Concerto de Corais na

II Mostra das Tradicións Mariñeiras

As corais da Guarda e Ruada, de Ourense, clausuraron a II Mostra das Tradicións Mariñeiras da Guarda

            A Coral de Ruada e a Agrupación Coral Polifónica da Guarda tiveron o honor de clausurar a II Mostra das Tradicións Mariñeiras, cun concerto ao acudiron unhas 450 persoas e que foi presentado por Zaida Martínez Oliveira e Ana.Flores

            Os integrantes de Ruada entraron na carpa do porto entre os aplausos de público e ao son do grupo de gaitas desta cáseque centenaria formación, a segunda máis antiga de Galicia que se presentaba na Guarda nunha oportunidade que non se repetía desde o ano 1957, cando participou un Concerto durante as Festas do Monte. Neste senso o presidente da Coral de Ruada lembrou o seu interese por estar na Guarda, localidade na que veranea desde hai 24 anos polo que, en palabras do alcalde, José M. Domínguez Freitas, é un guardés e portavoz deste municipio alí a onde vai.

            Subiu ao escenario, en primeiro lugar, a Agrupación Coral Polifónica da Guarda, dirixida por Marisilda Sánchez Lomba, que incluíu no seu repertorio habaneras, canción mariñeira e popular galega.

            Esta Agrupación foi creada en 1984 e desde entón leva percorrido toda Galicia e gran parte do país veciño. No seu repertorio para esta xornada estiveron “Lévame”, “Os cregos e os taberneiros”, “Huellas en la arena”, “No niño do vento”, canción escrita por Álvaro Cunqueiro e “Nostalgia del mar”, unha peza dedicada a San Campio, festividade que tamén se celebraba onte en Figueiró, como recordou a directora da Coral.

            Tralo pase polo escenario da coral guardesa, subiu ao estrado a Coral de Ruada, á que dedicaron palabras persoeiros relevantes da cultura galega coma Otero Pedrayo, Óscar Esplá e Antonio Fernández Cid, por citar algúns intelectuais que apreciaron o vo facer desta formación.

            No repertorio traído á Guarda, a Coral de Ruada de Ourense interpretou “Foliadas da Rabeda e da Peroxa”, “Goliada do Miño””Alalá de Taboaleda e Ourense”, “Alalá de Muxía”, “Pandeirada de Falván”, “Pandeirada de Tella”, “Foliada de Carballo” e a “Danza dos Vellos”, bailada polo grupo de danza da Coral.

            Como remate do concerto, as dúas corais, dirixidas por Marisilda Sánchez Lomba, interpretaron “Trullada de Cangase Trullada de Cambados” e a coñecida canción “Airiños, airiños, aires”, coreada polo público.

seguinte