galiciasuroeste                                                                                                                       optimizado para 1024x768  

 

galiciasuroeste                                                                              

Sábado, 20 de xaneiro de 2018       

A Biblioteca Municipal premia aos seus tres mellores lectores polo Día dos Usuarios

Co gallo do Día do Usurio das Bibliotecas, que se conmemora cada 11 de xaneiro, a Biblioteca Pública Municipal da Guarda agasallou aos tres mellores lectores do ano 2017 nas categorías xuvenil, infantil e adulto.

Onte, 18 de xaneiro, os premiados recibiron da man da concelleira de Cultura e Educación, Elena Baz, un diploma que da conta da súa condición de usuarios e lectores asiduos e un lote de libros adaptados ao seu perfil lector.

Os lectores premiados foron  os seguintes José Manuel Álvarez Álvarez, co recoñecemento como mellor lector adulto; Xoán Dijean Vidal Rodríguez, co premio ao mellor lector xuvenil; e Estela Martínez da Silva, mellor lectora en categoría infantil da Biblioteca Municipal.

 

Venres, 19 de xaneiro de 2018       

Petición para retirar as antenas do monte Santa Trega

A Xunta Rectora da Comunidade de Montes da Guarda, presentou no rexistro do Concello da Guarda, unha moción ao pleno propoñendo o estudo para a retirada das antenas situadas no Monte Santa Trega.

Esta comunidade de montes, deixa aberto o debate o pleno para que tódalas formacións políticas, poidan adherirse a dita moción, como aportar contido a mesma. Na moción proponse como alternativa trasladalas a outro monte da mesma propiedade, cos estudos pertinentes e así evitar  feismo e a ocupación destes obstáculos dentro do BIC do Monte Santa Trega.

Texto íntegro da moción

Por un monte sen obstaculos visuais e contra o feísmo

O icono identificativo do noso pobo, é o Monte de Santa Trega, sendo así mesmo, unha das grandes  referencias turísticas do Baixo Miño e de toda Galicia.

Dentro das grandes preocupacións da Administración Autonómica, é o impacto visual negativo que na paisaxe reflexan as vivendas sen rematar, semiderruidas, os peches de leiras feitos con mezcolanza de materiais de distintas índole, as cores e outros.

Tendo en conta a cantidade de visitantes que recibe o Monte de Santa Trega, a maior crítica que recibe, é a presenza dunha serie de antenas de transmisións e de empresas de audiovisuais e televisión, que escomenzaron a inundar O Facho a partir dos anos 60, sendo incrementada a cantidade das mesmas, colocadas sen ningún tipo armónico e estético, que nalgún caso, xa ten afectado algún do ben patrimoniais arqueolóxicos.

Non debemos esquecer, que o Monte de Santa Trega, ten a consideración de Ben de Interese Cultural, dado que foi declarado Monumento Histórico Artístico Nacional no ano   1931 e o poboado Galaico-Romano de Santa Trega, e o Museo cuia construcción foi diseñada  polo arquitecto Antonio Palacios, foron declarados Monumento HistóricoArtístico Nacional posteriormente, polo que é unha obriga de tódolas administración, a súa conservación e mantenemento, para deixarllo nas mellores condicións posibles aos nosos descendentes.

A Comunidade de Montes en Man Común da Parroquia de A Guarda, considera, que se debe dar inicio dende o Concello, para que ditas antenas, sexan retiradas deste lugar, dando traslado das mesmas ao Monte Torroso, donde esta Comunidade, estaría disposta a habilitar unha parcela na que é existe accesibidade rodada e instalacións básicas.

Por todo elo, a C.M.V.M.C. da Parroquia de A Guarda, ven a presentar ao Pleno para o séu debate e aprobación se procede, a seguinte MOCION:

a).- O Concello, dará inicio a tramitación diante das distintas administración, tanto Autonómica como Estatal, así como cas empresas propietarias de ditas instalacións, a fin de chegar a un acordo para o traslado de ditas antenas, o novo punto de ubicación, ou a dar unha alternativa, que conleve a desaparición das mesmas do Monte de Santa Trega.

 

Xoves, 18 de xaneiro de 2018       

A Guarda estará presente na 38ª edición da Feira Internacional de Turismo (FITUR)

O Concello da Guarda estará presente na Feria Internacional de Turismo de Madrid (FITUR) que este ano celebrará a súa trixésimo oitava edición entre os días 17 e 21 de xaneiro.

A Guarda promocionarase no expositor de Turismo de Galicia e, o xoves ás 12.00 h, estará presente no acto organizado pola Deputación de Pontevedra no que se promocionará o Destino Rías baixas no Ano Europeo do Patrimonio Cultural.

Durante estas xornadas, a delegación da Guarda -formada polo alcalde, Antonio Lomba, a concelleira de Turismo, Montserrat Magallanes e o concelleiro de Patrimonio, Javier Crespo- manterá diversas reunións con maioristas e asociacións de Turismo, co obxectivo de potenciar a promoción da vila guardesa como destino turístico.

Dentro da programación de actividades e encontros da representación guardesa nesta nova edición de FITUR, destaca tamén a participación no acto de entrega do Premio dos Destinos EDEN (European Destinations of Excellence) 2017, que terá lugar no expositor de Turespaña. Tras o acto, a técnica de Turismo do Concello da Guarda, Rosalía Verde, asistirá á reunión técnica dos Destinos EDEN que anualmente se celebra coincidindo coa celebracion da feira.

