Presentación

II Mostra das Tradicións Mariñeiras

Presentada no Centro Cultural a “II Mostra das Tradicións Mariñeiras” que este fin de semana converten o porto en centro de atracción

O Centro Cultural da Guarda acolleu a presentación da II Mostra dás Tradicións Mariñeiras, que se celebrarán o sábado, 24, e o domingo, 25, no porto da Guarda.

O acto iniciouse coa proxección dun vídeo no que mariñeiros da localidade explican algunhas das lendas e supersticións relacionadas co medio mariño. Ocultar un símbolo relixioso nunha embarcación, sen que ningún membro da tripulación o saiba; prohibición de mencionar determinadas palabras a bordo, como “o cura”, traen mala sorte; ou atoparse coa pluma dun paxaro, foron algunhas das referencias citadas.

A continuación o arqueólogo Xosé Lois Vilar, referiuse á sabedoría acumulada polos mariñeiros para saír ou regresar a porto, fiándose en “marcas” e sons, que tamén lles servían para saber cales era as zonas de pesquería apetecibles. Considerou aos profesionais desta profesión como sabios en distintas materias: tiñan que coñecer os peixes, os seus hábitas e hábitos; os tipos de fondos mariños, os ventos. Eran pois, dixo, biólogos, meteorólogos, xeólogos, e un longo etcétera. Pero tamén dixo que coa tecnoloxía actual eses coñecementos acumulados e transmitidos durante séculos estanse perdendo e hoxe un mariñeiro tería dificultades para regresar a porto se se lle averiase o gps.

Tocou a continuación a quenda dun novo vídeo, neste caso dedicado ao remo, e máis concretamente ás traíñas, modalidade deportiva na que este ano comezou a competir o Club de Remo Robaleira. Foi, precisamente, ao finalizar esta proxección cando o alcalde da Guarda, José Manuel Domínguez Freitas entregou ao presidente do Robaleira a Bandeira que se disputará na I Regata de Traíñas Concello da Guarda que se celebrará este fin de semana no porto guardés.

Tras agradecer esta entrega, Hemelindo Martínez, directivo do Club de Remo, explicou a decisión de directivos e remeiros por competir nas traíñas, e coa colaboración doutros clubs de remo, a disposición do concello e contando co patrocinio de distintas casas comerciais, o club de Remo Robaleira comezou a competir na Liga Galega, un espectáculo que o sábado e o domingo estará na Guarda.

O alcalde, Domínguez Freitas, clausurou a presentación da II Mostra das Tradicións Mariñeiras recordando o éxito da primeira edición, e animando a estar presentes na segunda Mostra na que, grazas ao traballo dos concelleiros de Patrimonio, Javier Crespo; de Cultura, Antonio Lomba, e de Turismo, xunto con colectivos e asociacións da localidade, se intentará igualar, ou superar a I Mostra, con novas achegas que formaron parte, nalgúns casos aínda subsisten, da vida local, coma a conserva do peixe, mantemento das redes e outras novidades que dixo non coñecer porque “eu quero tamén sorprenderme ao velas”.

Un amplo programa

O paseo marítimo e a nave das atadeiras, serán algúns dos escenarios das exposicións de embarcacións tradicionais, redes, maquetas, cabacos, cestería e taxes mariñeiros, que se amplía coa visita ao Museo do Mar.

Nos obradoiros haberá actividades clásicas, coma reciclado e macramé, cestería, fabricación de cordas, e outras alternativas, destacando, como novidades, o cascado da cortiza do salgueiro e o secado de congro.

Un mercado mariñeiro e unha taberna mariñeira; música tradicional e de coral, a regata de traíñas, gastronomía e outras propostas, converterán o porto da Guarda nun espectáculo múltiple e para todos os gustos este sábado e o domingo.