a poboación.
As entradas son limitadas por razón de aforo e de seguridade e pódense reservar a través de cultura@tomino.gal ou no teléfono 986 622 001.
A compañía
ButacaZero é a plataforma creativa posta en marcha por Esther F. Carrodeguas e Xavier Castiñeira.   A investigación e a reflexión dende un ollar crítico e irónico son as claves que definen as súas propostas que se concretan en dramaturxias feitas á medida, nas que a tradición teatral se mestura coas posibilidades que ofrece o audiovisual en escena.
Con 32m2, o tándem aséntase como referente do teatro contemporáneo no panorama escénico galego pola súa capacidade á hora de dialogar co mundo actual. A estrea da peza acompañouse, á vez, da publicación en papel do libro homónimo, que tamén asina a dramaturga Esther Carrodeguas. O texto, publicado por Edicións Positivas, pódese adquirir tanto a través da páxina web https://edicionspositivas.com/producto/32m2/ coma nas diferentes librarías coas que traballa habitualmente a editorial.
 

O SAT do Baixo Miño súmase á conmemoración do Día da Atención Temperá
Tomiño, 16 de xuño de 2021.- O SAT Baixo Miño súmase á conmemoración, hoxe, do “Día da Atención Temperá”. A unidade comezou a funcionar nos últimos meses do ano pasado. Creado pola Mancomunidade Intermunicipal do Baixo Miño (constituída polos concellos de A Guarda, O Rosal, Tomiño e Tui), o obxectivo da unidade é que as familias que teñan menores con dificultades de aprendizaxe, poidan ser tratadas na propia comarca, sen ter que trasladarse até Vigo.
O equipo de profesionais que forman o SAT Baixo Miño ten a súa sede no edificio de Benestar Social do Concello de Tomiño. Coordinado pola psicóloga Andrea Álvarez, o servizo está especialmente destinado a familias con fillos ou fillas de entre 0 e 6 anos que precisen o establecemento de pautas e estratexias que promovan a súa normalización, a través de intervencións planificadas por un equipo interdisciplinar.
"A acollida foi marabillosa e existe unha demanda moi importante", comenta a coordinadora da unidade. Nos meses que leva funcionando o servizo tivo unha demanda acumulada de 88 casos (37 de Tomiño; 26 de Tui; 18 da Guarda e 7 do Rosal) e 33 familias en lista de espera, o que da unha idea da necesidade existente deste tipo de apoio. En canto á distribución da demanda, un 79% da mesma foi atendida polo servizo de logopedia; un 66% polo de psicoloxía e un 42% polo de fisioterapia.
Potenciar a autonomía e o desenvolvemento psicomotriz, tratar dificultades da linguaxe ou problemas de comunicación (por trastornos como o TEA, falta de audición, etc.), a través dunha terapia lúdica, activa e motivadora, son só algúns dos obxectivos que ten o equipo do que tamén forman parte Sonia García (logopeda) e Paula Hernando (fisioterapeuta).
Para máis información ou solicitude de cita previa, as persoas interesadas poden chamar ao teléfono 886 156172 ou enviar un correo electrónico a atenciontempranamibm@cogami.gal
  