 

Martes, 16 de xaneiro de 2018       

O BNG esixe ao Concello e á Xunta un proxecto integral para a Praza de Abastos da Guarda

O BNG insta ao alcalde da Guarda e á Consellería de Comercio a afrontar un proxecto de futuro serio para revitalizar a praza de Abastos da localidade.

“Viñeron inaugurar un ascensor, cunha praza baleira e obsoleta. Non se pode seguir con esta política de parches. A Guarda necesita unha praza moderna, cun novo modelo, tal e como fixeron noutros concellos como Tomiño. Para iso necesitamos o compromiso do Concello e da Dirección Xeral de Comercio”, comentou Ángel Baz, portavoz municipal do BNG.

Dende a formación nacionalista, considérase que hai que afrontar un proxecto ambicioso dentro dunha nova visión para a praza de Abastos. Unha praza que debe estar integrada dentro dunha contorna onde as persoas sexan as protagonistas, atractiva aos potenciais compradores e consumidoras, así como un atractivo para o turismo.

Para o BNG, as actuacións que se levan realizando na praza de Abastos, son meros parches, realizados sen informar aos praceiros, que non coñecían as obras a realizar e sen telos en conta.

“Temos claro que calquera actuación na Praza de Abastos debería empezar pola redacción dun proxecto-estudo realizado por especialistas e non dando paus de cego”, subliña Ángel Baz.

O BNG instan ao PP que abandone a actitude do NON polo NON, tal e como levan facendo coa proposta do novo aceso ao Porto da Guarda ou coa reforma de Concepción Arenal.

Os nacionalistas esixen un compromiso serio ao Partido Popular para afrontar unha reforma integral da Praza de Abastos que asegure unha viabilidade dos negocios e que potencie esta infraestrutura como un referente comercial e turístico para a Guarda.

 

Martes, 09 de xaneiro de 2018       

 A Piscina Municipal oferta Pilates, ‘Cross training’ e TRX como novidades esta tempada

Co comezo da tempada 2017-2018, a Piscina Municipal da Guarda amplía e mellora o servizo aos seus usuarios, ofertando novas actividades ‘fitness’ na sala funcional do ximnasio. As novidades nesta tempada son as clases de Pilates, ‘Cross training’ e TRX.

Novas clases e horarios

O  método Pilates consta dun programa de exercicios controlados e precisos a través dos cales se traballa o autocontrol e a consciencia do propio corpo. Esta actividade impártese os luns e os mércores ás 8:45 h e ás 9:30 h, e os martes e xoves ás 19:45 e ás 20:30 h.

O ‘cross training’ defínese como un sistema de acondicionamento físico baseado en movementos funcionais, en constante variación e executados a alta velocidade. As persoas interesadas en practicar esta actividade, poderán facelo os luns e os mércores ás 20:45 h, e os martes e xoves ás 9:45 h.  O TRX, pola súa parte, consiste nun adestramento en suspensión que permite traballar todo o corpo utilizando o propio peso e a resistencia da gravidade. Esta modalidade pode practicarse os venres ás 9:45 e ás 19 h.

As actividades realízanse en grupos reducidos dun máximo de 6 persoas, garantindo a individualización do traballo e o control das usuarias e usuarios por parte do monitor, atendendo ás necesidades específicas de cada persoa.

Actividades de continuidade

Amais destas novidades, continúan as clases de ‘spinning’ e as actividades acuáticas dirixidas (‘aquagym’, ‘aquazumba’, ‘queimacalorías’, ‘aquatraining’, aletas, travesía, ‘matronatación’, iniciación e perfeccionamento) xa ofertadas en anteriores tempadas, pudendo gozar dunha cota a xeito de tarifa plana para o acceso a todas elas.

As inscricións continúan abertas e dependerán da dispoñibilidade de prazas en cada franxa horaria. As persoas interesadas poderán gozar dunha clase de proba e, para máis información, deberán dirixirse á Piscina Municipal, acudindo de xeito presencial, chamando ao teléfono 986 611 412, a través da súa páxina de Facebook (@piscinamunicipalaguarda) ou na páxina web www.piscinamunicipalaguarda.com.

 

 

Mércores, 20 de decembro de 2017       

«Contos contados» retorna este sábado cunha sesión especial sobre as tradicións do Nadal

A Biblioteca Pública Municipal da Guarda organiza este sábado unha nova sesión de «Contos contados», unha actividade de lectura e manualidades orientada ao público infantil que, nesta ocasión, estará dedicada ao Nadal.

A avoa Carmen Baz e o avó Manual Cadilla, «Maruxo», acomparán aos pequenos participantes para contar historias tradicionais do Nadal. O obxectivo da xornada de lectura, que dará comezo ás 11:30 horas, é que os nenos coñezan como vivían estas datas os avós favorecendo, deste xeito, a convivencia interxeracional.

Deseguido, celebrarase un obradoiro de decoración de Nadal no que os cativos poderán contribuír a embelecer a árbore que lucirá na Biblioteca durante estas datas.

«Contos contados» é unha actividade de animación á lectura dirixida ao público infantil que propón un acercamento aos libros de forma creativa e lúdica, favorecendo a participación das familias.

 

A Praza de Abastos loce os adornos feitos no segundo obradoiro infantil «Decora o teu Nadal»

O Concello da Guarda leva varias semanas impulsando a campaña «Decora o teu Nadal», dentro da cal se enmarcan tres obradoiros infantís de decoración propia destas datas para engalanar distintas dependencias municipais. O pasado sábado, 16 de decembro, os cativos de entre 4 e 12 anos participaron no segundo destes talleres, celebrado na Casa dos Alonso, coa finalidade de decorar a Praza de Abastos.

