Baixo Miño - galiciasuroeste

Title
Vaya al Contenido

Baixo Miño

COMARCA
‘FAMTRIP’ polo territorio  do Miño para convertelo nun  ‘destino TOP’ de natureza e patrimonio  
Baixo Miño, 1 de xuño de 2021. Conseguir que o Río Miño sexa coñecido como un ‘destino TOP’ de natureza e patrimonio entre as persoas viaxeiras  é o obxectivo da ‘famtrip’ organizada polo AECT Río Miño e na que durante esta semana participarán representantes de maioristas, axencias de viaxes, ‘influencers’ e bloggers especializadas na promoción turística.
A ‘famtrip’, explica o vicedirector do AECT Uxío Benítez, pretende familiarizar e atraer aos operadores turísticos achegándoos a cada rincón do territorio miñoto para que vivan a experiencia de coñecelo como persoas viaxeiras, en primeira persoa, e despois poidan ofrecelo a persoas que buscan experiencias coincidentes.
A presentación do Miño transfronteirizo a ‘influencers’ organizada polo AECT durará toda a semana. No día de hoxe as actividades estiveron dirixidas a un grupo de xornalistas, influencers e bloggers moi activos e dunha grande experiencia tanto en medios estatais como internacionais. É o caso de Alberto Ribas, coñecido como ‘Alvientooo’, finalista en diferentes premios estatais de influencers de turismo; Daniel Keral, responsable de ‘Un viaje creativo’,unha web que recibiu o Premio Internacional de Comunicación Turística en 2017 como mellor blog de revelación de viaxes; Eva Abal, encargada de ‘Una idea de viaje’ e colaboradora de diferentes revistas e na páxina ‘Hostelworld’; ou os representantes do suplemento de viaxes Fugas do Diario Público de Portugal.
A xornada foi do máis intensa e comezou cunha visita á Bienal de Vilanova de Cerveira, para despois realizar un paseo en barco eléctrico polo río Miño observando a fortaleza de Goián e o Castelo de Cerveira, coñecer a historia da zona arraiana, así como a flora e fauna que existe no río, e presentando a rede de 400 quilómetros de sendeiros verdes.
Despois continuou por unha visita guiada aos Muíños do Folón e Picón no Rosal, onde tamén se fixo fincapé no patrimonio inmaterial; visitouse a adega e viñedos de Terras Gauda cun aperitivo de produtos locais para dar a coñecer a gastronomía da zona; subiuse ao Monte Santa Trega cun guía oficial; visitáronse ás redeiras de Atalaia en A Guarda que traballan para dignificar e regularizar o seu oficio; e, finalmente, fíxose un traxecto pola ecovía de Camiña en bicicleta ata a praia e unha cea no coñecido restaurante da ‘Casa das Velhas’.
No día de mañá comezará o ‘famtrip’ para as operadoras maioristas e axencias de viaxes, das que hai representacións de Andalucía, Cataluña, Lisboa e Porto, Braga, Galiza e incluso algunhas de ámbito internacional que nestes momentos de COVID-19 buscan redeseñar a súa oferta cara o mercado de destinos de proximidade. Entre elas hai especialización en produtos non masificados, de calidade e a medida, alternativos, con aloxamentos especiais, ou de viaxes de natureza, e dirixidos a públicos de mercado europeo, principalmente Francia, Alemania, Suíza, Holanda, Bélxica ou Austria.
Neste caso, as visitas prolongaranse entre o mércores e o venres, incluíndo tamén algunhas recepcións institucionais nos concellos da zona e percorridos polos municipios anteriores e tamén por Valença, Tui, Arbo, Monçao.
O ‘famtrip’ está organizado polo AECT Rio Minho como un fito de promoción do destino e a marca Rio Minho co obxectivo de desenvolver o produto turístico transfronteirizo baseado no patrimonio natural e cultural dentro do proxecto de preservación e valorización do territorio ‘Visit Rio Minho’, que baixo o lema ‘Un río, dous países, grandes experiencias’, está financiado ao 75% polo Fondo Europeo de Desenvolvemento Rexional (FEDER) a través do programa Interreg V-A España-Portugal (POCTEP) 2014-2020.
