O Rosal - galiciasuroeste

Title
Vaya al Contenido

O Rosal

COMARCA
O Rosal celebra o Día do Medio Ambiente cunha andaina de recollida de lixo en espazos naturais
O Rosal, 31 de maio de 2021.- O Rosal celebrará este sábado 5 de xuño o Día Mundial do Medio Ambiente cunha andaina para a recollida de lixo en espazos naturais aberta a todos os públicos. A ruta realizarase en grupos reducidos e cumprindo con todas as medidas de precaución e seguridade necesarias dada a situación sanitaria.
As persoas interesadas en participar deberán presentarse ás 17.00 horas na Casa do Río, o antigo matadoiro. Unha vez xa no punto de encontro a organización distribuirá a todas e todos os participantes en grupos en función do número de persoas e repartirá o material necesario para a actividade.
O Día Mundial do Medio Ambiente, establecido pola Asemblea Xeral das Nacións Unidas no ano 1972, celébrase este ano baixo o lema ‘Reimaxina, recrea, restaura’ para incidir na necesidade de realizar accións que poidan aprazar e deter a degradación dos ecosistemas e fomentar a súa recuperación. Ademais, esta data busca sensibilizar ás persoas sobre cuestións ambientais, promover a implicación da sociedade nun cambio de actitude para un desenvolvemento sostible e fomentar a cooperación para garantir que as vindeiras xeracións gocen dun futuro máis próspero e seguro.
 

Uns 200 ciclistas danse cita este sábado 5 de xuño no XV Trofeo Montes do Rosal
O Rosal, 1 de xuño de 2021.- A Praza do Calvario será este sábado 5 de xuño o punto de partida dos preto de 200 ciclistas que participarán no XV Trofeo Montes do Rosal, unha proba organizada polo Club Ciclista do Rosal en colaboración co Concello, a Federación Ciclismo Galego, a Fundación Deporte Galego, a Deputación de Pontevedra e a Xunta de Galicia, e que conta co patrocinio de outras entidades e empresas.
A proba sairá ás 16.00 horas da Praza do Calvario e percorrerá a rúa Simón do Mazo, a estrada da Morraceira, o Camiño de Gandarela, a estrada de Santa Ana e a rúa Jesús Noia para volver á praza do Calvario. A cita congregará a participantes de varios clubs de ciclismo galegos que competirán nas categorías Promesas, Principiantes, Alevíns, Infantís, Cadetes e Juniors, todas con categoría masculina e feminina. Dada a situación sanitaria, será unha proba sen público e con todas as medidas de prevención para garantir a seguridade de todas as persoas.
Esta nova edición do Trofeo Montes do Rosal foi presentada no Concello coa alcaldesa, Ánxela Fernández, que estivo acompañada polo concelleiro de Deportes, Germán Fernández; Daniel Benavides, xefe do Servizo Provincial de Deportes de Pontevedra da Xunta de Galicia; Jacobo Ucha, seleccionador e técnico da Federación Galega de Ciclismo; Gerardo Álvarez, presidente do club ciclista O Rosal; Eva Lomba, vicepresidenta do club, e Ramón Villar, secretario.
Dende o Concello quere felicitarse ao Club Ciclista O Rosal pola organización deste trofeo e pola celebración este 2021 do seu 40 aniversario, “catro décadas de dedicación e loita polo ciclismo e polo deporte de base”. Concello e Club Ciclista tamén queren agradecer a inestimable colaboración da veciñanza na celebración desta proba deportiva.
  

Alcaldesa e concelleiro visitan as obras de mellora do ramal de San Xián
O Rosal, 2 de xuño de 2021.- A alcaldesa do Rosal, Ánxela Fernández, e o concelleiro de Vías e Obras, Germán Fernández, visitaron estes días as obras de mellora que se están a realizar no ramal de San Xián. Trátanse de traballos de asfaltado e de mellora de muros de contención que realizou a Deputación de Pontevedra neste tramo sobre o que ten competencia e que vai transferir ao Concello ao abeiro do convenio para a reforma integral da EP-3303, que une os dous núcleos da ribeira do Rosal con Goián.
En fase de adxudicación
De xeito paralelo, Concello e Deputación continúan a dar pasos para o arranque da primeira fase do proxecto de transformación radical da estrada entre Tabagón-As Eiras-Goián. O proxecto atópase xa en fase de adxudicación e, seguindo os prazos marcados, prevese que as obras de execución comecen a finais de verán.
Unhas obras que suporán “unha transformación do Rosal non só en termos de mellora viaria, senón tamén de mobilidade e de comunicación entre os núcleos rurais”, que, como sinala a rexedora, permitirá seguir camiñando cara a “un novo modelo no que se recuperen espazos para a veciñanza e se fomente unha mobilidade sostible, dándolle prioridade aos peóns, poñendo en valor as persoas e o ámbito rural e contribuíndo a reducir a pegada de carbono”.
Nas obras desta primeira fase do proxecto investiranse máis de 650.000€, dos que o 80% serán achegados pola Deputación de Pontevedra e o outro 20% polo Concello do Rosal. Con elas está previsto remodelar un tramo de 1,7 quilómetros dos 4,5 totais, unha zona que conta cun intenso tráfico rodado e cunha importante mobilidade a pé. Os traballos contemplan a creación dun carril peonil e ciclista que se completará cunha plataforma de circulación con dous carrís con beiravía e con redutores de velocidade. Durante as obras tamén se renovará a rede de drenaxe, farase a canalización soterrada da rede de iluminación pública e disporase dunha plataforma única con limitación de velocidade a 20 km/h na zona do CRA María Zambrano.
 