Os nenos desfrutaron durante a mañá creando os seus propios e personalizados adornos en forma de pingüíns e figuras de Nadal, para colocar nas varandas da Praza de Abastos.

O último obradoiro deste ano celebrarase o próximo martes 2 de xaneiro, na Casa dos Alonso a partir das 11:30 horas, e nel os cativos prepararán a Recepción Real dos Reis Magos.

 

Mércores, 13 de decembro de 2017      

As escaleiras do Concello locen os adornos feitos no primeiro obradoiro infantil “Decora o teu Nadal”

O Concello da Guarda impulsou por terceiro ano consecutivo, a campaña “Decora o teu Nadal”. De novo, o seu principal obxectivo é decorar a vila de cara a estas sinaladas datas, contando coa colaboración de asociacións, comerciantes, veciños e nenos.

Os cativos, de entre 4 e 12 anos de idade, participaron o pasado sábado 9 de decembro no primeiro obradoiro de decoración de Nadal, que se celebrou  na Casa dos Alonso, coa finalidade de decorar o Consistorio.

Os nenos desfrutaron durante a mañá creando os seus propios e personalizados adornos para colgar nas súas respectivas árbores de Nadal. Estas últimas deseñáronse seguindo o modelo que comerciantes e veciños e veciñas aprenderon a realizar previamente no obradoiro “Decora o teu Nadal” a finais de novembro, aínda que dun tamaño menor.

Os seguintes obradoiros celebraranse o sábado 16 de decembro, pensando en decorar a Praza de Abastos, e o martes 2 de xaneiro co fin de preparar a Recepción Real dos Reis Magos. Ambos terán lugar na Casa dos Alonso a partir das 11:30 h.

 

Venres, 8 de decembro de 2017     

Salcidos en Blanco y Negro” presentarase o 22 de decembro no Centro Cultural da Guarda

          Despois de meses de traballo, e froito do proxecto que naceu en xaneiro do 2013 a través dun grupo da rede social facebook, “Salcidos en Blanco y Negro” toma forma de libro co mesmo título con 192 páxinas nas que se reproducen arredor de 400 fotografías.

          O libro foi sufragado polas aportacións dos veciños que montaron o que eles mesmos bautizaron como “crowdfunding de aldea”, adquirindo por adiantado os libros a través duns vales.

          A presentación será o venres 22 de decembro as 20:30 horas no Centro Cultural da Guarda, con entrada libre, onde ao rematar o acto duns 20 minutos, proxectararase, por cortesía de Grupo Sanroquiño, a película “O Pisco” que trata do estraperlo entre España e Portugal a mediados do século pasado, e do que Goian, e tamén Salcidos, ten moito que contar.

          O evento ademais servirá para que os que adquiriron os vales poidan retirar o libro, aínda que tamén poderán facelo nos establecementos que colaboraron na venta, a partires do día seguinte. Haberá tamén algúns exemplares á venda para aqueles que non tiveron a oportunidade ou non quixeron compralo por adiantado.

 

Sábado, 2 de decembro de 2017    

O proxecto da Deputación para a mellora integral da rúa Concepción Arenal na Guarda transformará a estrada nun espazo para as persoas

O proxecto de mellora integral elaborado pola Deputación de Pontevedra para a rúa Concepción Arenal na Guarda dará prioridade ás persoas. Segundo indica o deputado de Mobilidade Uxío Benítez, a actuación pretende recuperar o espazo público para ose veciños e fomentar un modelo de convivencia co tránsito rodado, sempre coa filosofía de que a circulación peonil debe ser a principal. En calquera caso, o deseño e características da vía permitirán que, só de xeito provisional, poidan circular por ela “as necesidades de tráfico hoxe demandadas” con velocidades máximas de 30 quilómetros por hora.

Segundo dixo o nacionalista, a intención deste deseño para Concepción Arenal é seguir as indicacións do Plan de Mobilidade redactado pola Deputación e presentado en febreiro deste ano, e facilitar e promover os tránsitos peonís cara ao Porto, que a día de hoxe se vén constrinxidos polo fluxo de tráfico rodado e a existencia de beirarrúas mínimas, en mal estado, e con nula accesibilidade.

Benítez lembrou que a Deputación ten xa deseñado un estudo de trazados alternativos de acceso ao Porto para o tráfico pesado, o que permitirá liberar de vehículos a actual estrada provincial, que deberá cambiar a súa tipoloxía cara a unha vía máis urbana e amable para os veciños da Guarda. “Concepción Arenal concibiuse como unha estrada de acceso ao Porto, e agora é a rúa que estrutura o espazo público de A Guarda, cunha grande actividade comercial. Cómpre transformala nun exemplo de espazo público para as persoas que fomente a mobilidade peonil e ciclista”, asegurou o deputado.

Así mesmo, o nacionalista destacou que “urxe que a Xunta de Galicia faga un novo acceso para o tránsito de vehículos pesados ao Porto”, lembrando que é unha competencia do goberno galego mellorar tamén os accesos á área portuaria da Guarda igual que se fixo noutros municipios. “Non é normal que en 30 anos non se mellorase o acceso ao porto nesta vila”, dixo, para engadir que a Deputación remitiu onte ao Concello a documentación sobre os trazados alternativos posibles, que será presentada publicamente nas vindeiras semanas.