 

O río Miño: un destino con grande potencialidade por desenvolver
Baixo Miño, 3 de xuño de 2021. Os operadores de viaxes especializados en turismo que estes días están a coñecer o territorio do Miño están a descubrir un destino cunha grande potencialidade  por desenvolver. Así o deixaron ver na recepción institucional que contou co vicedirector do AECT Río Miño, Uxío Benítez.
Na xornada de hoxe o seu percorrido polo territorio comezou en Valença, onde a ponte internacional, para despois pasar a Tui, facer rafting en Arbo, comer na adega Señorío de Rubiós, gozar das ecopistas de Monçao, visitar a adega de Soalheiro, e visitar a Caixa dos brinquedos. Mañá continuarán por Cerveira e o Rosal logo de no día de onte ter unha axenda apretada na que repetiron as actividades realizadas polo grupo de ‘influencers’ e bloggers o pasado martes.
Na recepción institucional, Benítez explicoulles a representantes das axencias e maioristas o proxecto Visit Río Miño e o desenvolvemento da marca Río Miño que está a divulgar o AECT baixo os lemas ‘dous países un destino’ e ‘dous países, un destino, grandes experiencias’. Subliñou que se pretende facer un traballo estratéxico de construír no territorio un destino sobre o río  “que xera identidade, paisaxe e natureza propias”.
“Os turismos de natureza, máis seguros e menos desenvueltos teñen moito futuro”, apuntou Benítez, amosándose claramente dacordo coas e cos representantes das axencias e operadores, que manifestaron o seu interese por redeseñar a súa oferta cara o mercado de destinos de proximidade. Estes destacaron, de feito, a súa necesaria especialización en produtos non masificados, de calidade e a medida, alternativos, con aloxamentos especiais, ou de viaxes de natureza, e subliñaron o interese de públicos europeos en destinos como o do Miño.
Ante os comentarios das persoas participantes no ‘famtrip’ –explicou Benítez- o AECT seguirá a afondar na súa estratexia de promocionar o territorio e a marca transfronteiriza por, ademais, estar situado nunha ubicación estratéxica entre Vigo e Porto.
A presentación do Miño transfronteirizo a ‘influencers’ e operadores organizada polo AECT vai durar toda a semana. Nos primeiros días as actividades estiveron dirixidas a un grupo de xornalistas, influencers e bloggers moi activos e dunha grande experiencia tanto en medios estatais como internacionais: Alberto Ribas, coñecido como ‘Alvientooo’, finalista en diferentes premios estatais de ‘influencers de turismo; Daniel Keral, responsable de ‘Un viaje creativo’,unha web que recibiu o Premio Internacional de Comunicación Turística en 2017 como mellor blog de revelación de viaxes; Eva Abal, encargada de ‘Una idea de viaje’ e colaboradora de diferentes revistas e na páxina ‘Hostelworld’; ou os representantes do suplemento de viaxes Fugas do Diario Público de Portugal. Dende onte e ata venres o percorrido está dirixido a axencias e multinacionais organizadoras de paquetes de viaxes.
O ‘famtrip’ está organizado polo AECT Rio Minho como un fito de promoción do destino e a marca Rio Minho co obxectivo de desenvolver o produto turístico transfronteirizo baseado no patrimonio natural e cultural dentro do proxecto de preservación e valorización do territorio ‘Visit Rio Minho’, que baixo o lema ‘Un río, dous países, grandes experiencias’, está financiado ao 75% polo Fondo Europeo de Desenvolvemento Rexional (FEDER) a través do programa Interreg V-A España-Portugal (POCTEP) 2014-2020.
 

O Río Miño, elixido como un dos dez destinos turísticos de Portugal favoritos dos lectores de ‘The Guardian’
Baixo Miño, 10 de xuño de 2021. O Río Miño e a súa contorna vén de ser elixido na edición internacional do xornal The Guardian como un dos dez mellores destinos turísticos dentro de Portugal polas características dos seus espazos naturais, os deportes de aventura, sendas e ecovías, zonas de campismo, as súas augas termais e a súa gastronomía.  