Más de un centenar de escolares del Baixo Miño visitan el colmenar de Niño do Corvo
O Rosal, 4 de junio de 2021. Desde principios del mes de mayo de 2021 la empresa Apicultura Niño do Corvo ha iniciado las tan esperadas Visitas Escolares a uno de sus colmenares en las zonas boscosas de O Rosal.
Estas visita se inician después del fin de restricciones sanitarias y cumpliendo toda la normativa vigente de seguridad para que los más pequeños de la casa puedan conocer de primera mano cómo funciona el mundo de la apicultura y que sean conscientes del gran trabajo que realizan las abejas para el medio ambiente y para todo el ecosistema que nos rodea.
Hasta el momento más de un centenar de escolares han realizado ya visitas al colmenar de Apicultura Niño do Corvo, visitas que continuarán durante este mes de junio y donde atienden a las explicaciones de Marcos Rodríguez Portela, responsable de la empresa y encargado de introducir a los pequeños y pequeñas en este apasionante mundo de la apicultura.
Los colegios interesados en realizar estas visitas pueden ampliar información llamando al 671 644 541 o al 627 556 186.
Más visitas para la temporada de verano
Apicultura Niño do Corvo prepara para este verano nuevas Experiencias Apícolas que, al igual que en Semana Santa, supusieron un importante atractivo para todas aquellas personas que visitaron la comarca de O Baixo Miño y O Rosal, donde disfrutar de una actividad diferente, en contacto con la naturaleza con grupos reducidos y con protocolo covid-19 para la seguridad de todos los participantes.
Además los participantes participarán en una degustación de mieles, pudiendo saborear algunas de las mieles existentes como la Miel de Eucalipto, Mielato de Carballo, Miel de bosque  o la Miel de flores.
En palabras de Marcos Rodríguez Portela “quiero que este proyecto sirva para que mucha gente que no sabe cómo se elabora la miel pueda tener la oportunidad de conocer este mundo de primera mano, con visitas guiadas, haciéndolos partícipes de este proceso”.
Proyecto “Apadrina una colmena”
Marcos Portela ha puesto en marcha desde 2020 un novedoso proyecto titulado “Apadrina una colmena”, mediante el cual hace partícipe, a todo el que lo desee, del proceso de elaboración de la miel de sus colmenas, mediante una aportación anual.
A cambio de esta aportación anual, que se establece en 50€, el padrino de la colmena tendrá derecho a dos visitas guiadas al colmenar, donde conocerá como es el proceso natural de la elaboración de la miel de primera mano y, además, recibirá a cambio 3kg. de miel de la cosecha de la colmena apadrinada.
La idea principal del proyecto es que todo aquel que esté interesado pueda apadrinar su colmena o bien regalar estas “experiencias” a conocidos o familiares, dando así a conocer este mundo, pocas veces explorado por la mayoría de las personas.
Todas las personas que lo deseen, pueden apadrinar una colmena llamando al 671 644 541 o enviando un correo electrónico a melninodocorvo@gmail.com
Tienda online
Desde hace algunos meses Apicultura Niño do Corvo cuenta con una página web(www.apiculturagalicia.es)  con tienda online en la que encontrar novedades sobre el mundo de la apicultura así como los principales productos, tanto para profesionales como para principiantes. En ella también se pueden comprar de una forma sencilla todo tipo de mieles, con envío a todo el territorio nacional.
 
O Concello abre o prazo de inscrición para o campamento de verán municipal
O Rosal, 4 de xuño de 2021.- O Concello do Rosal abre o vindeiro luns 7 de xuño o prazo para a inscrición para o campamento de verán municipal, dirixido a nenos e nenas de educación infantil e primaria e que se desenvolverá ao longo dos meses de xullo e agosto na Escola de Marzán con todas as medidas de prevención e seguridade.
Con esta iniciativa o Concello busca “colaborar coas familias na conciliación laboral tras o remate do período lectivo á vez que se ofrece a rapaces e rapazas actividades lúdicas e educativas coas que dinamizar o tempo libre durante o período estival”, como destaca a alcaldesa, Ánxela Fernández Callís.
O campamento celebrarase de luns a venres en horario de 09.00 a 14.00 horas con opción a solicitar aula matinal dende as 08.00 h e saída ás 15.00 horas. Poderán solicitalo aqueles nenos e nenas empadroados no Rosal ou que os seus pais e nais ou titores legais traballen ou posúan un negocio no municipio. As persoas interesadas deberán presentar a súa solicitude ata o vindeiro 15 de xuño no Rexistro municipal do Rosal en horario de 09.00 a 14.00 horas.
 

Patrimonio, literatura, foto, música e moda, protagonistas culturais do mes de xuño no Rosal
O Rosal, 3 de xuño de 2021.- O Rosal volve a acoller este mes de xuño unha intensa axenda cultural na que o patrimonio, a literatura, a fotografía, a música e a moda serán os grandes protagonistas. “Teremos unha programación de primeiro nivel comprometida e diversa coa que conectar coa nosa memoria histórica e cultural e tamén coa contorna natural que tanto nos identifica”, explica a alcaldesa rosaleira, Ánxela Fernández.
A primeira actividade será o domingo 13 de xuño coa presentación do libro ‘Irmáns Flores. Os gaiteiros de Novás’, unha obras de Xerardo F. Santomé e Xosé Miguélez coa que lle queren render merecida homenaxe a Pepe e Emilio Flores Costas, dous populares músicos rosaleiros. Será nun acto ás 19.30 horas no auditorio municipal. O seguinte venres, o 18 de xuño, os rosaleiros e rosaleiras terán unha cita co seu patrimonio inmaterial na presentación do proxecto Memoria Viva, unha iniciativa do Concello coa que busca salvagardar a cultura viva arraigada no Rosal. Será a partir das 20.00 horas con auditorio municipal.
O sábado 19 de xuño será a quenda da Agrupación Musical do Rosal, que organiza a audición de final de curso do alumnado da Escola de Música no auditorio municipal a partir das 20.00 horas. O xoves 24 será a quenda de Juan Galán, que presentará o seu libro ‘Romanza de los naranjos en flor’ na Biblioteca Municipal ás 19.30 horas.
A última actividade da programación cultural do mes de xuño será o sábado 26 de xuño a cargo do alumnado da ESO do CPI Manuel Suárez Marquier, que organizará en colaboración co Concello un desfile de moda na Praza do Calvario (22.00 h) para conmemorar o Día Internacional do Orgullo. Tras o acto, como en anos anteriores, haberá música e diferentes actividades relacionadas co colectivo LGTBI, photocall con accesorios e moitas cousas máis.
Xunto con esta programación de actividades, os rosaleiros e rosaleiras tamén poderán desfrutar do 7 ao 25 de xuño na Praza do Calvario da exposición ‘Bolboretas’, unha mostra da fotógrafa Laura Lago, profesora de Lingua Española no IES Antón Alonso Ríos, experta en bolboretas e fotografía de natureza.
 