Espazo de calidade nunha reforma integral

A proposta provincial consiste na reforma integral dun treito de 590 metros da estrada EP-3401 de acceso ao Porto, dende a intersección coa PO-552 ata a contorna de igrexa e hotel convento de San Bieito. O proxecto resólvese nunha plataforma única co mesmo nivel para beirarrúas e tráfico rodado, xogando con diferentes materiais e texturas para os pavimentos.

Na actuación inclúese a creación dunha grande praza na fronte do convento de San Bieito, onde se propoñen dúas zonas de lecer, a adecuación dos xogos infantís existentes e a mellora da zona de acceso á igrexa, así como un novo tratamento para a praza de Avelino Vicente. En ambos casos o criterio será a eliminación dos aparcamentos existentes e a recuperación da maior cantidade de superficie como espazo público para a cidadanía.

A maiores, o proxecto inclúe melloras en diferentes servizos urbanos (abastecemento de auga, saneamento, instalación da rede de gas, novo alumeado, xardinería, mobiliario urbano e sinalización para toda a zona de actuación). O importe total ascende a 1.598.755,98 euros que se financiarán ao 70% por parte da Deputación de Pontevedra e ao 30% por parte do Concello, segundo se establece no convenio que ambas institucións asinarán en vindeiras datas e que foi aprobado onte en Xunta de Goberno. O prazo de execución das obras será de oito meses logo de que se adxudiquen os traballos e se asine a acta de replantexamento. Unha vez rematada a actuación, a estrada será transferida ao Concello.

Dous treitos diferenciados

O proxecto para Concepción Arenal divídese en dous treitos diferenciados. O primeiro vai dende o cruzamento coa rúa Enrique María Sesto ata o hotel convento de San Bieito e pretende consolidar a vía para un uso mixto onde convivan o tráfico e a circulación peonil, transformando o espazo do convento, potenciando as súas características monumentais e aproveitando o espazo público existente.

Na intersección coa rúa Praza de San Bieito proponse unha área de descanso e reunión a ámbolos dous lados da mesma, cun espazo verde con árbores e bancos e, do outro lado, unha pérgola con trepaneras vexetais acompañada tamén de bancos. A rúa resólvese nun mesmo nivel e xógase cos materiais e texturas, de forma que a parte estritamente peonil levará lousa e a parte rodada unha base de formigón negro grafito con bandas transversais.

Ao chegar á igrexa producirase un cambio na conformación do solado, cunha maior presenza de pedra arredor das construcións relixiosas, que pasarán a ser o elemento que domina o ámbito. Incorpóranse ao espazo público a zona de acceso aos edificios mencionados, a entrada á casa do pescador, e a zona de xogos. Crearanse elementos singulares de formigón que funcionarán como mobiliario urbano en forma de ‘engurras’ sobre o chan. Estes axudarán a diferenciar as zonas de circulación e conterán a zona de xogos, marcando dúas áreas claras.

A segunda zona do proxecto de Concepción Arenal vai dende o cruzamento coa PO-552 ata a rúa Enrique María Sesto, e inclúe o tratamento da Praza Avelino Vicente. Os criterios a seguir serán os mesmos que na anterior zona: un único nivel con diferentes materiais para os pavimentos e elementos de formigón a modo de mobiliario urbano.

A praza consolidarase arredor do monumento existente con dúas áreas de descanso diferenciadas: unha delas en forma lonxitudinal sobre unha das dúas fachadas acompañada de árbores e zonas de lecer, e a outra área disposta arredor dun dos elementos de formigón, con bancos e zonas verdes.

Cambiar dinámicas

Pola súa banda, o alcalde de A Guarda, Antonio Lomba, manifestou que Concepción Arenal pasará a ser unha rúa moito máis accesible e, sobre todo, “incorporará dous espazos que mellorarán moito a zona de Avelino Vicente e do convento de San Bieito. Esas dúas zonas permitirán o disfrute do espazo público por parte da veciñanza e cremos que permitirán un cambio de dinámica porque agora son un aparcadoiro de coches: a partir da reforma integral serán máis cómodos e terán máis calidade para o seu uso”.

Finalmente, o deputado Uxío Benítez quixo lembrar que a actuación do actual goberno provincial para Concepción Arenal supón unha obra integral cunha filosofía clara de apostar polas persoas. Neste sentido, lembrou que a única actuación que a Deputación fixera nesta estrada remóntase aos anos 2005 e 2006 cando se actuou apenas nun treito da rúa para construír beirarrúas de 1,5 metros de largo cun orzamento que apenas superaba os 400.000 euros . “Nunca houbo unha obra cunha concepción integral e un plantexamento serio. O único que fixo o PP na Guarda foron anacos de beirarrúas”, sentenzou en relación ás últimas críticas.

 

Venres, 1 de decembro de 2017    

O PP da Guarda critica o convenio da rúa Concepción Arenal entre Concello e Deputación

O PP da Guarda considera que o convenio asinado entre o goberno local da Guarda e a Deputación de Pontevedra non é beneficios  para o concello no sentido de que obriga á administración local a pagar un 30% do custo das obras, cando nun principio a rúa ten titularidade provincial.