Así o reflexaron as e os lectores da publicación británica nun listado dos ‘top 10’ destinos do país veciño. Esta selección feita polo público potencial do territorio miñoto debe abrir os ollos, segundo o vicedirector do AECT Río Miño Uxío Benítez,  a todos os concellos do territorio transfronteirizo, tanto galegos coma portugueses, para ver as potencialidades de ollar turisticamente cara o río, crear un destino internacional conxunto e aproveitar os recursos dunha e doutra beira de maneira conxunta. “O río Miño é un recurso conxunto. Temos que ver a oportunidade que temos diante para atraer turismo a unha zona común que é atractiva pola súa singularidade natural. É fundamental apostar pola marca conxunta Rio Minho”, subliñou.
Para Benítez hai que poñer en valor a complemetariedade entre ambas beiras, lembrando todas as actividades dispoñibles e que se están a desenvolver nos concellos de A Guarda, O Rosal, Tomiño, Tui, Salvaterra, As Neves, Arbo, Crecente, Caminha, Cerveira, Valença, Monçao e Melgaço.
Benítez destacou que é preciso posicionarse globalmente como un destino turístico transfronteirizo natural de calidade dentro dun mercado internacional no que, tal e como mencionaron a semana pasada as persoas participantes no famtrip que pretendía dar a coñecer o territorio como destino turístico – entre operadores e axencias de viaxes-, o público está a buscar experiencias singulares, exclusivas e naturais en contenxtos non masificados.
O nacionalista lembra que o AECT está a traballar no desenvolvemento da marca Río Miño baixo os lemas ‘dous países un destino’ e ‘dous países, un destino, grandes experiencias’. Subliñou que se trata dun traballo estratéxico no que se afondará de maneira prioritaria nos vindeiros anos buscando fórmulas de financiamento tanto a nivel europeo, estatal, autonómico como por medio doutras vías.
 

O AECT Rio Miño formará un grupo de traballo estable con ‘entidades espello’ dos ríos Uruguai, Rin e Danubio para intercambiar experiencias
Baixo Miño, 21 de xuño de 2021. O Agrupamento Europeo de Cooperación Territorial AECT Río Miño vai formar parte dunha rede estable de traballo e intercambio de experiencias xunto a entidades transfronteirizas similares de concas de grandes ríos europeos e latinoamericanos. Así se concretou esta tarde no seminario  ‘Intercambio de experiencias: UE e Conca do Río Uruguai’ organizado pola Asociación de Rexións Fronteirizas Europeas (ARFE) e o Comité para o Desenvolvemento da Conca do Río Uruguay, no que estiveron presentes de maneira telemática ademais do deputado e vicedirector do AECT Uxío Benítez, representantes de organismos do Río Uruguai, o río Rin e o Danubio.
O obxectivo do encontro, segundo explica Benítez, é estreitar lazos entre as ‘institucións espello’ das concas dos mencionados ríos, e dar un primeiro paso de cara a unha vindeira visita de estudo –con data aínda por determinar- que as e os integrantes dos agrupamentos transfronteirizos realizarán ao territorio miñoto para coñecer ‘in situ’ a gobernanza transfronteiriza que está a desenvolver o AECT Río Miño.
A decisión de crear unha rede de agrupamentos ‘eurolatinoamericanas’ de cooperación estable, que manteña reunións periódicas, tomouse debido ás similitudes que teñen as organizacións que xestionan recursos nas concas, con estruturas formadas principalmente por municipalidades. Considérase  que todas elas poden achegar e intercambiar fórmulas e solucións a problemas que se dan nos territorios transfronteirizos de maneira repetida.
No seminario de hoxe, o deputado Uxío Benítez participou nunha mesa sobre ‘Gobernanza e Cohesión Social Transfronteriza’. Destacou que o Agrupamento Europeo de Cooperación Territorial do Miño ten unha curta vida –naceu en 2018-, “mais xa está a ser referente institucional claro na defensa e xestión do territorio miñoto”.
ubliñou que foi a institución que se puxo á fronte das necesidades dos concellos ribeiráns en momentos chave como o peche de fronteiras entre España e Portugal por mor da COVID, reclamando a súa apertura. Tamén lembrou que está a traballar –entre outros obxectivos- para acadar unha unidade de criterios da Xunta e o goberno portugués á hora de aplicar a normativa europea no espazo ‘Rede Natura 2000’ do Miño, iniciativa para a que obtivo financiamento europeo.
