PORTADA

NOTICIAS  

A GUARDA

TUI

O ROSAL

OIA

TOMIÑO

BAIXO MIÑO

LOCAL

OUTRAS NOVAS

DEPORTE

AXENDA

NECROLÓXICAS

ENTREVISTAS

COMUNICADOS

PORTUGAL

HEMEROTECA

PÁXINAS

 REPORTAXES

CONCELLO DA GUARDA

RÚAS DA GUARDA

VARIA

FOTOSAYER

FOTOS LECTORES

PATRIMONIO arquivo e documentación

XENTES de Ribadavila

Calendario

ENLACES

 
 
 

 

 

 

 

POÑA AQUÍ A SÚA PUBLICIDADE

AS 24 HORAS Ó DIA

OS 365 DÍAS DO ANO

 

galiciasuroeste     

                         Tomiño    

Xoves, 26 de abril de 2018  

Peche de rúas no núcleo de Tomiño

O vindeiro martes, 1 de maio, terá lugar, a I Carreira Día do Traballador, e Tomiño.
Con tal motivo, pecharanse ao tráfico algunhas rúas do núcleo urbano do Seixo de 8.00 a 14.00 horas.

A carreira arrincará ás 10.30h.

 

Trescentos escolares de educación infantil, primaria e secundaria, asisten ás actividades extraescolares financiadas polo Concello

Un ano máis, o Concello de Tomiño financiou un programa de actividades extraescolares ao longo de todo o curso, en distintos centros educativos do municipio.

A oferta formativa, é gratuíta para os estudantes, puideron escoller este curso entre inglés, multideporte, baile infantil, zhumba, linguaxe de signos e un obradoiro audiovisual.

As actividades ofertadas este curso escolléronse por nivel: para Infantil: baile infantil e “Imaxinacción”; para Primaria: multideporte, lingua de signos, inglés e “ImaxinAcción/Entre Pantallas”. Por último, para o IES: zhumba e inglés.

Nalgunhas actividades foi necesario facer varios grupos debido á cantidade de nenos que estaban apuntados, sumando un total superior aos 300 escolares.

O programa é unha iniciativa da Concellalía de Educación. Para a selección das actividades, tivéronse en conta diferentes criterios: as características de cada centro educativo, a acollida entre o alumnado (mínimo de 10 persoas), e a vontade de incentivar a empregabilidade e o emprendemento, polo que se contactou con profesionais da zona directamente, non con empresas).

ImaxinAcción é unha das actividades extraescolares que busca fomentar a creatividade dos nenos do CEIP Tebra, CEIP Antonio Fernández, e CRA Mestre Manuel Garcés.

Outra das actividades máis novidosas é a de Lingua de Signos, que pretende impartir técnicas instrumentais de comunicación entre as persoas xordas e as oíntes.

O programa de actividades esténdese entre os meses de outubro de 2017 e xuño de 2018, e representa un investimento que rolda os 15.000 euros.

A alcaldesa de Tomiño, Sandra Álvarez, tamén concelleira de Educación, explica que este programa tenta ofrecer accións formativas en igualdade, co propósito de que todo o alumnado poida asistir ás clases que elixa, sen que o custe das mesmas, sexa un impedimento para aprender e integrarse.

 

Mércores, 25 de abril de 2018  

O Xuvenil ‘A’ da AD Tomiño gaña a liga e ascende á liga galega

O paasado sábado, en torno ás 21:30, a AD Tomiño ao completo estalou de alegría: os Xuvenís ‘A’ culminaban a temporada gañando a liga no campo do seu máis próximo perseguidor e certificaban, a falta dunha xornada para rematar a competición, o seu ascenso directo a liga galega.

Un ascenso que algunhas voces do club non dubidan en cualificar de histórico. Fai soamente dúas temporadas, os Xuvenís da AD Tomiño ascendían á Primeira Autonómica; a pasada campaña, o equipo mantíñase na categoría e, no sprint final incluso insinuaba que estaba para máis cousas, e este ano, cedendo soamente dúas derrotas ata o momento,

proclámanse campións logrando o ascenso de forma directa.

Chegaban os rapaces adestrados por Merino e Bojan como líderes ao encontro decisivo pero, vista dende fora, a empresa no parecía sinxela: visitaban a un Gondomar FB que, tras nove vitorias consecutivas, convertérase nun rival temible que aspiraba ao título sen ningún tipo de reservas e que xa gañara no partido de ida na Carballa. Pero, dende dentro, o equipo tomiñés tíñao claro: eran os líderes e non ían deixar que lles arrebatasen a posición de honra. E así, o sábado nas Cercas, logo dunhas xornadas con algunhas dúbidas, os de vermello sacaron o seu arsenal de fútbol e fixéronse coas rendas do encontro dende os primeiros momentos para non soltalas ata certificar unha vitoria que os coroa como os mellores da súa liga.

Dende a AD Tomiño quere recalcarse que este gran logro para o fútbol base tomiñés é un éxito colectivo cuns protagonistas principais: os xogadores, que durante toda a tempada mostraron o compromiso imprescindible para as grandes vitorias e o corpo técnico que coa súa ambición e traballo diario lograron que o imaxinado fose real e que este equipo tivera cara de campión dende o primeiro día.