“Como exemplo están  as obras que comezan hoxe na rúa do porto de titularidade de Portos de Galicia vainas financiar  ao 100% a Xunta de Galicia, a pesar de que o Alcalde nunha nota parece que quere atribuírse, as obras. Outro exemplo son as obras no dique de abrigo do porto, cun orzamento que pode superar o millón de euros tamén as financia a Xunta ao 100% por ser  titularidade de Portos de Galicia, non obstante na rúa Concepción Arenal ten que poñer o Concello da Guarda case 500.000 euros cando a titularidade é da Deputación de Pontevedra, e cando eses cartos estaban destinados a outras obras tan necesarias no concello” explica a voceira do PP, Conchi Ortega.

Segundo os populares, o decálogo de estradas de Deputación impón porcentaxes abusivas aos pequenos concellos cando aportan grandes cantidades para as cidades como Vigo ou Pontevedra, por razóns que todos coñecemos.

Neste mesmo sentido sinala que “se a Deputación pode pagar 45 millóns de euros en instalacións de titularidade  municipal en grandes concellos que teñen recursos propios, non entendemos porque se devolve a titularidade desta rúa ao Concello da Guarda, que non é unha grande cidade, e máis tendo en conta que a Deputación acaba de privatizar o servizo de mantemento de viais da súa titularidade para os seguintes catro anos por un montante de 20 millóns de euros, dos que non vamos a poder beneficiarnos por aceptar a devolución da rúa a Guarda neste mal convenio”. 

Por outra parte, os populares consideran vergonzoso que o Goberno local lle oculte o proxecto a veciños e empresarios. “Aos membros da oposición deixáronos que o revisáramos uns días antes do pleno, pero vixiados, nin nos deixaron velo detidamente nin tampouco facerlle copias para poder analizalo en profundidade, parece ser que por orde do propio alcalde, pero aos veciños e asociacións empresariais nin iso, quizais por medo a que llo criticasen”, sinala Conchi Ortega.

Non soluciona o problema de tráfico

Os populares consideran ademais que o convenio non é beneficioso porque o proxecto non vai solucionar, ao seu parecer, os problemas de tráfico.

“O que puidemos deducir no pouco tempo que puidemos revisar o proxecto, é que a idea do Goberno local é peatonalizar esa rúa nun futuro, o que dende esta obra supón unha perda considerable de aparcamento de inmediato (na propia rúa, en Avelino Vicente , na rúa Coruña, e na zona do Hotel Convento), tan necesario na Guarda, e que este proxecto non garante a saída de camións e autobuses ao porto”, explica Ortega.

“O gran problema da outra obra que fixo hai anos a Deputación era que non se podía saír por Concepción Arenal ao ser de sentido único e agora resulta que neste proxecto non se ve o dobre sentido por ningunha parte, polo que se seguirá producindo o embudo na rúa Enrique María Sexto”.

Conchi Ortega explica ademais que “se o Goberno local vai gastar 500.000 euros das arcas municipais nas obras desta rúa, cando a titularidade era da Deputación, e non se soluciona o problema de tráfico, non podemos aplaudir ese convenio porque definitivamente nos parece  que non é bo, pero o que non se pode consentir é que traten de enganar aos veciños dicindo que o Partido Popular está en contra desas obras porque é absolutamente falso, é máis foi o PP o que pediu en varias ocasións que se realizasen esas obras na rúa Concepción Arenal, o PP está en contra desta negociación entre PSOE e BNG,  tirante, que levou mais de  dous anos, entre os partidos que gobernan a Deputación sen moita sintonía entre eles, xogando a ver que se pon as medallas, e o final o resultado prexudicial é para o orzamento guardés, para as prazas de aparcamento, para a circulación de entrada e saída no porto, todo polas desavenencias entre eles”.

 

Martes, 28 de novembro de 2017    

A Guarda conmemorou o Día Internacional contra as Violencias Machistas con teatro, cinema e música

A Concellería de Igualdade e o Centro de Información ás Mulleres (CIM) do Concello da Guarda promoveron dende o pasado xoves unha serie de actividades culturais con motivo do Día Internacional para a Eliminación da Violencia contra as Mulleres, que se conmemorou o pasado 25 de novembro. Teatro, cinema e unha actuación musical completaron a oferta cultural na vila guardesa, á que se uniron centenares de persoas.

A programación deu comezo o pasado xoves, 23 de novembro, coa proxección de «Lurna»  no Centro Cultural. A curtometraxe, dirixida polo guardés Nani Matos, mostrou aos máis de medio centear de persoas asistentes a historia, baseada nun caso real, dunha muller senegalesa que abandona o seu país na procura dunha vida mellor. Lurna, protagonista da trama, termina sendo vítima da explotación sexual.

O director do filme e o Subinspector da Policía Nacional na sección de estranxeiría, Suso Conde, iniciaron deseguido un coloquio sobre a explotación sexual feminina como máxima expresión da Violencia de Xénero. Propiciouse, así, un debate moi participativo no que o público mostrou gran interese tanto polos aspectos máis cinematográficos relacionados coa rodaxe como pola problemática da trata de seres humanos na actualidade. O Subinspector aportou ao respecto a súa experiencia na intervención en casos de explotación sexual e achegou a esta curtametraxe a súa visión dende o ámbito legal e policial.

Xa na mañá do sábado, 25 de novembro, tivo lugar na Casa dos Alonso un acto institucional conmemorativo no que a concelleira de Cultura, Educación e Xuventude, Elena Baz; a concelleira de Servizos Sociais, Sanidade e Igualdade, Teresa Vicente; a concelleira de Turismo, Facenda e Desenvolvemento Económico, Montserrat Magallanes; e o alcalde do Concello da Guarda, Antonio Lomba, procederon á colocación dunha pancarta na que se pode ler a mensaxe: «Contra todas as Violencias Machistas».  