Comeza a execución das diferentes terrazas que conformarán o ecoparque Campo Novo
O Rosal, 7 de xuño de 2021.- As obras de creación do ecoparque Campo Novo, en viso dos Eidos, continúan o seu bo curso. A alcaldesa do Rosal, Ánxela Fernández Callís, e a arquitecta responsable do proxecto, María Fandiño, visitaron estes días os traballos deste proxecto que suporá a transformación da zona nun espazo de convivencia para toda a veciñanza.
Tras a reforma dos muros perimetrais e o descubrimento, recuperación e integración de antigas minas de auga ao proxecto, os traballo comezan agora a enfocarse na execución das diferentes terrazas coas que contará o ecoparque e que acollerán diferentes usos: xunto a unha zona dedicada a parque infantil haberá outra para merendeiro, unha área de estar e un aparcamento.
“Xa se comeza a albiscar o principal obxectivo deste proxecto, que era diferenciar a arquitectura nova da existente”, salienta a arquitecta. Para conseguilo na execución das terrazas empregarase un formigón coloreado con árido visto, de forma que a nova intervención sexa distinta do muro perimetral xa existente. Unha vez rematados estes traballos o seguinte paso será a colocación de plantacións e vexetación e a instalación do mobiliario.
Con estes novo ecoparque “poderemos desfrutar xa dun espazo creado pensando na súa contorna e buscando unha integración total. É un exemplo máis da aposta decidida do Concello por dar prioridade á veciñanza e por impulsar proxectos de proximidade”, lembra a alcaldesa.
O proxecto contempla a remodelación da zona empregando técnicas naturais e tradicionais e incorporando especies autóctonas relacionadas coa auga, un elemento de grande importancia nesta zona do Rosal. A creación deste ecoparque conta cun orzamento de máis de 93.000 euros cofinanciados a través do Plan Concellos da Deputación de Pontevedra e de fondos propios do Concello.
 

O legado dos irmáns Flores en 220 páxinas
O Rosal, 8 de xuño de 2021.- “É un xeito de recoñecemento e gratitude cara a dous seres marabillosos e as súas familias”. Con ese obxectivo naceu ‘Irmáns Flores. Os gaiteiros de Novás’, un libro de Xerardo F. Santomé e Xosé Miguélez no que os autores quixeron render unha merecida homenaxe a José e Emilio Flores Costas, dous populares músicos rosaleiros, testemuñas e elementos activos da vida social e cultural dos dous derradeiros terzos do século XX no concello do Rosal e no Baixo Miño.
Os autores presentarán esta obra, que contou coa colaboración do Concello do Rosal, este domingo 13 a partir das 19.30 horas no auditorio municipal. O acto celebrarase con aforo reducido e todas as persoas interesadas en asistir deberán reservar a súa entrada a través da páxina web do Concello. A presentación contará con todas as medidas de prevención e seguridade marcadas pola situación sanitaria.
Recollida da tradición oral
O libro recolle o legado dos irmáns Flores, que trascende máis aló das súas interpretacións musicais. Como salientan os autores na introdución da obra, José e Emilio Flores “interviñeron moi activamente na formación persoal de moitas e moitos veciños, algúns dos cales hoxe en día dedícanse profesionalmente á música. Participaron e crearon colectivos que abranguen calquera manifestación de música popular galega. E todo a partir dunha  gaita, pois este foi o instrumento co que comezaron e o que espertou toda unha vida dedicada a divertir a un pobo nunha época realmente triste e escura da nosa historia máis recente”.
Unha historia que foron recompilando nun longo traballo de campo baseado fundamentalmente na tradición oral de homes e mulleres que abriron de par en par as portas da súa memoria aos dous autores. O resultado é  un relato polifónico no que se percorren lugares e momentos desde perspectivas diferentes dunha historia escrita fundamentalmente a través das narracións dos propios Emilio e José, das súas donas, das súas fillas e fillos e das súas amizades.
Xerardo F. Santomé e Xosé Miguélez quixeron completar o libro cun DVD que inclúe un álbum fotográfico; partituras do repertorio dos Flores, entre as que destacan as compostas por José; diversas gravacións de audio e diferentes ligazóns a vídeos dos dous protagonistas cun alto valor documental e histórico.
Exposición
Por outro lado, a veciñanza xa pode desfrutar na Praza do Calvario dunha nova mostra ao aire libre. Trátase dunha exposición de fotografía que recolle as espectaculares imaxes captadas por Laura Lago, profesora de Lingua española no IES Antón Alonso Ríos de Tomiño e experta en bolboretas e fotografía de natureza. A mostra poderá visitarse ata o vindeiro 25 de xuño.
 

As Eiras triplica a súa implicación coa compostaxe individual
O Rosal, 10 de xuño de 2021.- Grande acollida por parte da veciñanza dos composteiros individuais (COINs) repartidos polo Concello do Rosal. Trátase dunha acción posta en marcha como parte da estratexia municipal para potenciar a compostaxe individual nas vivendas da localidade e que forma parte dun programa de prevención, recollida separada e valorización dos biorresiduos creado ao abeiro dunha liña de axudas da Consellería de Medio Ambiente, Territorio e Vivenda cofinanciadas polo Fondo Europeo de Desenvolvemento Rexional con cargo ao programa Feder Galicia 2014-2020.
Un interese por parte da veciñanza que levou á parroquia das Eiras a triplicar a súa implicación coa compostaxe individual, xa que pasou de ser a zona con menos implantación e apenas un 18% de COINs a ser a máis involucrada e ter case un 59%. Por barrios, os que contan cunha maior porcentaxe de composteiros individuais son os de Os Picóns e Carril, que pasaron de ter un 23 e un 7,14% de COINs a case un 77 e 61%, respectivamente. “Estamos moi contentos coa acollida da xente, que xa se traduce nun aumento moi significativo do número de casas que xa dispoñen do seu propio composteiro. O noso obxectivo é percorrer pouco a pouco todas as parroquias e conseguir a maior porcentaxe de implantación posible”, salienta a concelleira de Medio Ambiente, Sara Vicente.
O Concello continuará agora co reparto na parroquia de Tabagón e nos vindeiros meses irá pasando polas distintas parroquias. Aínda así, calquera persoa interesada poderá solicitar un composteiro a través da inscribirse na páxina web de Medio Ambiente do Rosal, no apartado de compostaxe, e acudir ao Concello a recollelo.
Son composteiros de 400L de volume que irán acompañados de aireador, caldeiro e base antirroedores perfectos para colocar en vivendas que conten cun pequeno espazo. O mestre composteiro ofrecerá a información e o asesoramento técnicos necesarios para poñelo en marcha, aínda que na páxina web tamén se poden resolver as dúbidas e consultar o titoriais de montaxe das unidades.
 