Pero o mérito tamén se reparte cos xogadores e adestradores que nos anos anteriores fixeron que os Xuvenís chegasen a esta tempada en disposición de ascender a Liga Galega; con todos os membros do corpo técnico que, seguindo unha mesma filosofía, foron formando aos rapaces que hoxe protagonizan o éxito; e cos membros do equipo directivo que facilitaron que o esforzo de todos se plasme onde é máis importante: no terreo de xogo.

Hoxe na AD Tomiño celébrase este gran ascenso e tamén, a gran temporada que de todos os equipos do club: os Cadetes están en disposición de disputar a fase de ascenso só unha temporada despois de chegar a primeira autonómica; os Infantis poden proclamarse campións e ascender a próxima xornada; e, en todo o fútbol 8 os resultados son bos pero máis o é a aprendizaxe de todos os xogadores e xogadoras que forman parte dun club que ségue crecendo ano a ano.

 

A Federación de Asociacións Veciñais Terra miño organiza o XI Encontro Cultural con actuacións e exposición de pintura

O vindeiro sábado, 28 de abril, a Federación de asociacións de veciños Terra Miño, organiza na Casa da Cultura de Tomiño, a partir das 17:00 horas, a decimoprimera edición do Encontro Cultural Anual.

Contará con sete actuacións de distintos grupos e coros promovidos polas propias asociacións integradas. Gaitas, baile tradicional, pandereteiras, coros e acordeóns conformasen a oferta cultural, á que hai que engadir unha exposición de pintura de distintos autores tomiñeses.

O presente certame conta coa colaboración do Concello de Tomiño e das Adegas Altos de Torona. Ao finalizar convidarase os asistentes á degustación dun viño producido no municipio.

A asistencia será libre e gratuíta ata completar aforamento. A Federación foi constituída no ano 2006 e actualmente está integrada por once asociacións veciñais e culturais: a Asociación “ O Arbol ” de Vilachán; a Asociación de Veciños de Amorín; a Asociación de Veciños de Barrantes; a Asociación de Veciños de Carregal; a Asociación Cultural “A Xanela”; a Asociación de Veciños de Currás; a Asociación de Veciños de Pinzás; a Asociación de Veciños de Sobrada; a Asociación de Veciños de Taborda; a Asociación Monte Tetón de Tebra; e a Asociación de Acordeonistas de Tomiño.

Entre os seus obxectivos está o promover e coordinar actividades e encontros culturais, fomentar a contorna e o patrimonio local e comarcal, organizar exposicións (escultura, pintura, etnografía), o intercambio de experiencias entre asociacións ou contribuír a poñer en valor das actividades organizadas polos veciños das distintas parroquias do municipio.

Programa

(Casa da Cultura de Tomiño – Sábado 28 de abril):

17:00 Horas Presentación

17:15 Horas Cantares de Tebra “Monte Tetón”

17:45 Horas Airiños novos de Pinzas

18:00 Horas Coro “ Orballo de Currás”

18:20 Horas Acordeonistas de Tomiño

18:40 Horas Pandereteiras de sobrada

19:00 Horas Pandereteiras do Aloia

19:20 Horas Cacharela de Taborda

 19:40 Degustación viño local

Exposición de Pintura: dende as 17:00 horas ás 20:00 horas.

 

Chega a Tomiño esta fin de semana o espectáculo de circo, teatro e humor xestual “Sen Remite”, premiado internacionalmente

Premiado polo xurado no Milano Clown Festival, chega o vindeiro domingo a Tomiño o espectáculo de circo, teatro e humor xestual “Sen Remite”, de Jean Philippe Kikolas.

Unha proposta para todo público, que acollerá o Auditorio de Goián, o vindeiro domingo (29 de abril) ás 18.00 horas, e na que se utilizan técnicas de circo, escaleira libre, malabares e un montón de solución para os conflitos que se van presentando.

As entradas Terán un coste de 3 euros para persoas adultas e será de balde para nenos, poranse á venda en taquilla, unha hora antes do comezo da función.

O espectáculo forma parte da Primavera Cultural 2018 organizada polo Concello de Tomiño.

 

Martes, 24 de abril de 2018  

Suspendida a visita da valedora do pobo a Tomiño

Por causas de forza maior, a valedora do pobo non poderá desprazarse o próximo mércores 25 de abril a Tomiño, tal e como estaba previsto.

Nos próximos días confirmarase deste a institución da Valedora a nova data para organizar a xornada de encontro co Concello e coa cidadanía.

 

O Consello da Infancia e Adolescencia de Tomiño prepara unha curta sobre o trato desigual que reciben nenos e nenas na sociedade actual

O Consello da Infancia e Adolescencia de Tomiño prepara estes días unha curta que presentará no vindeiro mes de maio, no marco do 5º Encontro de Concellos (a nivel estatal) en Oviedo.

Trátase dun traballo audiovisual, duns 5 minutos de duración, sobre o trato desigual que reciben nenos e nenas no eido da educación e da sociedade en xeral. Estrela é a protagonista da cinta; unha moza que vai reflexionando sobre a forma que lle tratan ou as tarefas que lle asignan na súa casa, no instituto, na rúa; no que se agarda dela, nas maneiras nas que lle falan os demais...e decide posicionarse.