Deseguido, o rexedor local dirixiuse aos asistentes para «manifestar a máis absoluta e enérxica condena ante as situación de violencia que, aínda que pareza inconcibible, continúan a producirse». Nesta liña, subliñou Lomba,  «non podemos caer no perigo dede normalizar os asasinatos por Violencia de Xénero, xa que estamos a ser testemuñas de como estas novas se convirten nunha máis nos telexornais e diarios, e as cifras son realmente arrepiantes». Así, referiu o alcalde, 45 mulleres foron asasinadas no que vai de ano, e 3 máis atópanse en proceso de investigación. Amais, 28 menores quedaron orfos a causa dos asasinatos machistas.

Estes datos, engadiu o alcalde, «teñen que facernos reflexionar sobre o que está acontecendo, por iso é tan importante levar a cabo iniciativas tendentes a mellorar a prevencións a través do incremento de medidas de sensibilización e educación». Nesta liña, «dende o Concello da Guarda asumimos o noso compromiso nesta loita contra calquera acto que atente conta a integridade e a dignididade das mulleres, apoiando as vítimas e transmitindo ás xeracións futuras o respeto, a igualdade entre mulleres e homes, e a defensa dunha sociedade xusta e igualitaria na que podamos participar libre e equlibradamente en todos os ámbitos e tomar conxuntamente as decisións que nos afectan», concluíu Antonio Lomba.

O grupo Cintaadhesiva pechou o acto cunha actuación poético-musical na que os versos, os sons e as imaxes se mesturaron ofrendo unha experiencia musical totalmente orixinal, e orientada á lembranza das vítimas da violencia machista e a defensa da igualdade entre mulleres, homes, nenas e nenos.

O broche de ouro da programación cultural conmemorativa do 25N viu da man da representación teatral «Nacidas libres». O Centro Cultural encheuse para visualizar a obra, na que se relata a historia de catro actrices que deciden emprender e montar uha peza inspirándose nunha noticia aparecida nos xornais sobre tres monxas indias retidas nun convento de Santiago de Compostela contra a súa vontade. A partir desta trama, o espectáculo ofreceu ao público múltiples reflexións sobre a liberdade, a desigualdade e os condicionantes culturais, todo elo dende a perspectiva de xénero e sen perder o humor.

 

Luns, 27 de novembro de 2017    

Gobierno y BNG guardés dan via libre a un convenio redactado por la diputación provincial de pontevedra para la ejecución de Concepción Arenal que Fátima Iglesias considera con financiación injusta

En el último pleno ordinario de la corporación guardesa celebrado el pasado viernes 24 de Noviembre, se aprobó con el voto favorable del BNG, la propuesta del equipo de gobierno socialista para la firma del convenio de colaboración con la Diputación Provincial de Pontevedra para la ejecución del proyecto de "Recuperación de espazos e Mellora de Mobilidade Peonil na estrada provincial-Acceso Porto", lo que es lo mismo, Concepción Arenal.

Un convenio para ejecutar un proyecto que, según Fátima Iglesias, desconoce la oposición y los vecinos, actuando el gobierno con total falta de transparencia ante una obra que implica a todos. Este es uno de sus argumentos para justificar su posicionamiento ante la propuesta, pero además, con el agravante del financiamento que implica: -la financiación de la obra es injusta para el pueblo de A Guarda y las arcas municipales y desigual frente a otros concellos, que nos conllevará tener que aportar el 30% del importe  total, casi 500.000€ en 3 anualidades-. Seremos los vecinos de A Guarda los que paguemos el necesario y urgente arreglo de un vial que no nos pertenece, que es de titularidad  provincial y firmamos además el compromiso de hacernos cargo del mantenimiento a partir de la entrega de la obra.

Según la concejala, -hay concellos cercanos que han negociado acuerdos de ejecución de actuaciones conjuntas aportando apenas un 10% del importe y cediendo la responsabilidad del mantenimiento al ente provincial, por tanto, quiero dar a conocer que este convenio es injusto, debemos exigir un trato igualitario, es más, exigir que la Diputación Provincial de Pontevedra financie sus obras.

 

Sábado, 25 de novembro de 2017    

O PP guardés considera que debe ser a Deputación a que asuma o custo do GES da Guarda

O PP da Guarda presentou unha moción para o seu debate na próxima sesión plenaria na que pide ao Goberno Local que inste á Deputación de Pontevedra a que asuma o custo económico do Grupo de Emerxencias Supramunicipal do Baixo Miño.

A voceira, Conchi Ortega, sinala que lle corresponde á Deputación de Pontevedra, segundo se recolle no artigo 49 da Lei de Emerxencias, a competencia en materia de emerxencias, en concellos de menos de 20.000 habitantes, algo ao que o PSOE votou en contra en Deputación, a pesar de que si foi aprobada esta medida en administracións provinciais como as de Ourense ou Lugo.

“Cremos que o alcalde ten que traballar polo Concello e polos seus veciños e non estar tan pendente do que faga o seu partido en Deputación, onde o que menos lles preocupa, polo que parece neste dous anos de goberno bipartito, son os concellos”, sinala Conchi Ortega.