Comeza o traballo de campo para avaliar a xestión das augas residuais na zona costeira do Rosal

O Rosal, 10 de xuño de 2021.- O Concello arranca a vindeira semana o traballo de campo para avaliar a xestión das augas residuais da na zona costeira do Rosal, unha problemática que aínda que depende de Augas de Galicia preocupa moito ao goberno municipal por como afecta a todos os veciños e veciñas. Un equipo técnico especializado percorrerá os barrios de Portecelo e San Xián os días 16 e 17 de xuño de 09.00 a 19.00 horas para realizar o estudo de avaliación e ter unha visión clara da realidade.
Dende o Concello prégase a colaboración de toda a veciñanza para poder analizar a situación actual na que se atopa a xestión de augas residuais nesta zona e “poder atopar solucións a medio prazo”. “Somos conscientes da problemática que levan anos padecendo os veciños e veciñas destas zonas, por iso quixemos dar un primeiro paso importante na procura de alternativas colaborando en todo momento co órgano competente”, explica a alcaldesa, Ánxela Fernández Callís.
Este estudo permitirá cuantificar a cantidade de augas residuais que xeran de forma individual as preto de 200 vivendas e edificacións da zona, das que só arredor de 80 están habitadas todo o ano. O obxectivo é determinar as necesidades conxuntas e as posibles solucións a medio prazo para un tratamento de augas residuais que permita dispoñer dunha xestión ambientalmente máis sostible que a actual.
 

Xornadas, voluntariado, vertidos ou a xestión de incendios, entre os temas tratados no Consello Municipal de Medio Ambiente
O Rosal, 11 de xuño de 2021.- O Concello do Rosal continúa dándolle pulo á participación cidadá, nesta ocasión dentro do seu compromiso co medio ambiente, coa preservación da contorna e coa natureza. Esta semana celebrouse a segunda reunión do Consello Municipal de Medio Ambiente, integrado por persoas e representantes de asociacións relacionadas con este sector e ao que nesta ocasión se sumaron as comunidades de montes do Rosal.
Nesta ocasión as persoas participantes puxeron sobre a mesa diferentes accións e iniciativas a desenvolver no municipio ao longo deste ano, como pode ser a celebración dunhas xornadas de enerxía nas que abordar diferentes temas que poidan interesar ao público ou a realización de saídas periódicas para a limpeza de ríos ou para plantacións simbólicas, entre outras.
Outro dos temas que saíu durante a reunión foi a dos vertidos, especialmente os clandestinos de entullo, para os que se tratará de buscar solucións para atallalos e recuperar o espazo. A diferente vexetación e a incidencia das especies invasoras na zona de ribeira foi outro dos aspectos debatidos, sobre o que se propuxo ir facendo retiradas en diferente zonas emblemáticas repoboando antes de eliminar a actual vexetación.
A xestión dos lumes foi outra das cuestións abordadas. As e os integrantes do Consello resaltaron a importancia de buscar solucións ás 300 Ha de matos particulares abandonados, un gran problema para a correcta xestión dos incendios. Cortalumes das comunidades de montes, permutas ou a publicación dun bando recalcando a obrigatoriedade da limpeza de fincas foron algunhas das ideas propostas para reducir riscos. Ademais, tamén se puxo sobre a mesa a posibilidade de facer unha memoria e tratar de dispoñer dun retén de incendios dende o propio Concello.
Este consello é un órgano consultivo integrado por persoas e representantes de asociacións relacionadas coa natureza e como medio ambiente que serve de foro aglutinador de ideas, propostas, preguntas e respostas sobre as actuacións medioambientais que se están levando a cabo no Concello do Rosal para ser un municipio máis sustentable.
 

Volven as rutas guiadas polos muíños do Folón e do Picón e a Senda dos Pescadores
O Rosal, 15 de xuño de 2021.- O Concello do Rosal volve traer este verán unha proposta de lecer para desfrutar da natureza coñecendo un pouco máis o patrimonio cultural e etnográfico do municipio. Deste xeito, durante os meses de xullo e agosto organizaranse un total de 26 visitas guiadas polos muíños do Folón e do Picón e pola Senda dos Pescadores que se dividirán en tres modalidades diferentes, unha delas dirixida a público familiar.
As persoas interesadas poden inscribirse xa nas:
·         Visitas guiadas á ruta dos muíños do Folón e do Picón (PR-G 94), de 3,5 quilómetros de percorrido, homologada pola Federación Galega de Montañismo e na que se afondará na descrición e historia dos muíños.
·         Visitas guiadas para familias nos muíños, con percorrido e contidos adaptados á idade das persoas participantes e onde cativas e cativos terán que ir resolvendo unha serie de probas axudados polas súas familias. Está indicado para menores de entre 4 e 8 anos.
·         Visitas polo Sendeiro de Pescadores Río Miño-Tamuxe (PR-G 112), unha ruta de 7,2 km homologada pola Federación Galega de Montañismo e na que se irá facendo unha descrición e explicación da fauna e da flora e da historia das diferentes parroquias que atravesa.
Son todas rutas homologadas para grupos reducidos nas que as persoas participantes coñecerán estes recunchos do Rosal da man dun guía especializado e acreditado pola Xunta de Galicia. Para garantir as distancias de seguridades entre asistentes e cumprir con todos os protocolos de prevención, os grupos estarán limitados a 15 persoas. Recoméndase levar calzado cómodo e unha botella de auga e o uso de máscara será obrigatorio.
As rutas terán un custe de 2 euros por persoa e todas as persoas interesadas deberán inscribirse previamente na web municipal, incluídos os menores, que tamén deben pagar e facer a pertinente inscrición. As persoas interesadas poderán reservar a súa praza ata dúas horas antes do inicio da ruta e abonar o prezo do banco. A reserva só será válida unha vez sexa efectuado o pago e, para maior seguridade, é obrigatorio levar o ticket de reserva e o xustificante de pago.
Información turística
As medidas preventivas para evitar o contaxio da COVID-19 desaconsellan tanto a presenza de público en espazos reducidos como o reparto de material informativo en papel, polo que o Concello do Rosal decidiu non abrir ao público de novo este ano a oficina de turismo situada ao pé dos muíños do Folón e do Picón. A información estará dispoñible en paneis informativos ao longo da ruta, que conta con sinalización vertical con toda a información relevante, con diferentes zonas nas que a través dun código QR poden visualizarse vídeos ou obter información sobre diferentes puntos do sendeiro. Toda esta información tamén pode consultarse na páxina web municipal.
 