O nacionalista destacou que o AECT supón un modelo de xestión administrativa, “un instrumento privilexiado de cooperación”, que coñece de primeira man e de maneira local as necesidades dun territorio común a pesares de estar dividido administrativamente entre os estados español e portugués.
Segundo explicou o deputado Benítez, o AECT Rio Miño, ademais, é un medio xurídico que permite optar e xestionar fondos europeos de xeito áxil, promover e organizar accións de cooperación do territorio de forma directa, así como servir de foro estable sobre o río Miño. Subliñou, así mesmo, que consta dunha estratexia de actuación coa vista posta no 2030.
 

Especialistas da Universidade de Arizona poñen o Aect Rio Miño como exemplo de como defender un territorio transfronteirizo pola súa xestión no peche da fronteira pola covid
Baixo Miño, 25 de xuño de 2021. O profesor de Estudos Transfronteirizos da Universidade de Arizona Francisco Lara-Valencia cualificou o AECT Río Miño como un exemplo de como se deben defender os territorios transfronteirizos a nivel global. Fíxoo na mesa redonda ‘O impacto da COVID-19 na fronteira España-Portugal’ celebrada onte dentro do proxecto ‘A reconfiguración das fronteiras no século XXI’, organizada polo Colegio da Frontera Norte de México con emisión online para todo o Pacífico, América central e España.
Na xornada púxose sobre a mesa como a COVID pechou de maneira moi diferente as fronteiras de maneira global en todos os continentes, así como as particularidades en diferentes países, en concreto entre España e Portugal, pero tamén entre Estados Unidos, Canadá, México ou outros estados sudamericanos.
O exemplo do acontecido no Río Miño centrou boa parte dos discursos dos participantes -moderados polo coordinador do Observatorio de Gobernanza G3 da Universidade de Vigo Enrique Varela Álvarez-: o deputado e vicedirector do AECT Río Miño Uxío Benítez; o secretario xeral da Rede Ibérica de Entidades Transfronteirizas Pablo Rivera Búa; o catedrático de Xeografía Política da Complutense de Madrid Heriberto Cairo; e o profesor da Escola de Estudos Transfronteirizos e integrante da Universidade de Arizona, Francisco Lara Valencia.
Este especialista subliñou que a probabilidade de peche total das fronteiras en estados e rexións é moito maior cando non existen antecedentes de cooperación transfronteiriza, polo que subliñou que a existencia de estruturas de gobernanza local e a actividade de organismos como o da AECT Rio Miño  “son esenciais na xeración de esquemas innovativos para a xestión dos retos que xera, por exemplo, a propagación da COVID”.
Subliñou, de feito, que cando organismos como o AECT non están presentes “simplemente non hai concertación e a acción dos gobernos centrais é moito máis prominente na xestión fronteiriza”, poñendo de manifesto que o peche da fronteira no Río Miño, a pesares de ter sido moi daniño para o territorio miñoto, podería aínda ter causado máis consecuencias negativas de non contar cunha institución directa que defendera os intereses da zona.
Tamén o secretario xeral da Rede Ibérica de Entidades Transfronteirizas, Pablo Rivera, centrou a súa participación no seminario no acontecido na ‘raia’ do Miño. Subliñou que a zona viviu 174 días de fronteira pechada, “un dato que sobrecolle porque foi moi difícil explicar á poboación que os gobernos estatais non tivesen un protocolo de actuación para cidades xemelgas que viven de fronte e traballan conxuntamente” a pesares de estar en países diferentes.
Subliñou que nesta situación o AECT Rio Miño colleu as rendas das reivindicacións xuntando a todos os concellos e cámaras de ámbalas beiras da raia, mais que a consecuencia final foi que “a confianza entre as xentes galegas e portuguesas se viu deteriorada” pola acción dos seus gobernos centrais.
