O venres, 4 de maio, o pavillón polideportivo do IES A Sangriña acolleu o mitin do PSdeG-PSOE no que interviron como oradores o candidato á Alcaldía da Guarda, Xosé M. Domínguez Freitas, e o presidente da Xunta de Galicia, Emilio Pérez Touriño, presentados pola número 2 da candidatura socialista, Montserrat Magallanes Álvarez.

            No estrado, practicamente toda a candidatura, na sala, máis de catrocentas persoas con panos nos que se lía a  mensaxe “Freitas, alcalde”, e bandeiras socialistas. Nas primeiras bancadas, entre outros, a delegada da Consellaría de Política Territorial, María Isabel Domínguez Quintás; o delegado da Consellaría de Traballo, Pedro Borrajo Rivas; deputados do Parlamento de Galicia, Modesto Pose e Abel Gaspar, e candidatos ás alcaldías de Oia, O Rosal e Tomiño polo PSdeG-PSOE.

Domínguez Freitas subiu ao escenario entre os aplausos do público, e as súa primeiras palabras foron de agradecemento aos presentes, comezando polo secretario xeral de PSdeG-PSOE e presidente da Xunta de Galicia, Pérez Touriño, que cumpría o compromiso de estar na Guarda “apoiándome a min e a estas compañeiras e compañeiros que imos sacar á Guarda da longa noite de pedra que xa dura sete anos”.

            O 27 de maio, dixo o portavoz dos socialistas da Guarda, “vaise facer realidade aquel cuádruple soño porque ao goberno de Madrid e ao goberno que ti presides, se lle van sumar a Alcaldía da Guarda e a Entidade Local Menor de Camposancos”.

            Recordou a aqueles compañeiros que desde hai 24 anos “coa mesma ilusión que hoxe temos nós, presentábanse diante do electorado guardés por primeira vez”: José Luis, Pedro, Feliciano, Uris, e Julia, Miguel, Paulino que “vimos traballando ao longo destes vintecatro anos para que o soño de todos vós e o soño doutras moitas persoas que hoxe non poden estar aquí, se faga realidade o día 27”.

            Falou da realidade dese soño no ano 1999 “cando tivemos durante un ano a Alcaldía da Guarda truncado por alguén que presume que fai as cousas con sentido común, un sentido común que o levou desde o Partido Comunista a Izquierda Unida, a Iniciativa Veciñal, ao Partido Galeguista e hoxe a Terra Galega”, e desexou que a Guarda “se vexa libre da terra galega que algúns nos queren traer: da terra de Fariñas”.

            “Despois da moción de censura onde dous mandaban máis que sete, sendo Partido Popular consentidor desta situación, non poden vir agora dicindo que van cambiar as cousas cando non o fixeron, e durante sete anos entregáronse nas mans dunha persoa que non mereceu nunca ostentar o poder neste pobo”, polo que “hai persoas que non son merecedoras dunha nova confianza, porque defraudaron aquela que os cidadáns depositaron neles”.

            Continuou con referencias aos pactos, o do 2003, co que deu de si, e o do novo pacto que repetiu “falcatruadas, firma falsa, facturas falsas, perda de subvencións do ano 2005, a fuxida de dous concelleiros”, e criticou ao candidato do PP que dicía sentirse orgullo do feito nestes sete anos polo goberno local, “pois se sente orgullo do que acabo de citar, ese orgullo non lle serve ao pobo da Guarda”.

            Domínguez Freitas esbozou os piares básicos do que será o goberno socialista no caso de gañar as eleccións de maio, e que darán a coñecer nos barrios e parroquias:

            -Nos próximos catro anos A Guarda terá un novo Plan Xeral de Ordenación Municipal, que terá como piar básico, a sostenibilidade, garantindo o crecemento sostible arredor dos núcleos; protección de solos e crecendo na medida xusta ao chan urbanizable; logrando chan para vivendas protexidas e para a industria.

-Catálogo de bens e edificios a conservar porque A Guarda aínda ten valores que non podemos destruír.

-Aposta polas infraestruturas, criticando a construcción dunha estación de autobuses que dixo non saber qué facer con ela.

-Creación dun centro de formación e capacitación para os nosos traballadores

-Un centro multiusos para realizar actos

-Reclamar as infraestruturas portuarias que temos que darlle aos nosos mariñeiros que traballan nunhas condicións dun mar bravío onde moitos días non poden saír a faenar precisando esas infraestruturas e esa seguridade.

-A variante á Guarda vai deixar de ser un soño para convertirse nunha realidade.

-Atención ás parroquias en igualdade de condicións que o casco, dándolle aos barrios e parroquias o trato que se merecen en pé de igualdade

-Plan de limpeza e recollida de lixo e voluminosos

-Plan de Tráfico e aparcamentos, que solucionen os actuais atrancos.

-Política baseada na educación, na sanidade e nos servizos sociais, estes máis doados para o concello coa lei de dependencia do goberno Zapatero.

-Aposta decidida pola educación, mediante convenio cos centros educativos, porque mellor eles que ninguén para levar ao día os arranxos, trasladándolles os fondos necesarios para que os xestionen, sen ter que depender nin do traballador nin da empresa que traballa para o concello, para resolver pequenas avarías.

-Dotación de especialidades para o Centro de Saúde.

-Apoio á cultura, cunha programación estable; á xuventude, creando o Consello da Xuventude para darlle a voz aos xoves; ao deporte base, e aos axentes que o fan posible.

-Posta en valor do Monte Santa Trega que non debe ser só un reclamo turístico, senón tamén arqueolóxico.

-Celebración dos plenos os venres á tarde, para que os guardeses poidan acudir

-Recuperar as institucións: Mancomunidade do Baixo Miño (que non só sexan pás; que ofreza tamén servizos de carácter social, cultural e deportivo entre outros) e Padroado Monte Santa Trega que non funciona e só se convoca para contratar aos cobradores do Monte.