O Rosal recupera a súa ‘Memoria viva’
O Rosal, 14 de xuño de 2021.- O Concello do Rosal presenta este venres 18 de xuño no auditorio municipal (20.00 horas) ‘Memoria viva’, un proxecto plurianual que busca poñer en marcha un sistema de salvagarda do patrimonio inmaterial do Rosal, así como do coñecemento e da memoria que atesouran as persoas maiores do municipio.
Trátase dunha iniciativa plurianual no que se recollerán as lembranzas das e dos maiores do Rosal, “recuperando e recompilando vivencias persoais, momentos históricos, formas de vida... para que non caian no esquecemento”. “Este proxecto nace polo desexo de que non desapareza unha parte importante da nosa memoria individual e colectiva, de conservar esas historias que non están nos libros pero que son tan importantes para nós como rosaleiras e rosaleiros”, destaca a alcaldesa, Ánxela Fernández Callís.
O proxecto recolle en vídeo as entrevistas a diferentes persoas de idade con coñecementos relativos a unha época, un oficio, unha tradición ou calquera elemento patrimonial de interese, así como libros de pequeno formato coleccionables de cada unha destas entrevistas.
Nesta primeira edición o Concello contou coa inestimable colaboración de Nemesio Castro e Marcola González e das súas familias, sen as que non sería posible ter chegado a realizar os traballos de documentación e gravación.
Durante o acto presentaranse os dous primeiros libros do proxecto, así como os dous primeiros vídeos documentais.
As persoas interesadas en asistir poderán reservar a súa praza a través da páxina web municipal. O acto contará con aforo limitado e todas as medidas de seguridade.
 

O Consello Municipal marca o camiño das futuras actividades culturais no Rosal
O Rosal, 17 de xuño de 2021.- O Consello Municipal de Cultura volveu reunirse de novo como viveiro de ideas e foro de debate que sirva para marcar o camiño das futuras actividades culturais que se desenvolvan no Rosal. Neste novo encontro, a axenda cultural nos barrios ou o papel das asociacións foron algúns dos temas tratados por este órgano consultivo que busca traballar man a man con toda a sociedade cara a unha axenda cultural innovadora e pensada para todos os rosaleiros e rosaleiras. “O obxectivo é compartir ideas, facer propostas, comentar e avaliar as actividades... En definitiva, reflexionar en conxunto sobre as iniciativas culturais que queremos para o noso concello”, asegurou o edil de Cultura, Carlos Villanueva.
A programación cultural para este verán foi un dos puntos tratados na reunión. Dende o Concello estase a traballar para levar eventos a todos os barrios, dende música ou cine ata teatro. Ademais de repasar as actividades previstas para este mes de xuño, tamén se achegaron novas propostas culturais, como novas exposicións fotográficas, novas conferencias ou incluso novas xornadas festivas, como a Festa da Raia, proposta como un evento no que unir as dúas beiras do río nun acto con comida, música e andaina.
Pola súa banda, Villanueva comentou a todas as persoas integrantes do consello que O Rosal xa está en trámites coa Axencia Galega de Industrias Culturais para poder entrar a formar parte do circuíto de representacións teatrais. O edil de Cultura tamén quixo destacar o papel das asociacións nos eventos, ás que invitou a actuar como organizadores de actividades co Concello como colaborador. A organización da Festa do Asociacionismo, con proposta de datas, modalidades e actividades, foi outro dos puntos a tratar no encontro.
 

O Rosal dá voz á súa memoria máis viva

O Rosal, 19 de xuño de 2021.- Nun emotivo acto no auditorio municipal, a alcaldesa do Rosal, Ánxela Fernández, presentou este venres o proxecto ‘Memoria Viva’, unha iniciativa “que xorde do convencemento de que era fundamental traballar na recuperación e recompilación dese patrimonio inmaterial vivo que teñen atesourado as nosas persoas maiores para que non caia no esvaecemento”. Un proxecto plurianual que busca poñer en marcha un sistema de salvagarda das lembranzas das persoas de maior idade do Rosal e que recollerá en vídeos documentais e libros as testemuñas e vivencias dos veciños e veciñas doutros tempos, a súa visión de momentos históricos ou a forma de vivir doutros tempos.
“Damos un paso importantísimo, porque non só queremos recoller pouco a pouco ese patrimonio inmaterial que temos, senón que temos a oportunidade de facelo cos seus protagonistas contándoo en primeira persoa. Esta memoria está viva e ese é un valor diferencial deste proxecto, xa que estamos afeitos a recoñecementos póstumos”, salientou a rexedora. Este proxecto terá continuidade anual e carácter plurianual xa que “hoxe damos un paso moi importante que ten que perdurar no tempo. Traballamos con material moi delicado e faremos un esforzo por recoller a tantas persoas maiores como nos sexa posible, a tantos avós e avoas do Rosal que teñen tanto que contar sobre un pasado que explica porque somos quen somos”.
Nemesio Castro (91 anos) e Marcola González (97) son os protagonistas da primeira edición deste proxecto de temática transversal no que se recolle “o punto de vista de dúas persoas tan implicadas sobre a realidade que lles tocou vivir no noso pobo”.
Por un lado, Nemesio, “un home a que case todo o mundo coñece polo extrovertido que é e porque sempre que fala do Rosal faino con orgullo e paixón. É parte do legado do noso pobo e ten un vínculo moi especial cun valor patrimonial fundamental para nós como son os muíños do Folón e do Picón, porque como el mesmo di non sei se fun do muíño para casa ou de casa para os muíños porque os muíños son a súa casa”.
Por outro, Marcola, “a tendeira de Novás, a tenda que era o centro de operacións de todo o barrio. Unha muller avanzada aos seus tempos, que sempre foi dous ou tres pasos por diante da realidade que lle tocou vivir. É unha muller que na súa vida foi rachando barreiras e teitos de cristal. Aprendeu a ler naqueles tempos, sacou o carné e aprendeu a nadar de maior... e acredita a forza da xente nova para construír o futuro”.
Despois de visualizar os dous primeiros vídeos documentais do proxecto, a alcaldesa fixo entrega de dous ramos de flores a Marcola e Nemesio. O Concello quixo tamén sorprender ao muiñeiro máis coñecido do Rosal, que xusto cumpre 91 anos este 19 de xuño: o director da Banda de Música, Javier Alonso, e o seu alumno Rubén tocaron ao piano e ao saxofón a melodía do ‘Aniversario feliz’ mentres todo o auditorio lle cantaba.
A alcaldesa quixo agradecer especialmente ás súas familias “a implicación, a colaboración e o agarimoso esforzo para conseguir sacar adiante este proxecto que nos enche de ilusión”. O evento, guiado polo rosaleiro Javier Lago, contou coa presenza de familiares e amigos dos protagonistas, así como da deputada Victoria Alonso; da alcaldesa de Tomiño, Sandra González; de representantes da corporación municipal e dun cento de veciños e veciñas.