Pola súa parte, o vicedirector do AECT Río Miño fixo un percorrido por todo o acontecido na pandemia, as protestas e reivindicacións conxuntas dos 16 municipios que conforman o agrupamento europeo a pesares das moi diferentes cores políticas. Lembrou que a día de hoxe séguese a reclamar a posta en marcha dunha tarxeta transfronteiriza, que se teñan en conta os gobernos locais na toma de decisións por ser os máis próximos ao territorio; así como que se implementen liñas de apoio específicas polo impacto dobre que tivo a COVID nos territorios de fronteira, así como medidas urxentes de dinamización.
“As fronteiras son unha invención humana, unha barreira absurda e intanxible nun mundo global como o actual, nunha era como a dixital na que non se poden poñer barreiras. Hai que fortalecer as alianzas e apostar polas fronteiras dende as administracións como áreas de desenvolvemento, de creación e non de división marcando distancias artificiais”, subliñou.
 

A Xunta somete a información pública a reformulación do proxecto de trazado do desdobramento da estrada PO-552 na recta de Figueiró, no concello de Tomiño
Baixo Miño, 28 de xuño de 2021. A Xunta de Galicia publicou Diario Oficial de Galicia (DOG) o anuncio polo que se somete a información pública a reformulación do proxecto de trazado do desdobramento da PO-552 na recta de Figueiró, no concello de Tomiño.
Trátase do novo proxecto de trazado de adaptación dos camiños de servizo previsto na reformulación do proxecto para converter nunha autovía urbana o treito de 2,1 quilómetros da actual estrada autonómica PO-552 entre a glorieta de Goián –na que remata o treito da Vía de Altas Prestacións entre Tui e A Guarda actualmente en servizo- e o acceso ao núcleo de Estás.
O DOG, simultaneamente ao novo trámite de información pública, recolle a efectos expropiatorios a relación de predios necesarios para executar o primeiro subtreito no que se dividiu o treito central da vía de altas prestacións, que suporá un investimento autonómico de preto de 12 millóns de euros. A execución da nova vía fai precisa a expropiación definitiva de 152 predios e a temporal de 64.
Antecedentes
Cómpre lembrar que durante a fase de información pública do referido proxecto, o Concello de Tomiño solicitou que os camiños de servizo da vía de altas prestacións previstos no documento se executasen máis lonxe do tronco da vía, coa finalidade de facilitar a mobilidade municipal. Deste xeito, os camiños de servizo deixan de ter unha función exclusiva de elementos funcionais da estrada para serviren tamén a mobilidade dos núcleos próximos.
Dado que o cambio solicitado foi aceptado e supón unha modificación da afección territorial, é necesario adaptar o documento redactado e sometelo a unha nova información pública. Todos os interesados nesta actuación poderán formular as súas achegas durante un período de 30 días hábiles, contados a partir de mañá. No seguinte enlace ao DOG pódese ampliar a información relativa a este anuncio: https://xurl.es/uebr0
 
A Xunta apoia con 200.000€ a contratación de 14 desempregados para a prevención de incendios en 11 concellos do Baixo Miño, Condado e a Paradanta
Baixo Miño, 28 de xuño de 2021.- A Xunta de Galicia, a través da Consellería de Emprego e Igualdade, vén de resolver a convocatoria de axudas deste ano do programa Aprol Rural para apoiar nos concellos galegos a contratación de persoas desempregadas para a realización de servizos municipais, principalmente os destinados ás medidas de prevención de lumes forestais.
Deste xeito, nas comarcas do Baixo Miño, Condado e A Paradanta beneficiaranse 11 concellos, que recibirán unha achega global de case 200.000 euros para a contratación de 14 persoas desempregadas. En toda a comunidade vaise posibilitar, ao abeiro deste programa, a incorporación de 505 persoas sen traballo para o desenvolvemento destas tarefas en 284 municipios grazas a un investimento de 7 millóns de euros.
No que se refire á distribución das axudas na comarca do Baixo Miño, os concellos de Tomiño e O Rosal disporán de 16.500 euros cada un para a contratación dun traballador; A Guarda terá 16.206 euros para un novo empregado; mentres que Oia e Tui recibirán 13.750 euros tamén para unha contratación.