Constituído por nenos de Primaria e Secundaria, o Consello da Infancia e Adolescencia de Tomiño, ten coma presidenta a Sofía Areal, alumna do IES Antón Alonso Ríos e leva funcionando dende o 15 de decembro do pasado ano. Este colectivo, promovido polo Concello de Tomiño, é un dos requisitos para conseguir o selo de Cidade Amiga da Infancia concedido por Unicef. Na actualidade está formado por 22 persoas, de entre 11 e 17 anos. O nome escollido é “Voces Novas” xa que queren converterse nunha ferramenta para facer que se escoiten as súas voces, opinións e ideas, e están a traballar nesta liña, participando na vida municipal. De feito están a perfilar unha moción que presentarán ao próximo pleno ordinario, pedindo o seu recoñecemento oficial.

Dende a súa formación os compoñentes redactaron xa varias propostas de traballo, algunhas delas relacionadas coa organización de charlas sobre diferentes temáticas, obradoiros e actividades culturais e lúdicas relacionadas cos intereses da infancia e da adolescencia tomiñesa. “Aínda que seguimos na fase de asentamento, regulamento interno, busca de diferentes liñas de traballo, etc;  xa saíron varias propostas moi interesantes, como charlas sobre educación sexual ou unha curtametraxe sobre as desigualdades de xénero”, explica a presidenta do grupo.

As reunións son moi dinámicas e todos/as achegan o seu graniño de area, xa que teñen moita ilusión e expectativas neste proxecto. “Ata agora, reunímonos de forma periódica unha vez ao mes, pero vamos estipular unha serie de reunións co goberno municipal, para ter unha comunicación constante entre os dous órganos e ver que proxectos son viables e cales non”, comenta Sofía Areal.

O grupo segue aberto a novos membros que se animen a participar (vocesnovas.tomino@gmail.com ). “Dicir que eu son a presidenta e que teño moita ilusión depositada neste novo grupo, é necesario que exista a presenza da infancia e da mocidade no día a día dun Concello, creo que damos unha visión moi interesante das cousas, e é necesario que a sociedade actual traballe de forma conxunta coa que vai ser a sociedade do futuro, porque así creamos lazos e vínculos moito máis fortes que nos axudan a avanzar e a mellorar como colectivo”, explica a presidenta do Consello tomiñés.

 

2ª Competición da Liga Galega de Promoción de Slálom

Informa Rosa Fernández Carrera

Este domingo celebrouse nas augas do río Tea, no lugar de Cordeiro en Salvaterra a segunda competición da liga galega de Promoción de Slálom coa participación  dos máis pequenos dos clubs galegos. Algo máis de medio cento de pequenos padexeiros acudiron a cita. O Club Deportivo Miño acudiu ao evento con nove piragüistas, a maioría dos cales tiveron dobre participación ao baixar en kaiak e canoa. Os Teixugos remataron a xornada con oito podios.

En K1 Home Infantil  Sergio Rodriguez foi o gañador da proba, Alexis Segadaes subiu tamén ao podio co seu terceiro lugar,  Samuel Castro rematou quinto e Mateo Rivas undécimo.

En C1 Infantil o gañador foi Samuel Castro e o seu compañeiro Sergio foi segundo.

Na categoría Alevín masculino Adrián LLuch rematou sexto en kaiak e oitavo en canoa.

Os nosos representantes máis novos, Sergio Álvarez e Javier LLuch, remataron cuarto e quinto, respectivamente, na categoría benxamín masculina.

En categoría feminina os Teixugos solo contaron con participación na categoría Infantil, copando as dúas deportistas os podios de kaiak e canoa. En K1 Ainhoa Barreiro foi a gañadora e Alba Soutelo segunda, e en C1 a gañadora foi Alba, seguida por Ainhoa.

No resultado final por clubs o Deportivo Miño volveu gañar cun total de 196 puntos, compartindo podio co Penedo Importa de Caldelas con 149, e o Montaña Quixos de Monforte con 120.

A vindeira cita dos Teixugos co slálom será esta semana na Seu D´Urgell, onde Luís Fernández e Brais Castro en canoa e Manuel Ochoa en kaiak , intentarán superar os selectivos para formar parte do equipo español de slálom sénior e Sub-23.

 

Sábado, 21 de abril de 2018  

A Deputación recibe 18 ofertas de empresas construtoras que compiten por facer as obras da nova avenida-variante de Tomiño

 

A Deputación de Pontevedra vén de recibir 18 ofertas de empresas construtoras que compiten por facer as obras da nova avenida variante de Tomiño. O deputado de Mobilidade, Uxío Benítez, explicou que os técnicos provinciais están a valorar as propostas técnica e económicamente e que en breve se coñecerá a adxudicataria.

Entre as cuestións que se están a analizar está o programa e equipo de traballo para a obra (15 puntos), o plan de control de calidade (10 puntos), a memoria de traballo (15 puntos), e o plan de actuación ambientais (9 puntos). As empresas que acaden un mínimo de 25 puntos na parte anterior pasarán á valoración económica, onde o menor prezo ofertado obterá un máximo de 51 puntos.

