Xoves Santo

20/03/2008

seguinte

Coa procesión dos Pasos comezaron as principais celebracións relixiosas da Guarda na Semana Santa de 2008. A xornada caracterizouse por unha temperatura alta, aínda que as primeiras horas da mañá, e á tardiña, o descenso deixouse notar e retirou dalgunhas rúas, como os tramos da Rúa Galicia e Puerto Rico, así como a de José Mª Andreini, a unha gran parte de público que esperaba o paso da procesión, sendo máis numeroso sobre todo nas rúas Concepción Arenal e Brasilino Álvarez Sobrino.

Distintas novidades víronse o Xoves Santo. Por vez primeira non saíu o Nazareno vivinte, segundo algúns, desapareceu a roupa que vestía. A Dolorosa fixo o percorrido procesional acompañada de cofrades tocadas de mantilla. O Nazareno contou, por vez primeira, con encarapuchados e dous tambores. E as imaxes da Confraría da Paixón reduciron o número de paradas no seu percorrido, a dúas: a primeira, á altura da igrexa conventual de San Bieito, onde se congregou a maior parte de público; e a segunda na encrucillada entre Brasilino Álvarez Sobrino, Joaquín Alonso e Vicente Sobrino. Esta Confraría sacou tamén á rúa nun novo elemento da Paixón de Cristo: o Santo Sudario, obra do guardés Rafael Barbosa, que ía portado por catro cofrades.

A bonanza climatolóxica achegou á Guarda a moitos visitantes este xoves, visitantes que tamén viviron o espíritu da Semana Santa Guardesa.