A unidade móbil de doazón de sangue estará no Rosal o vindeiro mércores 30 de xuño
O Rosal, 21 de xuño de 2021.- Unha unidade móbil do Centro de Transfusión de Galicia desprazarase ata o concello do Rosal este mes de xuño. O vindeiro mércores 30 un autobús da Axencia de Doazón de Órganos e Sangue estará na Praza do Calvario de 10.00 a 14.00 e de 16.30 a 21.00 horas para todas aquelas persoas que queiran acudir a doar.
Para o Centro de Transfusión a máxima prioridade é a seguridade das persoas doantes e receptoras dos compoñentes sanguíneos, polo que aínda que a situación sanitaria mellor continúa extremando os protocolos de prevención para garantir a continuidade dun servizo esencial, que permite cada día salvar vidas de moitos enfermos ingresados nos hospitais galegos. Por este motivo, todas as persoas que desexen doar sangue poderán pedir cita previa chamando ao teléfono gratuíto 900 100 828 para garantir unha afluencia gradual e ordenada dos e das doantes.
Aínda que o persoal do Centro de Transfusión fai unha revisión de saúde a todas as persoas que acoden a doar para garantir a seguridade dos compoñentes da sangue, recoméndase non acudir a doar sangue se nos últimos 15 días se tivo febre, tose ou problemas respiratorios. Pídese tamén ás persoas doantes agardar un metro de separación entre persoas nas zonas de espera.
O Centro de Transfusión lembra que para doar sangue hai que almorzar e despois de xantar agardar dúas horas para facer a doazón. É importante levar a tarxeta de doazón, o DNI ou un documento similar, ademais de informar ao médico en caso de estar tomando algún medicamento.
 

Juan Galán presenta no Rosal o seu libro ‘Romanza de los naranjos en flor’
O Rosal, 22 de xuño de 2021.- Proseguen as actividades culturais no Rosal para este mes de xuño. Este xoves 24 a Biblioteca municipal acolle a presentación do libro ‘Romanza de los naranjos en flor’, a novela coa que o filólogo, docente e investigador Juan Galán inicia a súa carreira literaria. Será a partir das 19.30 horas con aforo reducido e entrada de balde e libre ata completar prazas. A presentación contará con todas as medidas de prevención e seguridade marcadas polas autoridades sanitarias.
‘Romanza de los naranjos en flor’ é unha combinación de novela histórica e de intriga que transcorre durante a Guerra Civil española. Cunha estrutura complexa, con diversas voces narrativas e con saltos no tempo, o libro inclúe ademais entradas nun caderno a modo de diario, cartas, informes e novas xornalísticas.
A novela narra a historia de dous personaxes: Alfonso Castro Weiss, falanxista coruñés, avogado e fillo de republicano nado en Ferrol; e Miguel Artimes Llana, violinista ovetense afiliado á CNT. As súas vidas transcorren de xeito paralelo, sen vínculos entre eles, ata que coinciden no campo de concentración do Mosteiro de Oia, Alfonso como inspector, Miguel como recluso.
Juan Galán retrata nesta obra unha traxedia colectiva na que, ademais de describir a dureza das condicións carcerarias, consegue atopar espazo para o amor, a música, a solidariedade, o humor e a amizade entre persoas de bandos enfrontados.
Licenciado en Filoloxía Inglesa pola Universidade de Santiago, Galán viviu en países de varios continentes e traballou como profesor de inglés en Karoi, Zimbabwe. Tras exercer a docencia durante máis de 30 anos, acaba de xubilarse e está centrado na súa segunda novela, que xira arredor da escritora británica Virginia Wolf e a súa relación con Galicia. Ademais de docente e escritor, Galán tamén e investigador da Memoria Histórica Democrática e está preparando unha biografía sobre varios prisioneiros republicanos.
 

O Rosal desfila pola diversidade
O Rosal, 23 de xuño de 2021.- O Concello do Rosal e o CPI Manuel Suárez Marquier preparan unha xornada lúdica e festiva para amosar que “somos diversos e iso enriquece”. Con gallo do Día Internacional do Orgullo LGTBI, este sábado 26 de xuño a Praza do Calvario converterase no epicentro de diferentes actividades coas que se busca visibilizar a loita en favor dos dereitos deste colectivo. Ás 22.00 horas comezará a soar música na praza para que os veciños e veciñas vaian achegándose e desfrutando dun photocall en forma de armario, das pulseiras co arco da vella que se repartirán entre o público ou das accións realizadas ao abeiro do Revolucionando Mentes do Concello ou do Proxecto VÍA.
Xa a partir das 22.30 horas os alumnos e alumnas de Plástica da ESO do CPI Suárez Marquier converteranse nos protagonistas cun desfile de moda nas que se amosarán os seus propios deseños. Tras todo un ano traballando en clase a evolución da moda, dende as súas orixes ata a actualidade, as rapazas e rapaces do CPI subirán á pasarela para amosar as súas propias creacións, dende accesorios ou prendas soltas ata pezas de vestiario completos. Non estarán sos, xa que no desfile tamén participarán creadores rosaleiros: Nerea Rodríguez, que presentará pezas de dúas das súas coleccións, e Adanegra, unha firma con deseños orgánicos e de estilo andróxino moi creativos.
O alumnado desfilará presentando as súas propias creacións, pero tamén contarán coa colaboración doutras 18 persoas de diferentes asociacións rosaleiras que se subirán á pasarela para lucir dos diferentes deseños.
A actividade conta tamén coa colaboración da Rede Educativa Apoio LGBTIQ+ de Galicia e do Proxecto VIA, unha iniciativa posta en marcha polo alumnado do CPI Manuel Suárez Marquier co apoio do profesorado para visibilizar, informar e apoiar.
Como complemento a esta actvividade de conmemoración, un arco da vella xa cubre dende hoxe a Praza do Calvario.
 
