Domingo, 13
de xaneiro de 2008
A Xunta Directiva continuará como un ano máis ao
non presentarse candidatos
Joaquín Miguel Villa distinguido no
“Recreo” como “Secretario de Honor” polos méritos acadados a prol desta
institución
O pasado domingo o Recreo Artístico Guardés celebrou
Asemblea Xeral Ordinaria, que comezou coa lectura da Memoria do ano que
vén de pasar, informándose aos presentes que en 2007 foron 53 os socios
que se deron de alta nesta centenaria sociedade, cantidade que foi
acollida con aplausos polo significado que ten para este colectivo.
No punto 6 fíxose o recoñecemento a aquelas persoas que
se distinguiron no “Recreo” por distintos motivos. O presidente desta
sociedade, Anselmo Martínez Pena, que volveu recordar o seu desexo de
deixar a presidencia, tamén dixo que non quería facelo sen recoñecer os
méritos dunha persoa á que esta institución debe agradecemento non só
polo labor realizado como secretario e o traballo feito, que xa serían
motivos suficientes para brindarlle un
recoñecemento, senón tamén porque soubo recoller en dous libros a ampla
historia do Recreo, desde a súa fundación en 1890, “Historia”, engadiu,
“que nos fai ser unha das pouquiñas sociedades do noso entorno que
podemos presumir de poder mirar cara atrás lendo estes libros”. Anselmo
Martínez Pena, que reservou para o remate do seu discurso o nome de quen
ía ser recoñecido, recoñeceu as moitas horas dedicadas á investigación,
a moita constancia e as moitas gañas de traballar altruístamente, que
incluso lle obrigou a poñer cartos do seu peto, sen que en ningún
momento presentase factura algunha dos gastos realizados para escribir
dous libros de categoría. “Todo un verdadeiro traballo feito na sombra,
sen alardearse en ningún momento do que estaba facendo”, salientou
Martínez Pena que non quixo esquecer “cómo deixou Secretaría:
¡Impecable! é o cualificativo axeitado para definir o seu paso como
directivo do Recreo”. E acto seguido, o presidente do Recreo quixo
popoñer (con maiúsculas) á Asemblea Xeral, que “sexa nomeado
“Secretario de Honor” o socio núm 210 don Joaquín Miguel Villa
Álvarez”, que recibiu tal petición con sorpresa.
Por unanimidade, e con fortes aplausos, foi aceptada a
proposta realizada pola presidencia e Xunta directiva do Recreo
Artístico Guardés.
De seguido tratouse o “Cambio de Directiva”, e unha vez
máis o presidente puxo os cargos de todos os membros a disposición dos
asistentes convidándoos a constituír unha nova Xunta Directiva.
Anselmo Martínez Pena, e o resto dos directivos, ante a
falla de resposta, comprometéronse a continuar u ano máis nos cargos,
que foron ratificados por maioría dos presentes, pero animando a ir
pensando na renovación..