Unha vez estudiados todos estes criterios realizarase unha proposta de adxudicación que deberá ser aprobada en Xunta de Goberno. A partir de aí formalizarase o contrato e presentarase a acta de replantexamento da obra. O prazo de execución dos traballos está fixado en doce meses de máximo polo que, se a tramitación administrativa non se complica e a climatoloxía o permite, a actuación estará finalizada na primavera de 2019.

A nova variante de Tomiño, denominada oficialmente como ‘Mellora da conexión entre a estrada provincial EP-3102 (Tomiño-Sabarís) e a estrada autonómica PO-344 ao seu paso polo núcleo urbano de Seixo (Tomiño)’, suporá a construción dunha nova estrada con tipoloxía de avenida que exercerá de rolda e permitirá a mellora da mobilidade peonil no núcleo urbano derivando o tráfico rodado que actualmente pasa polo núcleo da vila. Tamén servirá de conexión entre a vila e a vía de alta capacidade (VAC) Tui-A Guarda que contempla un acceso ao núcleo de Tomiño.

 

Tomiño celebra a 1ª Carreira Día do Traballador, con andaina e premios para varias categorías

Tomiño celebrará o luns, 1 de maio, a I Carreira Día do Traballador, na que xa hai apuntadas máis de 100 persoas, a partir dos 16 anos de idade.

A proba, organizada polo Tebra F.C., conta coa colaboración do Concello de Tomiño e do ximnasio Vip.

A saída será ás 10.30h dende a rúa Daniel Calzado, no Seixo. A meta, no mesmo lugar.

O prazo de inscrición remata o mércores, 25 de abril, ás 24.00h. As persoas interesadas poden apuntarse no Centro Deportivo Vip, de Tomiño, ou ben, na páxina web: www.championchipnorte.com

Haberá tres modalidades entre as que se poderá elixir á hora de inscribirse: carreira de 10 km, carreira de 5 km, ou ben, andaina (5 km).

Haberá premios para os mellores clasificados de Tomiño (feminino e masculino) e gañador/a absoluto. Tamén para as categorías Maiores de 55 anos; De 35 a 55 anos e De 16 a 35 anos.

A entrega de dorsais realizarase no ximnasio Vip, durante o sábado anterior á proba, e haberá que estar no lugar de saída dúas horas antes do comezo das probas.

Regulamento da Carreira

 

Venres, 20 de abril de 2018  

Douscentos estudantes de Primaria traballan a igualdade na aula, a través de varios obradoiros que tentan previr a violencia de xénero

O Concello de Tomiño continúa traballando no eido educativo para conseguir a sensibilización en temas de igualdade e a prevención da violencia de xénero entre nenos, nenas e adolescentes de todos os centros educativos.

A acción, organizada polo Programa Municipal de Igualdade, da Concellería de Benestar Social, enmárcase no programa de intervención nos centros educativos para a sensibilización en igualdade e prevención da violencia de xénero, convocado pola Área de Igualdade da Deputación de Pontevedra.

A alcaldesa de Tomiño, Sandra González, explica que o Concello continúa traballando nestas actividades, por entender que “a prevención é primordial para achegarnos á igualdade e á erradicación da súa consecuencia máis brutal, a  violencia de xénero,  especialmente entre a poboación máis nova, que é a que pode axudar a cambiar a visión destes temas no futuro”.

Despois do Contacontos pola Igualdade, no que participou o alumnado de Educación Infantil e 1º, 2º e 3º de Primaria, e a exposición “ Cartas de Amor” organizada a través da Secretaría Xeral de Igualdade no IES Antonio Alonso Ríos, desde o 3 de abril desenvólvense os Obradoiros “ Construíndo Igualdade. Previndo a Violencia de Xénero”, dirixido ao alumnado de 4º, 5º e 6º de Primaria, e que se estenderán ata ben entrado o mes de maio.

Estes Obradoiros teñen o obxectivo de facilitar ao alumnado un espazo para a reflexión e concienciación sobre as desigualdades socialmente establecidas entre mulleres e homes, o fomento de modelos sans de relacións de parella, identificando mitos como o do amor romántico , o sexismo en xoguetes, a música e a publicidade,  e os mecanismos que conforman o maltrato dentro da parella, coa finalidade de que os mozos detecten e traten de evitar relacións futuras baseadas no dominio e no control de outra persoa.

Trabállanse os conceptos sexo/xénero, os estereotipos impostos na socialización; os modelos desigualitarios de masculinidade e feminidade, baseados en prexuízos sexistas e os mitos e falsas crenzas sobre a violencia de xénero e as súas consecuencias.

A metodoloxía é dinámica e participativa (role-playing, vídeos, cancións, debates na aula, etc.) o que permite ao alumnado a resolución de supostos prácticos.

           Cada obradoiro consta de 5 sesións en grupos de 30 alumnos e alumnas, como máximo. Percorreranse todos os centros de Primaria do Concello, co que a participación ascende a máis de 200 estudantes de entre 9 e 12 anos.

Cada obradoiro é  impartido por 2 profesionais da Psicoloxía, con formación e experiencia en perspectiva de xénero, que traballan conxuntamente en cada sesión para promover a dinámica do grupo.