Mulleres de Tomiño intercambiarán cartas con reclusas de Cáceres nun proxecto piloto de comunicación e reinserción social
Tomiño, 17 de xuño de 2021.- A Secretaría Xeral de Institucións Penitenciarias (Dirección Xeral de Execución Penal e Reinserción Social) vén de dar o visto bo para asinar un convenio co Concello de Tomiño para levar adiante o proxecto piloto "PALABRAS LIBRES PARA MULLERES PRESAS".
A actividade, organizada pola Oficina Municipal de Información Xuvenil de Tomiño consistirá  nun intercambio de cartas entre mozas (a partir de 18 anos) e mulleres interesadas de Tomiño con reclusas do Centro Penitenciario de Cáceres.
"Como institucións públicas temos que traballar para tentar mellorar a vida privada das persoas e así nace o proxecto "Palabras libres para mulleres presas", co que queremos promover o intercambio de cartas entre reclusas e o mundo exterior", explica a concelleira de Mocidade, Fátima Rodríguez.
Así, tras a firma do correspondente convenio, poderá comezar o intercambio epistolar. Deste xeito, as participantes poderán ver máis aló dos muros da prisión a través dos ollos doutras mulleres. "Utilizando  palabras as persoas poden mostrar os seus sentimentos, demostrar as súas ganas de aprender, mellorar as súas habilidades sociais, adestrar a súa empatía, estrear unha nova amizade epistolar", comenta a concelleira, aclarando que será posible compartir fotografías, pinturas, poemas, libros, música, etc.
O proxecto pretende promover un exercicio de resiliencia para reducir os efectos negativos a nivel psicosocial de estar privada de liberdade. "Nesta época de pandemia mundial na que estivemos confinadas é máis fácil empatizar coa situación das persoas privadas de liberdade, cumprindo así outro dos obxectivos da iniciativa; sensibilizar á sociedade sobre este colectivo", apunta Rodríguez.
Este intercambio de cartas é unha estratexia que busca moito máis que a lectura e a escritura a partir dunha verdadeira necesidade comunicativa. Traballar en conxunto os xuízos e prexuízos desde un punto de vista crítico a través da creatividade, a comunicación e a literatura. promover unha mellor reinserción social.
 

Éxito da verbena piloto de Tomiño
Tomiño, 19 de xuño de 2020. Na foto de C. Villaverde, podemos ver o ambiente da verbena piloto de Tomiño, que se desenvolve nestes momentos con total normalidade, a pesar dunha feble chuvia que vén e vai. Vinte voluntarios e voluntarias de Protección Civil de Tomiño; a Policía Local ao completo e un par de patrullas da Guardia Civil e Policía Autonómica, tiveron ao seu cargo garantir as medidas de seguridade para a celebración do evento, no recinto de festas do Alivio. As ganas de pasalo ben foron superiores ás pequenas molestias dunha climatoloxía algo adversa e os e as asistentes, moitos con paraugas, mantiveron a distancia de seguridade e demais normas establecidas para os grupos burbulla.
Os accesos ao recinto estiveron operativos desde as 20.00 horas con persoal de seguridade controlando o paso. Houbo en total catro puntos de acceso: dous para saír e dous para entrar. Dous deles aptos para persoas con mobilidade reducida.
No interior do recinto, ademais do persoal de seguridade axudando nesta cuestión, hai carteis informativos sobre como teñen que distribuírse os grupos burbulla,  limitados a 4 persoas conviventes.
O acceso ás áreas de estacionamento estivo aberto ata que as prazas estiveron completas. No caso do estacionamento situado fronte a entrada do campo de fútbol do Alivio, foi de uso prioritario para persoas de mobilidade reducida.
 

Tomiño súmase á conmemoración do Día Mundial da ELA colgando unha lona no balcón do Concello
Tomiño, 21 de xuño de 2021.- Hoxe, 21 de xuño, celébrase o Día Mundial da ELA. O Concello de Tomiño sumarase, coma cada ano, a esta conmemoración, colgando unha lona no balcón da Casa do Concello e iluminando o edificio de verde, cor característica de esta doenza, da que cada día, se diagnostican tres novos casos e falece outro tanto en silencio.
Deste xeito, Tomiño únese á campaña da Asociación Galega de Esclerose Lateral Amiotrófica (AGAELA), que xunto ás asociacións de familiares e pacientes, coma membros da Comunidade da ELA, lanzaron a Campaña #LuzporlaELA na que edificios e monumentos de toda España se iluminarán de verde co fin de visibilizar a esta doenza e apoiar ás persoas que a padecen, para concienciar á sociedade sobre as dificultades que sofren cada día.
O ano pasado ilumináronse 305 monumentos en 210 municipios de toda España. En Galicia iluminaranse de verde máis de 60 edificios, entre os que se encontran o Edificio Administrativo de San Caetano e a Cidade da Cultura; a Subdelegación do Goberno de Ourense, os edificios das deputacións de A Coruña, Ourense, Pontevedra e Lugo, entre moitos outros.
A Sociedade Española de Neuroloxía (SEN) estima que no país existen unhas 3.000 persoas afectadas por ELA e que cada año se diagnostican uns 900 novos casos.
 
