Rafael Louzán

visita institucional ao Rosal

seguinte

Rafael Louzán visitou o concello e o Auditorio Municipal con nova imaxe interior e exterior tralas obras realizadas

O presidente da Deputación Provincial, Rafael Louzán, visitou o martes, 8 de marzo, o concello do Rosal onde foi recibido, entre outros, por corporativos e o alcalde da localidade, Jesús Fernández Portela.

Rafael Louzán, a quen acompañaba o Vicepresidente, José Manuel Figueroa, e Técnicos da Institución Provincial, percorreu as novas instalacións da Casa Consistorial, cuxas obras tiveron un investimento final de 1.300.000 euros, e saudou aos funcionarios que atenden as distintas dependencias.

A Casa Consistorial duplicou a superficie útil que é agora de 900 metros cadrados en cada unha das dúas plantas. No baixo sitúanse o Xulgado, a Sala de Plenos, a biblioteca, que tamén duplicou a súa superficie, e a Policía Local. Na primeira planta atópanse os servizos de Intervención, Secretaría, Alcaldía e salas para os diferentes grupos municipais. Ademais elimáronse as barreiras arquitectónicas e habilitouse un ascensor para o acceso á primeira planta. A nova Casa Consistorial, que coñeceu unha total renovación interior, gañou en luminosidade, segundo fixeron constar os funcionarios ao presidente da Deputación.

Auditorio Municipal

Posteriormente, o presidente provincial dirixiuse ao Auditorio Municipal, onde practicamente finalizaron as obras que supuxeron aumentar o aforo ata as 390 butacas, ampliar as dependencias e dotar de salas e camerinos este espazo, que acollerá a Escola de Música para o que se insonorizaron as distintas dependencias, especialmente a destinada á clase de percusión.

O amplo escenario que preside agora o salón de actos posibilitará, non só unha maior comodidade para a Agrupación Musical do Rosal, senón un recinto capaz de ofrecer un excepcional escenario para cantas representacións se leven a cabo no Auditorio, pois foi dotado dunha estrutura móbil, destinada ás representacións teatrais, e unha pantalla, ambos elementos descenden do teito cando é accionada unha palanca. Pero ademais, para facilitar a retirada de obxectos voluminosos ou pesados, un ascensor accede directamente ata o escenario, posibilitando, por exemplo, que un piano se poida retirar do estrado sen maior problema.

Para ampliar o aforamento, construíuse un anfiteatro que requiriu de solucións técnicas que non impedisen a visión do escenario a quen se sitúen neste lugar.

Tras o percorrido polas instalacións, Rafael Louzán valorou positivamente as obras realizadas e manifestou levar unha sensación moi positiva e grata do traballo realizado, destacando tamén as xestións do alcalde para mellorar a localidade.

O alcalde, Jesús Mª Fernández Portela, sinalou que en breve procederase a inaugurar o Auditorio Municipal, barallándose os primeiros días de maio, realizándose unha xornada de portas abertas para que todos os veciños coñezan as novas instalacións culturais coas que conta o municipio e que serán, sen dúbida, referencia na comarca.

Outras actuacións

Entre as próximas actuacións que a deputación acometerá no Rosal figuran unha cafetería e oficinas, no Campo de Fútbol da Mata; acondicionamento de aire no pavillón, instalación que se complementará cun ximnasio; e beirarrúas no tramo da estrada que pasa por Couselo.