Casa de Respiro Familiar

xestionada por FEAFES

Rafael Álvarez, Antonio Hernández e Zulema Rodríguez na entrada da Casa de Respiro Familiar

Onte inaugurouse na Guarda unha Casa de Respiro Familiar para persoas con problemas de saúde mental xestionada por FEAFES

            Onte púxose en marcha, na Guarda, unha nova experiencia de respiro familiar, promovida por FEAFES destinada ás asociacións que traballan con persoas con problemas de saúde mental de Galicia. Trátase dunha casa en réxime de aluguer, situada no mesmo porto guardés, xestionada pola Federación de Asociacións de Familiares e Enfermos Mentais de Galicia, que inicia as súas actividades cun grupo de cinco persoas e dous monitores da Asociación Portanova, do Ferrol,  que pasarán do venres ao domingo, nesta localidade.

            Na casa de respiro familiar, estiveron Antonio Hernández Fernández, coordinador de FEAFES; Zulema, e Rafael Álvarez, director de Avelaíña.

            Antonio Hernández explicou que a idea xurdiu tralas conversacións que mantiveron distintos técnicos que traballan con persoas con problemas de saúde mental, e entre eles estaba Rafael Álvarez, que foi a persoa, engade o coordinador, que tivo a idea desta casa como unha maneira de ofrecer ás familias  un lugar que acollese ás persoas con problemas de saúde mental que dependen delas, durante unha fin de semana, permitíndolles aos familiares, que soportan unha importante carga asistencial, un merecido descanso.

            Continúa Antonio Hernández explicando que esta iniciativa quixeron complementala cun programa  de ocio e entretemento para os usuarios da casa, unha semana de vacacións con posibilidades de coñecer a zona, subir ao monte Santa Trega, achegarse a Portugal, a través do ferri, participar nas actividades culturais que se programen na Guarda, facer sendeirismo ou mesmo ir á praia, por citar algunhas referencias de ocio e tempo libro.

Un programa para toda Galicia

            O programa de respiro familiar da Guarda ten carácter autonómico, coordinado pola Federación, aberto a todas as asociacións de Galicia. De feito nestes intres xa se barallan cifras, ata fin de ano, de preto de duascentas persoas que pasarán por esta Casa, con capacidade para seis usuarios e dous monitores cada fin de semana.

            Na súa financiación, participa a Xunta de Galicia, a través da Consellaría de Sanidade á quen lle presentaron o programa, que o considerou unha iniciativa moi imporante, asinándose o correspondente convenio.  Os usuarios aboan unha cantidade de oito euros día e persoa, para facer fronte aos gastos correntes, enerxía, abastecemento de auga e alimentación, que tamén se inclúe no programa.

            Aínda que a utilización da Casa vai ser, inicialmente, as fins de semana, co tempo, porque a idea da Casa nace con vocación de continuidade e por tempo indefinido, ampliaranse os seus cometidos; aínda así non vai estar baleira o resto dos días, xa que os usuarios de Avelaíña levarán a cabo nela actividades, que non se poden organizar no centro da Portela.

Rafael Álvarez

            O director da Asociación Avelaíña, da Guarda, Rafael Álvarez, considerou a Casa de Respiro Familiar como un proxecto da maior importancia, e así, dixo, o entendeu tamén o SERGAS. Pero para Avelaíña, dixo, é dobremente importante, porque os seus usuarios van poder estar aquí de descanso cos seus monitores as fins de semana, segundo o programa ten previsto; pero é que ademais durante a semana imos utilizar a Casa para facer un programa de actividades da vida diaria, onde os usuarios se encargarán de facer a comida, a compra, atender o mantemento da Casa; é dicir, calquera actuación propia do ámbito familiar.

            Entende Rafael Álvarez que para os usuarios vai ser unha alternativa nova, e para as familias unha opción máis onde deixar aos seus fillos e fillas, coa tranquilidade de que van estar atendidos polos mesmos profesionais que se encargan deles nos centros que posúen as respectivas asociacións.

Zulema Rodríguez Espinele

            Zulema Rodríguez Espinele, coordinadora do programa de ocio e tempo libre de FEAFES, é a responsable de facilitar as actividades de ocio que hai na zona, neste caso, na Guarda e arredores, estando en contacto directo coas asociacións que se van desprazar, ben sexa á Guarda ou, cando se trata doutras actividades, a outras localidades. Mesmo organiza as excursións, como a que agora mesmo disfruta un colectivo de usuarios en Asturias, responsabilizándose dos lugares onde poden xantar, visitar, actividades a desenvolver ou onde aloxarse.

            Zulema Rodríguez valora a existencia da Casa na Guarda como unha opción moi importante para o colectivo de usuarios, que supón un cambio na rutina diaria, a veces, unha rutina moi dura; pero o é tamén, insiste na liña dos seus compañeiros, para as familias que poden ter unha liberdade uns días, sen estar pendentes dunhas persoas ás que queren moito e que non queren deixar soas; unha garantía de atención que agora saben que van ter por parte dos técnicos e profesionais cos que cada día comparten xornada.

Unha das dúas cociñas coas que conta a Casa

Habitación dobre, con balcón exterior

Outra das habitacións do segundo andar

Habitación dobre, con fiestra a un amplo patio exterior

Cuarto de baño no segundo andar

Sala de estar, no primeiro andar, comunicado co comedor

Outra vista da sala de estar

Habitación con dúas camas no primeiro andar

Habitación individual no primeiro andar

Cuarto de baño, no primeiro andar

A cociña que tamén pdoerán empregar os usuarios da Casa. Esta no primeiro andar con porta de acceso á terraza

Unha vista da terraza que comunica co primeiro andar

Desde unha das fiestras vese o porto da Guarda

Imaxe desde outra fiestra nun día pasado por auga