Pola súa banda, nas bisbarras do Condado e A Paradanta, A Cañiza, Mondariz e Arbo contarán con 27.500 euros, respectivamente, para dúas contratacións e Covelo, As Neves e Mondariz-Balneario disporán de 13.750 euros para unha incorporación.
As persoas contratadas realizarán tarefas relacionadas, maioritariamente, coa prevención de lumes nas faixas secundarias definidas pola Lei de prevención e defensa contra os incendios forestais de Galicia. Na baremación da orde de axudas deuse preferencia aos concellos fusionados e emprendedores.
O obxectivo desta iniciativa, ademais de contribuír ás accións municipais de loita contra os lumes forestais na época de alto risco, é incrementar e mellorar as oportunidades laborais do rural de Galicia dando un impulso ao traballo nas zonas menos poboadas da Comunidade Autónoma e favorecer a creación de emprego de calidade mediante a contratación de persoas desempregadas. Por elo, os contratos terán unha duración de nove meses e serán a tempo completo.
 
A Xunta inviste 54.000€ en apoiar a contratación de 17 socorristas en sete concellos das bisbarras do Baixo Miño, Condado e a Paradanta
Baixo Miño, 28 de xuño de 2021.- A Xunta de Galicia vén de resolver a convocatoria de axudas destinadas aos concellos galegos para apoiar a contratación de servizos de interese xeral e social que sexan de competencia municipal. Ao abeiro desta orde, a Consellería de Emprego e Igualdade vai outorgar máis de 54.000 euros para a contratación de 17 socorristas en sete concellos das bisbarras do Baixo Miño, Condado e A Paradanta.
Por este motivo, o delegado territorial da Xunta en Pontevedra, Luis López, achegouse a primeira hora desta mañá ata a Praia da Cabeceira, no Concello de Poio, para informar desta resolución de achegas para toda a provincia xunto ao alcalde, Luciano Sobral.
"Trátase dun apoio fundamental para os concellos que, en moitos casos, terían dificultades para financiar este servizo se non fora pola colaboración da Xunta de Galicia malia que se trata dunha competencia municipal. En todo caso, cremos que é unha cuestión importante, tanto por seguridade como polas necesarias condicións destes espazos turísticos e por suposto nos poñemos, coma sempre, ao lado dos municipios", manifestou o representante autonómico.
En toda Galicia, a Consellería de Emprego e Igualdade destina este ano 1,5 millóns de euros a esta orde de axudas, que beneficia a 163 concellos galegos e permite a contratación de 464 persoas desempregadas e coa capacitación para este servizo de vixilancia de espazos acuáticos.
Esta iniciativa, ademais de apoiar aos concellos na contratación deste persoal, tamén serve para mellorar a formación, experiencia e empregabilidade de persoas desempregadas e engádese a outros programas con este fin promovidos pola consellería, como os obradoiros de emprego, dotados con 30,2 millóns de euros e que benefician a 1.500 persoas; as axudas para a contratación de orientadores laborais, con 280 participantes e 6,8 millóns de euros de orzamento; ou os programas integrados de emprego, que pretenden impulsar a contratación de 3.300 persoas grazas a un investimento de 8,4 millóns de euros neste ano.
A distribución destas achegas para o financiamento do persoal no servizo de socorrismo estival nas comarcas do Baixo Miño, Condado e A Paradanta é a seguinte:
         
O AECT Rio Miño reúne mañá a altos cargos de cooperación ibérica en España e Portugal para debater sobre os retos da fronteira
Baixo Miño, 28 de xuño de 2021. O AECT Río Miño, xunto ao Goberno portugués, reunirá mañá en Vila Nova de Cerveira a altos cargos de ambos estados relacionados coa cooperación ibérica e coa xestións dos fondos europeos -ademais das máximas autoridades galegas e da rexión Norte de Portugal- co fin de abordar os retos da fronteira para os vindeiros anos.