O Concello deseñou unha programación transversal con protagonismo feminino que arrancou hai un par de meses, con actividades organizadas pola Oficina de Igualdade para os centros escolares, como a mostra ‘Cartas de Amor’ no IES Antón Alonso Ríos.

 

Unha exposición mostra ao público os 24 proxectos do concurso internacional de ideas para a ponte peonil entre Tomiño e Cerveira

O Concurso internacional de ideas para a construción da nova ponte peonil entre os concellos de Tomiño e Vila Nova de Cerveira está a dar os seus últimos pasos cunha exposición para mostrar ao público os 24 proxectos admitidos ao certame, entre os que destacan as tres propostas finalistas: ‘Raia’, de Álvaro Siza e Jorge Amorim Nunes da Silva; ‘Caminho do rio’ de Javier Zubia e Paula Teles; e ‘Una línea sobre el Miño’ das sociedades Burgos & Garrido e Bernabeu Ingenieros.

Na inauguración da mostra, que estará no vestíbulo da Deputación de Pontevedra ata o 4 de maio, estiveron presentes a presidenta da Deputación, Carmela Silva, e o deputado de Cooperación Transfronteiriza, Uxío Benítez, acompañados pola alcaldesa de Tomiño, Sandra González, o vicepresidente de Cerveira, Víctor Costa e representantes das tres propostas gañadoras.

O deputado de Cooperación Transfronteiriza, Uxío Benítez, asegurou que dende a Deputación de Pontevedra hai unha gran satisfacción, “tanto a nivel político como técnico, ante o alto nivel e a diversidade de países que participaron neste concurso internacional”, polo que precisamente “cremos que era necesario non só visibilizar aos tres gañadores, que terán moitas opcións de ser visibles de agora en diante, senón a todos os proxectos admitidos”. Así mesmo, apuntou que esta exposición itinerante -que visitará proximamente os concellos de Tomiño e da Câmara de Vilanova de Cerveira- está a espertar grande interese, xa que institucións como o Colexio de Enxeñeiros de Camiños de Galicia teñen solicitado contar con ela.

Benítez lembrou que o concurso internacional de ideas está incluído dentro do proxecto europeo de cooperación transfronteiriza Visit Rio Minho, cofinanciado polo Interreg, que ten por obxectivo a posta en valor dos recursos endóxenos do río Miño. Destacou que o fin último desta ponte é  “crear un parque transfronteirizo, un espazo urbano único de xestión común entre os dous concellos, unha idea innovadora e diferente e así está sendo valorada por todos os estamento a todos os niveis, incluído europeo, como se está vendo polo apoio financieiro”.

Segundo explicou o deputado, agora comeza a segunda fase do concurso, consistente nun procedemento negociado para a contratación dun proxecto básico, “que se agarda que se resolva á altura do verán”, de xeito que o proxecto final poida estar listo este mesmo ano.  Benítez indicou que ao logo de 2019 “será necesario obter todas as autorizacións e informes sectoriais precisas e aí concluirá o proceso incluído dentro deste proxecto Visit Rio Minho financiado polo Interreg”. Advertiu de que “este será un proceso complexo, porque afecta a unha zona moi sensible e a dous países, e serán moitas as institucións que teñan que emitir informes.”

Por último, o nacionalista agradeceu ao xurado “por todo o traballo desenvolvido” e tamén quixo destacar “a moi interesante aportación do que foi o comité asesor”, formado por representantes de organismos sectoriais que máis adiante terán que ofrecer os seus informes, razón pola que se considerou que debían participar no proxecto dende o primeiro momento.

Pola súa banda, a alcaldesa de Tomiño, Sandra González,  dixo que nesta ocasión ía “falar menos dende o institucional e máis dende o corazón”, para “agraceder que nun momento no que a moda parece que é construír muros nós esteamos tendendo pontes”. González destacou que “este fermoso proxecto é un soño para que para Tomiño e Cerveira que queremos converter en realidade”, e admitiu que “vai levar tempo e dificultades” pero “que a pesar de levar tantos séculos separados por esa fronteira artificial” Tomiño e Cerveira sempre estiveron unidos e a ponte consolidará esa unión. González tamén destacou que “este quere ser un achegamento máis neste futuro europeo que desexamos xuntos e xuntas e sen fronteiras”.

Tamén o vicepresidente da Câmara de Cerveira, Víctor Costa, subliñou o “éxito desta iniciativa”, e adiantou que “o xurado vai ter moitas dificultades para escoller unha única proposta de entre as tres finalistas porque son todas brillantes”. Costas engadiu que “para nós é de capital importancia non só a unión con Tomiño, a quen a consideramos unha irmá, senón que este proxecto pretende ser un gran atractivo para o turismo da zona”.

Carmela Silva: “A ponte ten un obxectivo fermoso: unir dous países”

A presidenta da Deputación puxo en valor as grandes ideas, “todas elas de gran valor paisaxístico, medioambiental, arquitectónico, técnico e estético”, das 24 propostas presentadas ao concurso que “ten por obxectivo algo tan fermoso como é unir territorios, unir dous concellos de dous países distintos”.