Nesta liña, Ortega explica que o Concello da Guarda está pagando un servizo supramunicipal, que ten un custo anual, segundo a conta xeral recentemente aprobada por outras formacións políticas de 300.594,54 euros. “o GES de A Guarda non pode ser menos que calquera de Lugo ou Ourense, ese cartos saen de todos os veciños da Guarda, porque ao contrario do que fai calquera alcalde que é mirar polo interese dos seus veciños, o alcalde da Guarda prefire pagar o GES sen intentar que sexa a Deputación a que asuma o seu pago e por riba non ter unha ordenanza, por desidia, que regule as taxas a cobrarlle ás aseguradoras por cada unha das intervevcións que se realizan”.

A voceira popular lamenta que a pesar de que pasou dous anos e medio da súa proposta, o Goberno Local se nega a presentar ante pleno unha ordenanza para cobrar os servizos que o GES lle fai aos seguros, a situación siga exactamente igual.

Conchi Ortega lamenta que o alcalde tome decisións políticas mirando polo interese do seu partido en Deputación e non polo interese dos veciños da Guarda nin polos intereses dos propios traballadores do GES, que “nin cobran os salarios acordes coa categoría profesional que lles corresponde, que teñen que ver como as baixas por paternidade quedan sen cubrir e que teñen que traballar nunhas instalacións moi deficientes, por no calificarlas de outro xeito”.

Conchi Ortega espera que o alcalde recapacite e que acabe dándolle a razón ao Partido Popular, que leva reclamando melloras de financiamento do GEs en cada un dos plenos celebrados desde o comezo da presente lexislatura. A Portavoz sinala: “recordamos este problema en todos os plenos, estes cartos do orzamento que van para o GES poderían adicarse a emerxencia social e mantemento de rúas na Guarda, duas partidas con necesidades urxentes”

 

Venres, 24 de novembro de 2017    

Petiscos con arte emprende a súa derradeira fin de semana con máis de 1.000 racións xa servidas

A ruta gastronómica “Petiscos con arte” finaliza esta fin de semana con máis de 1.000 petiscos servidos durante os seus tres primeiros días.  

A iniciativa, na que participan 15 establecementos guardeses, combina as exposicións artísticas de pintura, escultura e fotografía, coa gastronomía en pequeno formato a un prezo único de 1,50 euros a degustación.

As persoas interesadas en realizar o percorrido gastronómico e artístico dispoñen dun folleto informativo no que se recollen todos os locais participantes, cunha fotografía e descrición do petisco ofertado e unha breve referencia ao artista e ás obras que se poderán contemplar en cada un deles.

O percorrido pode realizarse venres, sábado e o domingo, de 12:00 a 14:00 horas e 18:00 a 21:00 horas.  Cada participante na ruta en calidade de comensal recibirá unha papeleta coa que poderá participar no sorteo de 5 lotes de viño albariño da Adega Gran Novás, colaboradora nesta iniciativa gastronómica. Para participar no sorteo, que se celebrará o próximo 29 de novembro, soamente será necesario degustar un petisco e, posteriormente, cubrir e depositar o boleto debidamente cumprimentado nos buzóns dispoñibles en cada un dos locais participantes.

 

Martes, 21 de novembro de 2017    

Aberto o prazo de inscrición nos obradoiros infantís da campaña «Decora o teu Nadal»

A Concellería de Cultura do Concello da Guarda organiza tres obradoiros de decoración de Nadal pensados para nenos de entre 4 e 12 anos, dentro das actividades programadas na campaña Decora o teu Nadal «Decora o teu Nadal».

Os máis pequenos poderán aprender a construír adornos de Nadal para decorar o Concello, a Praza de Abastos e a Recepción Real, os sábados 9 e 16 de decembro e o martes 2 de xaneiro, respectivamente. Todos os obradoiros realizaranse na Casa dos Alonso, de 11:30 a 13:30 horas.

O prazo de inscrición estará aberto ata o 4 de decembro e poderá realizarse de maneira presencial no Departamento de Cultura, chamando ó 986 610 000 (ext. 5) ou enviando un correo electrónico á dirección cultura@aguarda.es.

 

O BNG presenta moción polo 25 de novembro, día da non violencia de xénero

O Bloque Nacionalista Galego presentou unha moción co gallo do 25 de novembro “Día da Non Violencia de Xénero”.

Dende o BNG existe constancia de que se rexistraron en Galiza, cando menos 55 feminicidios entre 2010 e o que vai de 2017. Pontevedra tivo no ano 2015 a tasa máis alta de Galicia e a terceira máis alta do estado español.

O BNG insiste en que se debe comprometer ás institucións, destinar maiores recursos económicos, humanos e materiais para este fin. Estamos por transformar a sociedade na que vivimos, reducindo a fortaleza do patriarcado, e a subordinación ao xénero masculino superando a desigualdade e a violencia que sofren as mulleres.

“Dende o BNG traballamos para avanzar na concreción do pacto galego contra a violencia machista e destinar o 1% do orzamento do 2018 á prevención e loita contra a violencia, aumentar e mellorar os recursos xudiciais, acompañamento das mulleres e que sexan atendidas por persoal especializado,durante o proceso xudicial. Polo que pedimos o compromiso das corporacións ás mobilizacións locais e nacionais”, comentou Merchi Martínez, concelleira do BNG na Guarda.

 

bado, 11 de novembro de 2017    

Manual de instrucións para educar continúa o martes cunha charla sobre intelixencia emocional

O ciclo de charlas Manual de instrucións para educar” retorna o próximo martes, 14 de novembro, cun faladoiro titulado Educar en intelixencia emocional, guiado pola psicóloga familiar María Jesús Núñez.