A xornada está plantexada como un ‘Encontro de Cooperación Transfronteiriza’ no que haberá unha primeira parte de partilla de experiencias e boas prácticas e unha segunda na que se debaterá sobre os desafíos futuros. Entre outros, un  dos aspectos que se pretende tratar é o impulso que deben recibir os territorios raianos, entre eles o territorio miñoto, logo das consecuencias negativas do peche das fronteiras a causa da crise sanitaria da COVID-19.
O encontro plantéxase nun momento crucial no que o AECT Río Miño está inmerso na captación de fondos europeos para a rexeneración da actividade socioeconómica da zona do Miño, gravemente golpeada durante o último ano e medio. Na reivindicación do agrupamento está o destino de fondos específicos para a área debido tanto ás perdas de empresas como de persoas traballadoras, así como que os fondos destinados á rexeneración das fronteiras se invistan realmente nos territorios transfronteirizos en lugar de deturparse noutras rexións.
Na sesión de apertura tomarán a palabra o secretario de Estado de Política Territorial e Función Pública (España), Víctor Francos; o  director do AECT Rio Minho, João Fernando Brito Nogueira; o embaixador de Portugal en España, João Mira-Gomes; a  embaixadora de España en Portugal, Marta Betanzos Roig; e a secretária de Estado da Valorização do Interior (Portugal), Isabel Ferreira.
A parte de ‘Desafíos futuros’ será moderada polo integrante do Grupo de Trabalho da Estratégia Comum de Desenvolvimento Transfronteiriço (ECDT) da Universidade do Porto, José Alberto Rio Fernandes. Este dará paso á conferencia sobre a ‘Estratexia Común de Desenvolvemento Transfronteiriço (ECDT)’, impartida polo secretario Xeral de Reto Demográfico (España), Francesc Boya Alós, ao que seguirán  o presidente do Conselho Diretivo da Agência para o Desenvolvimento e Coesão, IP (Portugal), Nuno Oliveira dos Santos e a secretaria Xeral de Fondos Europeos (España), Mercedes Caballero Fernandez, que falarán sobre ‘A importancia dos próximos programas de cooperación territorial transfronteiriza’. Tamén participarán, achegando as ‘Visións rexionais’ o director xeral de Relacións Exteriores e coa Unión Europea da Xunta de Galicia, Jesús Gamallo Aller e o vice-Presidente da Comissão de Coordenação e Desenvolvimento Regional do Norte, Beraldino Pinto.
Na parte de intercambio de experiencias, na que exercerá de  moderador o integrante do Grupo de Trabalho da Estratégia Comum de Desenvolvimento Transfronteiriço (ECDT) da Universidade de Aveiro, Miguel Viegas, o vicedirector do AECT Rio Minho, Uxío Benítez, exporá o traballo realizado coa marca turística ‘Rio Minho’.
Participarán tamén expoñendo o ‘Programa IACOBUS’ o responsable do AECT Galiza- Norte de Portugal, Xosé Lago; falará sobre ‘TUT - Transporte Urbano Transfronteirizo’ o integrantes da Eurocidade Chaves- Verín, Nuno Vaz; abordará o ‘Territorio Museo’, o integrante da Eurocidade do Guadiana, Luís Romão; exporá o proxecto ‘Zasnet - Meseta Ibérica’ Hernâni Dias, do AECT Zasnet; falará sobre o ‘Cluster da Educación da Cencyl’ Cristina Oliveira, da Comunidade de Trabalho Rexión Centro de Portugal - Castela e León; abordarase o ‘Proxecto AGROPOL’ da Comunidade de Traballo da Eurorrexión Alentejo-Centro-Extremadura, a cargo de Teresa Jorge e Clara Lourenço; e finalmente falarase sobre ‘Turismo Activo e os eixos fluviais: exemplo de Douro-Duero’ con representante da AIMRD - Associação Ibérica de Municípios Ribeirinhos do Douro, Jesús Rivas Rojo.
Oencontro terá lugar en formato mixto no Cineteatro Marreca Gonçalves, en Vila Nova de Cerveira mañá martes 29 de xuño. Comezará ás 10.30 (hora galega) e pódese seguir de maneira telemática na canle de Youtube do AECT Río Miño.
 

Regreso al contenido