Ademais, Carmela Silva destacou a importancia de que o proceso de construción da ponte entre Tomiño e Cerveira se teña realizado a través dun concurso de ideas “porque as administracións do século XXI, as administración modernas, xa non son aquelas que encargan un proxecto e o levan adiante, senón as que son capaces de escoitar á sociedade”.

Tamén aproveitou a presidenta provincial para reivindicar que as administración encargadas dos informes sectoriais para a posta en marcha da ponte sexan áxiles e rápidas. Do mesmo xeito, fixo un chamamento “aos gobernos de España e de Portugal para que acheguen recursos para poñer en marcha a ponte entre Tomiño e Cerveira e aproveitar así as grandes potencialidades que nos aporta o Río Miño”.

No acto estiveron presentes representantes das tres propostas finalistas que tiveron a oportunidade de comentar aos e as asistentes o concepto desenvolvido por cada unha das ideas así como achegar algúns dos apuntes técnicos que determinaron os deseños das propostas.

A creación da nova ponte internacional enmárcase dentro da acción Cualificación e promoción do parque transfronteirizo Castelinho-Fortaleza, do proxecto VISIT RIO MINHO, promovido conxuntamente pola Deputación de Pontevedra, a CIM Alto Minho, a Fundación CEER, o Centro Tecnolóxico do Mar, a Universidade de Vigo e os municipios do norte de Portugal.

VISIT RIO MINHO está cofinanciado ao 75 % por fondos FEDER da UE a través da convocatoria INTERREG V-A POCTEP 2014-2020 e ten por obxectivo a cualificación e valorización ambiental dos recursos endóxenos do territorio do Miño e a súa promoción como destino ecoturístico.

 

A Valedora do Pobo estará o próximo 25 de abril en Tomiño para atender en persoa as queixas cidadás

A valedora do pobo, Milagros Otero Parga, trasladarase o próximo mércores, 25 de abril, a Tomiño, invitando a todos os interesados a participar ese día nun encontro de atención directa á veciñanza, atendendo as queixas e consultas que queiran facerlle chegar nunha xuntanza que se celebrará entre as 16.00 e as 18.00 horas no salón de plenos da Casa do Concello.

O programa da valedora do pobo incluirá unha visita ao Concello ás12.00 do medio día onde se entrevistará coa alcaldesa, Sandra González e saudará á Corporación Municipal para tomar nota das cuestións que os representantes públicos queiran facerlle chegar.

O obxectivo da visita é achegar os servizos que ofrece a institución do Valedor do Pobo á cidadanía co fin de atender, protexer e defender os seus dereitos fronte ás actuacións das administracións públicas en políticas agrícolas e gandeiras, sanitarias, educativas, de vivenda, servizos sociais, medio ambiente, xustiza, urbanismo; e tamén en cuestións relacionadas cos servizos de interese xeral, como poden ser as reclamacións con empresas de subministración de servizos públicos, entidades financeiras, etc.

Calquera persoa ou colectivo poderá dirixirse directamente á valedora e trasladar a súa reclamación, aínda que, para unha mellor prestación do servizo, poderase concertar unha cita previa chamando ao teléfono 981 569 740 ou enviando un correo electrónico a comunicacion@valedordopobo.gal.

A visita a Tomiño forma parte do programa de encontros que cada mes a titular da institución realiza nun concello de Galicia. A institución do Valedor do Pobo quere agradecer a colaboración brindada pola alcaldía de Tomiño para organizar o encontro.

Nos últimos meses a defensora trasladouse a Chantada, Valdoviño, Guitiriz, Carballeda de Avia, Láncara, Curtis, Marín, Monforte, O Barco de Valdeorras ou Carballo, entre outras localidades. Os casos problemáticos que achegan os veciños nestas xuntanzas inician a súa tramitación con carácter inmediato e tamén adoitan atopar solucións en moi pouco tempo.

 

Xoves, 19 de abril de 2018  

O Centro de Día de Tomiño participa no Día Mundial da Bicicleta

Hoxe, ás 16.00 horas, co gallo do Día Mundial da Bicicleta, diante da explanada do centro de día de Tomiño, pertencente á rede de centros de maiores da Xunta de Galicia, organízase unha actividade co fin de promover o envellecemento activo e as relacións interxeneracionais a través do deporte. A actividade consistirá en realizar un pequeno circuíto en bicicleta para os máis cativos, á vez que as persoas usuarias do centro de día animarán empregando pedalieres adaptados.

   

O V Desafío Terras de Turonio preséntase, por 5º ano consecutivo, coma o maratón BTT por parellas máis importante do norte de España

O Desafio Terras de Turonio será, por 5º ano consecutivo, cita do ciclismo de montaña, de longas distancias, por parellas.

            A proba de BTT-Maratón por parellas que organiza a firma Team Relay en colaboración co Concello de Tomiño, celebrarase este próximo domingo 22 de abril, e está previsto que tomen parte nela preto de catrocentos cincuenta participantes.

A proba, que recibiu o premio de Mellor Evento Deportivo na IV Gala do Deporte tomiñés, celebrada o sábado pasado, foi presentada hoxe no Concello, despois da celebración dunha xuntanza entre Javier Sánchez, da organización; a alcaldesa de Tomiño, Sandra González; o concelleiro de Deportes, Ismael Troncoso, e representantes da Policía Local e Protección Civil.