Esta segunda sesión do ciclo dedicarase ás emocións como chave para realizar unha intervención eficaz, aportando ferramentas para identificar as emocións e expresalas dende cativos. Deste xeito, acadarán un maior autocontrol e os conflitos poderán resolverse sen complicacións.  

Duelo infantil. O neno ante as múltiples perdas é o título da terceira charla, que se celebrará o 28 deste mes e estará dirixida polo psicólogo Esteban Figueirido. Neste encontro, analizarase como funcionan as perdas nos cativos e cativas (dende algún xoguete ata outras de maior impacto, como a separación dos pais ou falecemento de seres queridos) para axudarnos a acompañalos mellor e evitar posibles secuelas.

O derradeiro encontro, o 12 de decembro, dedicarase ás Maneiras creativas de resolver conflitos”, isto é, nas distintas formas de abordar os momentos críticos “con algo de humor e creatividade”, segundo apunta Figueirido, director da charla.

Manual de instrucións para educar” é unha iniciativa do Programa de Educación Familiar e a Oficina Municipal de Información á Xuventude (OMIX) da Guarda, orientada a ofrecer un espazo de reflexión e experiencias compartidas que axuden aos pais, nais e educadores/as a lograr o pleno desenvolvemento das nenas, nenos e adolescentes para facilitar a convivencia familiar.

Todos os encontros desta segunda edición do ciclo terán lugar na Casa dos Alonso ás 19:30 horas. Dende o Concello da Guarda animamos a todas as persoas con inquedanzas e interese educativos -sexan  pais e nais, avoas e avós, educadores e educadoras, así como veciñas e veciños-  a participar nestas charlas e axudar a crear un espazo enriquecedor no que aprendamos xuntos como acadar unha mellor convivencia familiar nos fogares da nosa vila.

 

Venres, 3 de novembro de 2017    

Nuevas fechas para el curso de Primeros Auxilios en Bebés y niños impartido por Cruz Roja Baixo Miño

            Cruz Roja Baixo Miño organiza un nuevo curso de Primeros Auxilios en bebés y niños, baremable para el SERGAS, con una duración de 10 horas teórico – prácticas, que se celebrará los días 18 y 28 noviembre.

            El objetivo general es capacitar a los alumnos para desarrollar correctamente su actuación ante una urgencia, así como facilitar la adquisición de conocimientos y un nivel adecuado de formación en cuanto a los contenidos.

            En su estructura el curso incluye los siguientes módulos: a. El envejecimiento; b. Objetivos; c. ¿Qué es el socorrismo? ;d. Pauta Generales de actuación ante una situación de emergencia; e. La cadena de supervivencia; e. Conceptos; f. Reanimación cardiopulmonar básica en adultos; g. Posición Lateral de seguridad; h. Movilidad y manejo urgente de las víctimas; i. Exploración Secundaria; j. Obstrucción de la vía aérea por cuerpo extraño; K. Hemorragias; l. Quemaduras; M. Electrocución; N. Heridas; O. Traumatismos; P. Intoxicaciones; Q. Mordeduras y picaduras de animales; R. Urgencias médicas; S. El Botiquín; T. Prevención de accidentes.; U. Bibliografía.

            La acción formativa se llevará a cabo en A Guarda, todas las personas interesadas pueden solicitar más información en Cruz Roja Baixo Miño, situada en la C/ Agustín Nandín Lomba, nº1 bajo o llamando al teléfono 986-61 46 09 o 6063484741; en horario de 8:00 a 15:00h y de 16:00 a 19:00.

            El plazo de inscripción acaba el 15 De Noviembre  el número de plazas es limitado, y la realización del curso queda sujeta a que se cubra el número de plazas. El coste del curso será de 40€.

http://www.cruzroja.es/principal/web/formacion/informacion-curso?cod_curso=409237

 

O Concello da Guarda organiza unha nova andaina  entre Leiro e Pazos de Arenteiro

Dada a boa acollida das últimas andainas organizadas, a Concellería de Deportes do Concello da Guarda decidiu propor a celebración dunha nova andaina para o próximo sábado 11 de novembro.

Malia que primeira proposta foi coñecer o Monumento Natural Pena Corneira,  o percorrido tivo que ser modificado por mor da vaga de lumes do pasado mes de outubro, que afectou notablemente a zona e fai desaconsellable a súa visita.

Así as cousas, a nova ruta, duns 15 quilómetros, será pola zona de Leiro en dirección a Pazos de Arenteiro. O percorrido transcorrerá pola provincia de Ourense, comezando na localidade de Leiro e percorrendo a comarca do Ribeiro, unha zona rural con abundante bosque e vilas que se viron afectadas polo despoboamento.

En Leiro, partirase baixando ao río Avia. Cruzarase por unha vella ponte, atopando así  unha ponte colgante e o cámping, hoxe en día pechado, que era lugar turístico nos meses de verán.

A andaina continuará por vellos camiños ata chegar a Pazos de Arenteiro, no municipio de Boborás, lugar que -como o seu nome indica- comprende numerosos pazos e moita historia tras os seus muros. A ruta concluirá de novo en Leiro despois de pasar pola aldea abandonada de Viñoa.

Como remate desta xornada, está prevista unha breve visita  á vila de Ribadavia, cun percorrido polo seu casco histórico, o barrio xudeu e o castelo, centro da coñecida “Festa da Istoria”.

 

Mércores, 1 de novembro de 2017    

Concurso de cabazas da Cafetería Avenida

 

Premer na foto para ver máis