Tui inicia o Ano Xosé María Álvarez Blázquez

Reportaxe: Beti Rey

Os actos do ano Xosé María Álvarez Blázquez comezan cunha homenaxe extensiva a toda a familia

A Casa do Rollo, na rúa Maristas, loce dende o pasado mércores unha placa na que se pode ler “nesta casa viviu Xosé María Álvarez Blázquez cos seus pais Darío Álvarez Limeses e María Blázquez Ballester e os seus irmáns Darío, Celso, Alfonso, Emilio e Álvaro. No ano 2008 dedicado á lembranza deste egrexio escritor, investigador e editor, o concello de Tui honra a súa memoria e a da súa familia polo seu compromiso coa cultura de Galicia e coa causa da liberdade”.

Deste xeito iniciáronse os actos do Ano Xosé María Álvarez Blázquez en Tui dando cumprimento ao acordo plenario do 27 de decembro de 2007.

Precisamente diante da Casa do Rollo comezaba o programa de actividades, e previo ao descubrimento da placa tomaba a palabra Xosé María Álvarez Cáccamo, fillo do escritor homenaxeado, en nome de todos os fillos e descendentes de Darío Álvarez Limeses e María Blázquez Ballester, felicitando ao Concello de Tui polo programa de actos organizado, e tamén porque na placa apareza non só o nome do homenaxeado senón tamén dos seus pais e irmáns, xa que se conmemora non só a súa figura, senón tamén a súa familia.

Na Casa do Rollo dicía Xosé María Álvarez Cáccamo vivíronse experiencias moi amargas pero tamén moitos anos de ledicia.

E esta memoria da felicidade e da fraternidade, dicía, é a que a familia quere preservar. Nesta casa dicía, Xosé María Álvarez Blázquez comezou a soñarse a realizarse coma escritor, etnógrafo,  arqueólogo e comezou a ser poeta aos 12 e 13 anos. Por iso aquí pervive a memoria, os ecos e as luces de familia Álvarez Bázquez, dicía, engadindo que “loitaron polas causas de Galicia e polas causas da liberdade”.

E referíase a un texto do seu tío Emilio Álvarez Bláquez “Epílogo de familia” no que se recollen as vivencias nesta casa”.

Tomaba logo a palabra o Concelleiro de Cultura, Moisés Rodríguez, que dicía que estes actos queren significar unha testemuña de homenaxe que Tui e Galicia lle brinda ao longo deste ano. Explicaba tamén Moisés Rodríguez coma quixeron que a placa lembrase a toda a familia “pola aportación tan inxente que realizaron á cultura da nosa terra”. Aludía tamén a que a elección do 23 de abril, Día do Libro, era un data idónea para lembrar a este persoeiro escritor e editor.

A continuación descubría a placa Branca Fernández Feixoo, cuñada de Xose María Álvarez Blazquez, e decana da familia.

Posteriormente as autoridades, a familia e o público en xeral dirixiuse camiñando até a Casa do Concello onde tivo lugar o acto institucional.

No salón de plenos o primeiro que tomaba a palabra era outro dos fillos do escritor, Alfonso Álvarez Cáccamo, quen manifestaba, no nome da súa familia, o agradecemento “polo cariño, a sensibilidade e compromiso para a celebración destes actos” . Deste xeito, dicía, “volve á memoria do meu pai a enraizar na cidade que o viu nacer, e sei que xa non haberá galernas que o arrinquen da terra da súa orixe”. Lembraba coma todos os irmáns Álvarez Blázquez foron modelo de fraternidade e amor, pero as “tráxicas circunstancias” truncaron a súa permanencia en Tui. Eses feitos dicía “racharon o corazón do seu pai, da súa nai, o corazón dos fillos, e o corazón da meirande parte dos habitantes de Tui foron levándoas con valente resignación e cunha sobrehumana ilusión pola vida... permanecendo firmes nas ideas e nas arelas políticas que en grande medida todos viron realizadas, xa que agás Celso, todos morreron despois do 20 de novembro de 1975”.

Alfonso Álvarez Cáccamo manifestaba que chegou o tempo de “hibernar o pasado, non de enterralo” xa que convén deixalo, dicía “nun estado letárxico entre o perdón e a alerta” e concluía que aquí no presente é o noso deber que “velar a cotío por un futuro en paz e liberdade”. E neste tempo de celebracións  “coma en tantas ocasións a cidade de Tui vai ser modelo de actividade cultural coma mesma ilusión do Tui dos Xogos Florais” afirmaba Cáccamo, e concluía lembrando a presenza de Tui na obra do seu pai sinalando que “esta cidade xamais desapareceu das súas lembranza e inquedanzas, e se non escribiu máis verbo dela foi porque mantivo o seu corazón hibernado até a chegada á estación de Guillarei do tren das liberdades”.

Logo dous nenos de Tui, Carolina Alonso e Lois Pereira, recitaron unha pequena escolma do poemario “Roseira do teu mencer” de Xosé María Álvarez Cáccamo.

Tomaba de seguido a palabra Xosé Manuel Barreiro, Presidente da Real Academia Galega, quen destacaba a estreita relación que organismo que presidente mantén co Concello de Tui, dende a celebración na cidade do centenario da Academia. Manifestaba a continuación a súa satisfacción por ser un dos que propuxeron o nome de Álvarez Blázquez para o Día das Letras Galegas deste ano, xa que acertaron ante a aceptación que esta a ter.

O Presidente da Real Academia sinalaba que “non esquecemos” e en referencia a represión da Guerra Civil sinalaba que “puideron acabar coas persoas,..., pero non puideron nin coa liberdade, nin coa democracia, nin coa galeguidade”. Nese senso sinalaba que ao apoiar a Blázquez apoiábase non só a un “magnífico escritor e poeta” senón tamén a “un gran loitador”.

Continuaba Barreiro dicindo que sempre “defendín a Memoria Histórica” porque se busca xustiza e rehabilitación social, “a rehabilitación social que as familias necesitan”, porque engadía “o pobo que non sexa capaz de reconciliarse consigo mesmo, e que os que cometeron aquelas barbaridades non eran de Marte eran galegos, non seremos un pobo san” e concluía dicindo que “para isto serve a memoria histórica.”

Logo o público presente na sala tiña a oportunidade de escoitar un fragmento do discurso pronunciado por Xosé María Álvarez Blázquez o 17 de maio de 1973 cando o Día das Letras Galegas estaba dedicado ao bispo Manuel Lago González. No mesmo relataba unha anécdota que con el lle pasara sendo neno no Claustro da Catedral de Tui.

Pechou o acto o Alcalde de Tui lembrando como o Concello de Tui se dirixida a Real Academia Galega apoiando a candidatura de Álvarez Blázquez para o Día das Letras Galegas de 2008, e coma un acordo plenario unánime acordou celebrar un programa de actividades entorno a súa figura.   E explicaba que dende agora a figura de Xosé María Álvarez Blázquez permanece incorporada á lista de “tudenses ilustres”.

Remataba o Alcalde amosando o seu agradecemento á familia Álvarez Blázquez pola inestimable colaboración na organización destes actos, e na recuperación de textos e documentos sonoros do seu pai. E tamén agradecía a Real Academia Galega que se dedique a este tudense o Día das Letras Galegas deste ano. E concluía agradecendo a presenza do público que dicía evidencia que a semente que Xosé María Álvarez Blázquez estendeu polos múltiples campos nos que laborou está frutificando, que seguindo o seu exemplo sigamos cantando e loubando a esta terra da alma”

E para pechar o acto Gala Paula Bravo Paramos interpretaba o himno galego ao violín.