Do mesmo xeito que nas edicións anteriores, o punto neurálxico da organización estará situado a tomiñesa Praza do Seixo, punto de saída e meta, desde o cal os ciclistas deberán afrontar un trazado de 104 quilómetros polas serras de Ou Argallo e da Groba, que alcanzan desde a ría de Vigo ata o Río Miño. A saída está prevista para as 9 da mañá.

Coma comentou o concelleiro de Deportes, “na actualidade, o Desafío Terras de Turonio é a única proba das súas características en Galicia, que tras as súas exitosas primeiras edicións, pasou a ser unha cita destacada no calendario a nivel nacional”.

No seu método de realización as parellas que forman cada equipo deben permanecer en todo momento a unha distancia máxima de dous minutos entre ambos, tendo que presentarse xuntos na liña de meta.

As parellas poden ser masculinas, femininas ou mixtas. Este ano, segundo comentaron os organizadores, hai apuntadas 9 parellas que superan, cada unha, os 100 anos de idade.

          A beleza do percorrido e o reto de completar unha proba destas características, anima tamén a varios participantes de Portugal e algúns de Castela-León e Asturias, aínda que o 95% vén da propia Comunidade Galega.

Máis información: http://desafioterrasdeturonio.blogspot.com.es/

 

Mércores, 18 de abril de 2018  

O Consello da Infancia e Adolescencia de Tomiño reúnese para ultimar a moción que levará a pleno pedindo o seu recoñecemento oficial

Hoxe, mércores, ás 18.30 horas, terá lugar no Salón de Plenos do Concello de Tomiño, unha reunión do Consello da Infancia e Adolescencia deste municipio, co fin de dar as últimas pinceladas á moción que presentarán ao próximo pleno ordinario, pedindo o seu recoñecemento oficial.

Constituído por nenos de Primaria e Secundaria, o Consello ten coma presidenta a Sofía Areal, alumna do IES Antón Alonso Ríos, e leva funcionando dende o 15 de decembro do pasado ano.

Dende a súa formación os compoñentes redactaron xa varias propostas de traballo, algunhas delas relacionadas coa organización de charlas sobre diferentes temáticas, obradoiros e actividades culturais e lúdicas relacionadas cos intereses da infancia e adolescencia tomiñesa.

O colectivo está promovido polo Concello de Tomiño de acordo ás recomendacións de Unicef, co obxectivo de cumprir os requisitos para ser declarada Cidade Amiga da Infancia e Adolescencia.

 

Tomiño dota de novos colectores verdes e de recollida selectiva aos núcleos de O Seixo e Goián

Durante o mes de abril a Concellalía de Medio Ambiente do Concello de Tomiño, procedeu á instalación de 25 novos colectores de envases de carga lateral nos núcleos urbanos de O Seixo e Goián. Cada un dos novos envases ten unha capacidade de 2400 litros e vén a substituír ós colectores de envases de 800 litros que había até o de agora.

No núcleo urbano de Goián, situáronse 12 colectores de carga lateral e retiráronse os existentes de menor capacidade, en dez lugares diferentes, ben por ser esta capacidade insuficiente para cubrir as necesidades de recollida, ben polo seu mal estado.

Tamén se crearon dous novos puntos de recollida de envases, que antes so contaban con colectores verdes (fracción resto). No núcleo urbano de O Seixo, dispuxéronse 13 colectores de carga lateral, substituíndo os 12 colectores existentes, danados ou insuficientes para satisfacer a demanda cidadá, e creouse un novo punto de recollida. Con este reforzo, superase o obxectivo de duplicar a capacidade de recollida de envases en ambos núcleos.

A reciclaxe desta fracción de envases ten aumentado máis dun 10% no Concello de Tomiño dende o ano 2015, recolléndose actualmente en torno a 12 toneladas de envases ó ano. “Co aumento da capacidade de recollida, e unha mellor información, agárdase acadar máis melloras nas cifras de recollida selectiva no futuro”, explica María Xosé Vázquez, concelleira de Medio Ambiente. 

Esta actuación completarase cunha segunda fase, que terá lugar durante os meses de maio e xuño, cun incremento de colectores da fracción envases, tamén nas áreas máis rurais de O Seixo e Goián, así coma no resto das parroquias do municipio.

O Concello considera un dato moi positivo que exista unha demanda cidadá de máis colectores de recollida selectiva. “Esta demanda implica unha maior concienciación da poboación e unha mellora substancial da separación en orixe do lixo doméstico” advirte a concelleira.

 

Martes, 17 de abril de 2018  

Tomiño celebrou a IV Gala do Deporte cunha ducia de premios e sete mencións especiais

O Concello de Tomiño celebrou esta pasada fin de semana a 4ª edición da Gala do Deporte, un acto no que se recoñeceu o traballo dos deportistas tomiñeses ao longo de 2017.