Bádminton en Tomiño
Tomiño, 21 de xuño de 2021. Iníciase a andadura do novo club de Bádminton en Tomiño.
Durante os meses de xullo e agosto, pomos en marcha as escolas deportivas no Pavillón de A Carballa de Tomiño.
É unha actividade para nenos e nenas a partir de 6 años, e tamén para adultos.
A realizaremos os luns e mércores de xullo e agosto polas mañás, podendo escoller entre dous horarios:
de 10 a 11:30
ou de 11:30 a 13:00 h.
Calquera dúbida e inscricións poden contactar no teléfono 685 960 370 ou no email cbtomino@gmail.com
 

O Auditorio de Goián acolle este sábado un recital de trompeta a cargo de Desirée Gómez Bouzada
Tomiño, 22 de xuño de 2021.- O Auditorio de Goián vístese de festa o vindeiro sábado, 26 de xuño, para acoller o recital de trompeta de Desirée Gómez Bouzada, unha das músicas máis destacadas da Agrupación Musical de Goián.
Acompañada por Alejo Amoedo (piano), Rubén Fernández (tuba); Damián Riobó (trombón baixo); Ainara González (trompa) e José Miguel Pérez (trompeta), Desirée actuará ás 21.00 horas, ofrecendo un concerto composto de dúas partes, nas que interpretará pezas de J. Haydn, Andrés Álvarez, J.G. Pennequin e Victor Ewald.
As entradas, de balde, poden reservarse chamando ao Departamento de Cultura do Concello de Tomiño (986 62 20 01/03) ou enviando un correo electrónico a cultura@tomino.gal
Datos biográficos e traxectoria profesional
Desirée Gómez Bouzada nada no ano 1997 en Tomiño, inicia os seus estudos musicais na especialidade de trompeta ós oito anos na Agrupación Musical de Goián da man de Juan Carlos Díaz e Andrés Álvarez. Con catorce anos comeza os seus estudos no Conservatorio Profesional de Tui e continúa no Conservatorio Profesional de Vigo tendo como mestre a Luís González Amosa. Ademais dos estudos no conservatorio, tamén participou en cursos na especialidade de trompeta con músicos da talla de Roberto Bodí, Javi Simó, Frank Pullicini, José Forte, John Aigi, Luis González, Yael Fiuza, Alfonso González, Iván Crespo e Manu Mellaerts, entre outros.
Actualmente finaliza o Grao Superior de Música na especialidade de trompeta, cos mestres Adolfo Caride e Javier Viceiro, no Conservatorio Superior de Vigo. Forma parte do Curso de Especialización Instrumental (CEI) en Santiago co mestre Javi Simó, sendo este o segundo o ano. Formou parte da Xove Orquestra 430 e actualmente da Nationaal Jeugd Orkest (NJO) de Holanda. Participou en diferentes encontros ca Orquestra Vigo 430 de Vigo e ca Banda Sinfónica da Federación Galega de Bandas de Música. Forma parte da Agrupación Musical de Goián e imparte clases de trompeta na escola de música, á vez que remata a carreira de Pedagoxía na UNED. Tamén desempéñase como voluntaria da Oficina Municipal de información Xuvenil (OMIX) de Tomiño.
PROGRAMA DE CONCERTO
1ª Parte
J. Haydn- Concerto para trompeta en Mib Mayor (15 min.)
I.                Allegro
II.                Andante
III.                Finale Allegro
Andrés Álvarez - Moods, para trompeta e piano (12 min.)
I.                SHAME-ANGER
II.                SADNESS-LOVE
III.                FEAR-HAPPINES
2ª Parte
J.G. Pennequin - Morceau de Concert (7:30)
Victor Ewald- Quinteto para vento metal No.1 (12 min)