O alumnado do CPI Manuel Suárez Marquier aprende a revalorizar os residuos plásticos
O Rosal, 23 de xuño de 2021.- O Concello do Rosal levou ás aulas un novo obradoiro de sensibilización medioambiental dirixido ao alumnado de 5º de Primaria do CPI Manuel Suárez Marquier, posto en marcha ao abeiro da subvención cofinanciada con fondos Feder Galicia 2014-2020 para fomentar a reparación e reutilización de obxectos. “Buscamos concienciar sobre a nosa realidade ao máis pequenos e pequenas, para que coñezan todas as posibilidades que temos á hora de tratar os obxectos e para que acollan a idea de alongar a vida útil dos bens materiais dun xeito natural”, salienta a concelleira de Medio Ambiente, Sara Vicente.
Neste obradoiro especializado en residuos plásticos, os rapaces e rapazas puideron desfrutar dunha experiencia de reciclaxe íntegra, xa que ademais de recibir unha charla educativa para concienciar sobre o problema actual dos residuos plásticos, cunha máquina inxectora puideron transformar en vivo residuos plásticos en novos obxectos. Unha forma de deixar de ver estes residuos como lixo e revalorizalos en proximidade, evitando longas viaxes.
Durante a primeira parte, nunha charla dinámica introduciuse ao alumnado no mundo do plástico, nas súas virtudes e defectos, analizando o actual sistema de xestión de residuos ou a degradación do plásticos e os microplásticos e como iso afecta á contorna. Persoal especializado de Aventura Plástica abordou cos nenos e nenas as posibles solucións e se lles ensinou como funciona o proceso de reciclaxe con diferentes máquinas.
Xa na segunda parte do taller as rapazas e rapaces aprenderon a identificar os diferentes tipos de plástico de consumo diario e puideron ver como unha máquina de inxección transformaba varios destes plásticos previamente triturados en novos obxectos únicos e irrepetibles.
 
‘Entroido’ de Valmiñor mejor diseño de vermú del mundo en los World Vermouth Awards
O Rosal, 23 de junio de 2021. Valmiñor sigue conquistando el éxito tras ser premiada este año por su proyecto I+D+i I ‘Innter Winargal 15’ que tuvo como objetivo valorizar la riqueza varietal y botánica de Galicia, siendo reconocida por los Premios PTV de Innovación. Su vermú ‘Entroido’, que anteriormente ya había sido premiado en otros certámenes de diseño, vuelve a arrasar y esta vez internacionalmente.
Entroido blanco: el mejor del mundo
Los World Vermouth Awards -un concurso internacional celebrado en Reino Unido donde se seleccionan, premian y promueven los mejores vermús del mundo entre los consumidores- ha reconocido el vermú ‘Entroido’ blanco como mejor diseño de vermús del mundo (“World’s best design”). Asimismo, el ‘Entroido’ rojo ha sido premiado con la medalla de bronce en la categoría de mejores vermús semi-secos.
El diseño de ‘Entroido’ , es de la agencia viguesa Anónimo Advertising, se compone de un degradado verde intenso hacia una transparencia total que recuerda al paisaje de Galicia.
En cuanto al vermú, tiene un marcado matiz a varietales de las viníferas gallegas, así como de las hierbas aromáticas de la comunidad, que previamente han sido maceradas en destilados vínicos del mismo origen y con aporte de maderas tradicionales del bosque atlántico, que dio pie a este vermú tan especial. Un vino aromatizado que aporta novedad al consumidor, gracias a sus caracteres organolépticos finales, diferenciándose de los demás vermús del mercado a través de su sabor y su personalidad única.
Entroido rojo: el único vermú español premiado en su categoría.
Por su parte, el vermú Entroido rojo elaborado 100% con vino Valmiñor Albariño, ha sido galardonado con la medalla de bronce en la categoría semi-seco, convirtiéndose en el único vermú español premiado de su categoría. El jurado se compuso de un panel de expertos que realizaron una cata a ciegas; valorando los aromas, sabores y otros elementos de relevancia.
Los World Drink Awards, son los premios que reconocen a nivel mundial a las mejores bebidas, recompensando y promoviéndolas entre los consumidores y el comercio internacional. Son galardones presentados por TheDrinksReport.com, la referencia número uno del mundo para profesionales de bebidas.
Carlos Gómez Davila, director general de Adegas Valmiñor declaró que “Estamos muy contentos y orgullosos, de que una bodega gallega con un producto elaborado con tanto cariño haya sido reconocida a nivel mundial tras tanto trabajo y esfuerzo. Sin duda, este galardón nos sitúa entre los mejores internacionalmente; es una muestra de que las cosas hechas en nuestra tierra, Galicia, pueden competir entre la élite y situarse a la vanguardia de este sector”.
 

O Rosal recibe aos piragüistas olímpicos Pablo Martínez e Cayetano García

 
O Rosal, 25 de xuño de 2021.- Emotiva recepción no Concello do Rosal aos piragüistas olímpicos Pablo Martínez Estévez e Cayetano García de la Borbolla Yaque, dous deportistas moi novos que o vindeiro mes de agosto estarán competindo nos Xogos Olímpicos de Tokio na categoría C2-1000 m. Arroupados por familiares e veciños e veciñas das Eiras, de onde é orixinaria a familia de Pablo Martínez, ambos os dous deportistas foron atendidos pola alcaldesa, Ánxela Fernández Callís, que lles fixo entrega dun pequeno agasallo composto por produtos locais.  
Aínda que nado en Sevilla, Pablo Martínez é rosaleiro de sentimento e de corazón. Os seu avó paterno, David Martínez, e a súa nai, Isabel Estévez, son naturais das Eiras, a onde continúan moi ligados. Con vivenda nos Picóns de Riba, a familia de Pablo volvía sempre que podía ao Rosal. Nestas frecuentes estancias de semanas ou  incluso meses na época estival naceu unha estreita relación do piragüista con deportistas do Kayac Tudense, a onde segue acudindo a adestrar e onde conserva moitos amigos e compañeiros. Na súa vida deportiva tamén está moi ligado a Galicia, xa que participou en numerosas probas celebradas na comunidade autónoma e permaneceu concentrado nos últimos meses coa selección nacional  en Castrelo de Miño.
Dende o Concello desexámoslles a estes dous novos deportistas moita sorte de cara a cita olímpica e agradecemos a grande implicación e o apoio da veciños e veciñas das Eiras a estes dous piragüistas.
 
