Desfile do Traxe Galego

11/05/2008

seguinte

Máis de seiscentas persoas acoden ao auditorio de San Bieito para presenciar o Desfile do Traxe Galego

O primeiro desfile do Traxe Galego, organizado pola Asociación para a Recuperación do Traxe Galego, da Garda, resultou un éxito, tanto pola participación de persoas de todas as idades que se deron cita neste desfile ataviados con distintos traxes de zonas diversas de Galicia, como pola presenza de público nas beirarrúas polas que pasou o desfile, e na Praza de San Bieito, onde se reuniron preto de seiscentas persoas, para ver o remate do desfile e disfrutar do concerto que ofreceu a banda de música Agrupación Musical do Rosal.

A organización sorteou, entre os que desfilaron, tres pezas de cerámica de Sargadelos, e, entre os que adquiriron mediante un donativo, rifas, sorteará un xogo de pendentes e un broche, feitos artesanalmente en prata dourado e azabache, cuxo número agraciado será o que coincida coas catro últimas cifras do sorteo da Once de onte, luns.

Carmen González Álvarez, presidenta da Asociación para a Recuperación do Traxe Galego, sinalou na súa intervención na Praza de San Beito, que un dos obxectivos deste colectivo é sacar á luz aqueles traxes que hai nas casas e que forman parte do noso patrimonio cultural, polo que “deben ser recoñecidos como se merecen. Traxes que tanto traballo custou para crealos, e cunha historia persoal en cada un deles, historia que pasa de xeración en xeración nalgúns casos”.

Julia Sobrino, vicepresidenta da asociación, encargouse de coordinar e dirixir o pase final na Praza de San Benito, destacando algunhas características dos traxes que desfilaron nesta primeira convocatoria, e agradecendo a presenza tanto de quen desfilaron, como do público presente na praza.

            No I Desfile do Traxe Galego, organizado pola Asociación par a Recuperación do Traxe Galego, desfilaron o Grupo A boalleira, da Gándara; o Grupo O Torreiro, de Priegue; as Pandereteiras Ir e Vir, do Rosal, o Grupo de Gaitas da Terceira Idade, da Guarda; as Pandereteiras Lirolai, do Rosal, o Grupo Os Petóns, os grupos de A Sangriña, da Guarda; Quinricosta, de Goián, Xamaraina, da Guarda, Anduriñas, do C.I.P. Solanas, o Grupo Churumbela, da Guarda, e, pechando os desfile, o grupo Do Lusco ó Fusco, da Guarda.

            Entre os distintos grupos fóronse intercalando os participantes individuais e os grupos familiares ou de amigos, que quixeron inaugurar este desfile que está chamado a ter continuidade nos vindeiros anos.