Tomiño renova 217 puntos de luz para reducir o consumo eléctrico, co apoio da Deputación e do IDAE
Tomiño, 23 de xuño de 2021.- O Concello de Tomiño comezou a semana pasada os traballos para renovar 217 puntos de luz situados en varios tramos das estradas PO-552, PO-344 e PO-553 (Ponte da Amizade), con arranxo ao convenio asinado coa Deputación de Pontevedra “Iluminación Exterior Sostible II”.
Trátase dun proxecto de renovación da iluminación pública e redución do consumo eléctrico, cun investimento de preto de 100.000 euros financiados nun 80% con fondos FEDER (Fondo Europeo de Desenvolvemento Rexional) a través do IDAE (Instituto para a Diversificación e Aforro da Enerxía).
Os tramos comprendidos nas obras suman un total aproximado de 8 quilómetros, comezando no límite co concello do Rosal, entre as parroquias de Tabagón e Goián; seguindo até o cruce do “Empalme” e dende aquí continuando cara ao acceso ao núcleo urbano de Tomiño.
A redución do consumo de enerxía eléctrica que se conseguirá tras a intervención, será polo menos de un 30% respecto do consumo actual. As tarefas que se levan a cabo estas semanas para lograr o obxectivo son a substitución das lámpadas e luminarias actuais por outras máis eficientes de tecnoloxía LED; substitución de balastros electromagnéticos por electrónicos e instalación de reloxos astronómicos para control da iluminación nocturna, entre outras.
O investimento total ascende a 98.775,44 euros, dos cales 79.020,35 serán achegados polo IDAE e cofinanciados con fondos FEDER; 12.255,09 polo Concello de Tomiño e 7.500,00 pola Deputación de Pontevedra.
“Este proxecto, co que Tomiño amosou o seu compromiso, ten como finalidade participar na transición ecolóxica cara a un modelo máis sostible que garanta o medio natural e o medio ambiente para as futuras xeracións, dando un pulo á economía baixa en carbono e contribuíndo á redución das emisións de CO2 á atmosfera e ao uso eficiente das enerxías limpas, especialmente, desde as administracións locais”, explica o concelleiro de Servizos Públicos, Lois Vázquez.
 

Tomiño adhírese á rede galega “Praias sen Fume” apelando á responsabilidade cidadá
Tomiño, 24 de xuño de 2021.- O Concello de Tomiño vén de adherirse á rede galega de PRAIAS SEN FUME. Por este motivo, o areal da praia fluvial de Goián manterase a partir de agora libre de cabichas e de malos fumes. A medida ten, sobre todo, un fin educativo e de sensibilización social, razón pola que non haberá sanción polo incumprimento. “Xa que non pretendemos recadar, senón educar e concienciar, non sancionaremos, apelando en todo caso á responsabilidade  cívica de cada persoa”, explican dende o Concello.
A medida busca evitar, ademais da evidente molestia para as persoas non fumadoras, o feito de atoparse con cabichas na área, ou que as nenas e os nenos vexan natural o feito de fumar diante deles, normalizando un hábito prexudicial para a saúde.
Paralelamente á toma da decisión, o Concello convida á cidadanía a realizar unha enquisa co fin de coñecer a súa opinión respecto do tema (https://forms.gle/hDvbfTZSJQCZqZA26).
“Toda prohibición acostuma xerar enfrontamento na opinión pública; non é o que pretendemos e por iso nos interesa coñecer a opinión das persoas que utilizan a praia de Goián”, comentan.
 