Os galardóns e recoñecementos atenderon a varias categorías que foron dende o mellor evento deportivo á mellor deportista masculino e feminino  absolutos. Estes premios recaeron no piragüista Roi Rodríguez, recentemente seleccionado para o campionato europeo, e Elena Cañibano, respectivamente, aínda que estes tiveron que compartir o galardón con outros dous deportistas. Deste xeito, Rubén Millán e Brais Castro, foron distinguidos, respectivamente, coma 2º e 3º mellores deportistas masculinos absolutos. E Iria Rodríguez e Anahí Álvarez, 2ª e 3ª mellores deportistas femininas absolutas.

Durante a gala, que contou coa actuación de Federico Pérez, actor de programas e series da TVG, e dun grupo de danza contemporánea, distinguiuse tamén o mellor adestrador, promesas masculino e feminina, mellor equipo de fútbol, premio afán de superación, mellor equipo base, e mellor evento deportivo.

Ante un auditorio cheo de persoas, o concelleiro de Deportes, Ismael Troncoso, salientou a vontade do equipo de goberno de “premiar ao deporte tomiñés e pór en valor o esforzo levado a cabo por clubs e deportistas ao longo do último ano”.

A alcaldesa, Sandra González, pola súa banda, agradeceu o labor de “todas as persoas que fan posible que o deporte de base sexa máis importante cada día”.

Listaxe de premios:

MENCIONS ESPECIAIS:

-GOIAN FC. (Ascenso a segunda)

-CADETES AD TOMIÑO

-ALEVINS AD TOMIÑO (campións de copa)

-SAN XEROME (subcampionas da liga galega de baloncesto feminino)

-CHARLI LOPEZ (campión galego Kick-boking, elite -69 quilos)

-EQUIPO PUMUKI RACING

-ADRIAN VAZ (KARTS)

PREMIO ENTIDADE QUE COLABORA CO DEPORTE

AGRUDEBAM (pola súa implicación co deporte base)

PREMIO EVENTO DEPORTIVO

DESAFIO TURONIO

PREMIO AFAN DE SUPERACIÓN

SEN AMARRAS (Proba de slalom motonáutica do II campionato galego integrador)

PREMIO VIDA ADICADA O DEPORTE

DAVID CASTRO, piragüista e adestrador do Club Deportivo Miño Os Teixugos (a título póstumo)

MELLOR EQUIPO CLASIFICADO

TOMIÑO FEMININO

PREMIO MELLOR ADESTRADOR

JAVIER SIERPES (ATLETISMO TREGA)

PREMIO ESCOLA BASE DE TOMIÑO

ATLETISMO TREGA.

DEPORTISTA MASCULINO CON MAIOR PROXECCION

MASCULINO: 1º HUGO DOMINGUEZ LINDO (2ºSAMUEL CASTRO E 3º IKER AMOEDO)

DEPORTISTA FEMININA CON MAIOR PROXECCION

FEMININO: 1ª CANDELA FERNANDEZ (2ªAINHOA FERNANDEZ E 3ªNEREA ROMERO)

PREMIO DEPORTISTA MASCULINO ABSOLUTO

1ºROI RODRIGUEZ (2ºRUBEN MILLAN E 3ºBRAIS CASTRO)

PREMIO DEPORTISTA FEMININO ABSOLUTO

1ªELENA CAÑIBANO (2ªIRIA RODRIGUEZ E ANAHI ALVAREZ)

 

Luns, 16de abril de 2018  

Copa David Castro de Slálom, correspondente a Liga Galega de Promoción de Slálom

Informa Rosa Fernández Carrera 

Despois do seu aprazamento por causas meteorolóxicas, por fin este domingo celebrouse no río da Pedra en Tomiño a Copa David Castro de Slálom, correspondente a Liga Galega de Promoción de Slálom. Os máis pequenos de cada club acudiron a esta cita, dando o mellor de si mesmos.

O balance final para o club Deportivo Miño, non poido ser mellor, con nove medallas para s seus deportistas.

Ainhoa Barreiro gañou en K1 e foi segunda en C1 na categoría Infantil, a súa compañeira de equipo e categoría, Alba Soutelo foi a mellor en C1 e segunda en K1.

En K1 benxamin, Javier Luch acadou o bronce, o seu compañeiro Sergio Álvarez foi cuarto e Pedro Lomba sexto, nesta categoría o gañador foi o representante do Club Tea de Mondariz Pablo Alfaya.

En K1 alevín, o gañador foi Valentín Varela do Penedo Importa, e o teixugo Adrián Lluch rematou sexto. Na mesma categoría pero na modalidade C1, Adrián rematou cuarto, sendo o gañador Aarón González do Penedo.

E finalmente na categoría Infantil masculina, na modalidade K1,  Sergio Rodríguez foi o gañador da proba, Samuel Castro rematou segundo, Alexis Segadaes cuarto e Mateo Álvarez sexto. En canoa, Samuel Castro foi primeiro e Sergio Rodríguez segundo.

Na clasificación final por equipos o Club Deportivo Miño Teixugos resultou gañador, seguido polo Club Penedo Importa e o Montaña Quixós .

A próxima cita co slálom será o vindeiro domingo en Salvaterra, coa II Copa Galaico Portuguesa de Promoción de Slálom.

FOTOS:

https://photos.app.goo.gl/kUpG8Lukf9JkGCxK2