O Concello pon en marcha unha decena de obradoiros de xuventude para este verán
O Rosal, 25 de xuño de 2021.- O Concello pón en marcha para este verán unha decena de obradoiros monográficos dirixidos a rapaces e rapazas a partir dos 12 anos. Trátanse de talleres de temática diversa cos que se busca “favorecer unha programación de lecer o máis variada posible na que se fomente a participación de toda a mocidade”, explica a alcaldesa, Ánxela Fernández Callís.
As persoas interesadas xa poden inscribirse a través de https://portal.concellodorosal.es/obradoiros-para-xuventude/aos diferentes obradoiros ofertados, que terán dúas datas de peche de inscrición previa. Por un lado, os nenos e nenas poden anotarse ata o 12 de xullo aos cursos de baile moderno, piragüismo, calcenecos, bixutería de reciclaxe, creación de obxectos con papel ou o de plástico máxico. Mentres, as persoas interesadas en participar no obradoiro de estampación en tela, de transferencia de imaxes, de letras alteradas ou de scrapbooking terán ata o 19 de xullo para a inscrición previa.
Así, no obradoiro de baile moderno as e os participantes desfrutarán da fusión de bailes urbanos con ballet clásico, danza ou jazz; no de piragüismo aprenderán todo o necesario para poder desenvolverse con soltura en augas tranquilas; no de calcenecos crearán monecos personalizados e moi variados a partir de calcetíns desemparellados ou vellos; no de bixutería reciclaranse colares, pendentes e pulseiras que xa non se empreguen, facendo novos complementos e aprendendo novas técnicas; no de ‘Dalle vida ao papel’ crearanse novos obxectos a partir de anacos de papel ou recortes e no de ‘Plástico máxico’ empregarase este novo tipo de plástico moi usado no mundo handmade para facer pequenas pezas de bixutería.
Pola súa banda, no de estampación en tela, o alumnado poderá decorar diferentes pezas téxtiles empregando diferentes técnicas de pintura e estampado; no de transferencia de imaxes crearán unha caixa decorativa cunha foto personalizada; no de ‘Letras alteradas’ decorarán unha letra de cartón con diferentes técnicas e adornos; e no de scrapbooking poderán coñecer un novo xeito de plasmar fotografías e recordos por medio dun proceso moi personalizado e creativo.
Na web municipal pódese atopar toda a información sobre os cursos, dende as actividades que se van a desenvolver ata data de celebración, horario, lugar e calquera outra indicación.
 

O proxecto ‘Memoria viva’ visita os barrios dos seus dous protagonistas
O Rosal, 26 de xuño de 2021.- O proxecto ‘Memoria Viva’ chega aos barrios dos seus dous primeiros protagonistas. Tras o éxito acadado no acto de presentación, o Concello do Rosal quere levar esta iniciativa aos barrios onde naceron e viven Marcola González e Nemesio Castro, nos que se celebrará unha proxección dos seus vídeos documentais. “Non só é un xeito de continuar achegando a cultura aos barrios, senón tamén de darlles a Marcola e Nemesio o protagonismo que merecen, sendo profetas na súa propia terra”, destaca a alcaldesa, Ánxela Fernández Callís.
A primeira proxección terá lugar o vindeiro xoves 8 de xullo na Praza de Novás, barrio de onde é orixinaria Marcola. Pola súa banda, o sábado 10 a cita para ver o documental de Nemesio será en Martín, nun sitio aínda por determinar. Ademais, todas as persoas interesadas en conseguir os libros do proxecto, editados nun pequeno e moderno formato coleccionable, sobre estas dúas persoas tan icónicas do Rosal poderán facelo a partir da vindeira semana nas dependencias do Concello.
‘Memoria viva’ é un proxecto plurianual que busca poñer en marcha un sistema de salvagarda do patrimonio inmaterial do Rosal, así como do coñecemento e da memoria que atesouran as persoas maiores do municipio. “Queremos conservar unha parte importante da nosa memoria individual e colectiva, as historias que non están nos libros pero que son tan importantes para nós como rosaleiros e rosaleiras”, sinala a rexedora.
 

A Praza do Calvario énchese de ‘saborEarte’
O Rosal, 28 de xuño de 2021.- A Praza do Calvario énchese dende hoxe mesmo de ‘saborEarte’. Do 28 de xullo ao 6 de xuño os rosaleiros e rosaleiras poderán desfrutar desta exposición fotográfica de Adolfo Enríquez coa gastronomía do Camiño Portugués da Costa como fío condutor. A mostra recolle 23 imaxes obtidas no transcurso dun proxecto que se centrou en presentar a gastronomía local como recurso de alto valor para a promoción turística a través de mostras de cociña nas que os produtos de proximidade de cada un dos cinco destinos escollidos foron os grandes protagonistas.
Con esta exposición o público terá a oportunidade de coñecer non só os pratos rematados, senón tamén algunhas instantáneas das xornadas gastronómicas do proxecto que, debido á situación sanitaria, tiveron que celebrarse con aforo pechado e convite previo.
Os eventos que conforman agora a mostra ‘saborEarte’ arrancaba o pasado mes de abril no Rosal, primeiro concello en acoller esta exposición fotográfica itinerante que percorrerá municipios como Soutomaior, Portas, Pontecesures, Padrón e Santiago.
Dende o Concello anímase a toda a veciñanza a desfrutar desta nova actividade cultural, que ten por obxectivo redundar no valor promocional da fotografía gastronómica tanto a través das imaxes seleccionadas para a exposición como doutras realizadas durante os eventos de ‘saborEarte’. Todas as imaxes estarán a disposición de todas as persoas na web de SaborEarte no Camiño para a súa descarga e libre utilización.
 
Fusión de bailes este verán para a mocidade rosaleira
O Rosal, 28 de xuño de 2021.- Ao abeiro da programación de lecer destinada á mocidade rosaleira, o Concello pon en marcha este verán un obradoiro monográfico de baile moderno no que os rapaces e rapazas maiores de 12 anos mergullaranse en distintos tipos de danzas. Neste taller, os mozos e mozas participantes coñecerán máis de preto a fusión de bailes urbanos como o funky, o hip-hop, o gym-jazz ou o street dance con outros como o ballet clásico, a danza ou o jazz que comezou a desenvolverse nos anos 70.
O obradoiro celebrarase os luns 19 de xullo e 2, 9 e 16 de agosto en horario de 10.00 a 12.00 horas. As persoas interesadas en participar deberán facer a inscrición previa a través da páxina web do Concello. O prezo do curso será de 18 euros por persoa e o prazo de inscrición remata o vindeiro 12 de xullo.
No caso de non cubrirse o mínimo de prazas para poder desenvolver o obradoiro, dende o Concello enviarase un correo electrónico a cada participante para que proceda a facer o ingreso do prezo do curso e garantir e formalizar a praza.
Con este tipo de actividades o Concello busca favorecer unha programación de lecer o máis variada posible para este verán na que se fomente a participación de toda a mocidade rosaleira.
 

Regreso al contenido