Máis de 200 persoas visitan a Escape Room   creada polo alumnado de Instalacións de Telecomunicacións do IES de Tomiño
Tomiño, 25 de xuño de 2021.- A Escape Room deseñada polo alumnado de 2º de CM de FP de Instalacións de Telecomunicacións do IES Antón Alonso Ríos, vén de rematar unha exitosa xira por outros centros educativos da comarca, onde alumnado e profesorado puideron desfrutar nos recreos de diferentes xogos e probas para tentar conseguir códigos que permitían ir abrindo caixas e portas onde se atopaban novas pistas que levaban ao xogo final.
No remate do curso, unhas 200 persoas aproximadamente xogaron con este proxecto, entre alumnado do centro e alumnado externo, así coma profesorado e persoal do IES tomiñés. O Seminario Menor San Paio de Tui e o CPI Manuel Suárez Marquier de O Rosal, foron os dous centros visitados na última semana.
Trátase dun proxecto innovador onde o alumnado realizou as prácticas do módulo “Circuíto pechado de televisión e seguridade electrónica” pero adaptadas para crear unha Escape Room. "Isto deulles unha motivación extra á hora de realizar as prácticas", explica o profesor responsable.
O visitantes, seguindo as pistas, conseguen abrir caixas e portas que lle darán máis pistas para avanzar no xogo e poder chegar á proba final, que consiste en desbloquear a porta da aula da Escape Room do IES de Tomiño, ou facer o propio cunha tablet na versión itinerante.
Deste xeito puidose dar a coñecer unha pequena parte dos módulos impartidos neste ciclo formativo de grao medio entre oalumnado de 4º de ESO dos centros educativos da contorna, co fin de que este ciclo medio sexa unha das alternativas a seguir polos estudantes tras rematar o ensino secundario obligatorio.
O proxecto da Escape Room comezou a xestarse no curso 2019-2020 cunha visita á empresa  colaboradora "Eskapark" de Vigo, na que o alumnado puido ver as súas instalacións e vivir a experiencia. Isto axudou ao grupo a familiarizarse con este tipo de xogos e coller ideas para poder adaptalas a unha Escape Room.
Coa declaración do estado de alarma o alumnado dese curso non puido rematar o proxecto que pretendía ofertar a Escape Room tanto ao alumnado do IES  coma ao alumnado doutros centros e mesmo á veciñanza de Tomiño. Pero neste curso retomouse o proxecto coa condición de que fóra portátil e así poder dar a coñecer, dun xeito lúdico, as ensinanzas que se imparten no CM de Instalacións de telecomunicacións do IES Antón Alonso Ríos.
 

A Xunta somete a información pública a reformulación do proxecto de trazado do desdobramento da estrada PO-552 na recta de Figueiró, no concello de Tomiño
Tomiño, 28 de xuño de 2021. A Xunta publica hoxe no Diario Oficial de Galicia (DOG) o anuncio polo que se somete a información pública a reformulación do proxecto de trazado do desdobramento da PO-552 na recta de Figueiró, no concello de Tomiño.
Trátase do novo proxecto de trazado de adaptación dos camiños de servizo previsto na reformulación do proxecto para converter nunha autovía urbana o treito de 2,1 quilómetros da actual estrada autonómica PO-552 entre a glorieta de Goián –na que remata o treito da Vía de Altas Prestacións entre Tui e A Guarda actualmente en servizo- e o acceso ao núcleo de Estás.
O DOG, simultaneamente ao novo trámite de información pública, recolle a efectos expropiatorios a relación de predios necesarios para executar o primeiro subtreito no que se dividiu o treito central da vía de altas prestacións, que suporá un investimento autonómico de preto de 12 millóns de euros. A execución da nova vía fai precisa a expropiación definitiva de 152 predios e a temporal de 64.
Antecedentes
Cómpre lembrar que durante a fase de información pública do referido proxecto, o Concello de Tomiño solicitou que os camiños de servizo da vía de altas prestacións previstos no documento se executasen máis lonxe do tronco da vía, coa finalidade de facilitar a mobilidade municipal. Deste xeito, os camiños de servizo deixan de ter unha función exclusiva de elementos funcionais da estrada para serviren tamén a mobilidade dos núcleos próximos.
Dado que o cambio solicitado foi aceptado e supón unha modificación da afección territorial, é necesario adaptar o documento redactado e sometelo a unha nova información pública. Todos os interesados nesta actuación poderán formular as súas achegas durante un período de 30 días hábiles, contados a partir de mañá. No seguinte enlace ao DOG pódese ampliar a información relativa a este anuncio: https://xurl.es/uebr0.


Regreso al contenido