PORTADA

NOTICIAS  

A GUARDA

TUI

O ROSAL

OIA

TOMIÑO

BAIXO MIÑO

LOCAL

OUTRAS NOVAS

DEPORTE

AXENDA

NECROLÓXICAS

ENTREVISTAS

COMUNICADOS

PORTUGAL

HEMEROTECA

PÁXINAS

 REPORTAXES

CONCELLO DA GUARDA

RÚAS DA GUARDA

VARIA

FOTOSAYER

FOTOS LECTORES

PATRIMONIO arquivo e documentación

XENTES de Ribadavila

Calendario

ENLACES

 
 
 

 

galiciasuroeste                                             Informativo Baixo Miño

 

Venres, 26 de maio de 2017   

O PP do Baixo  Miño denuncia o deterioro das estradas provinciais da comarca

A voceira do grupo provincial do Partido Popular, Nidia Arévalo, reuniuse cos alcaldes e voceiros do PP da comarca do Baixo Miño, para interesarse polas necesidades e demandas dos seus concellos. Todos coincidiron en denunciar o importante deterioro que sofren as estradas provinciais, que na maior parte dos casos teñen tramos co asfalto deteriorado, sen pintar e coas cunetas sen limpar. Os populares acusan ao Bipartito da Deputación de Pontevedra de estar deixando de lado o mantemento destas vías e, polo tanto, a seguridade dos seus usuarios.

Nesta liña, Nidia Arévalo sinalou que, desde que o Bipartito PSOE-BNG asumiu o goberno provincial, o abandono das estradas provinciais é unha realidade, e consecuencia desta desidia é o estado que presentan. “A maior parte das estradas provinciais dan pena, nunca estiveron así, pero o problema é que levan xa dous anos sen ningún tipo de mantemento”, critica. Por iso, a voceira lamentou que eliminasen o plan de mantemento para as estradas provinciais, que no anterior mandato permitiu mellorar en toda a provincia o asfalto e as condicións das vías.

Como exemplos na comarca, sinalan o estado das estradas Cerquido-Borralliño e Entenza-Soutelo, ámbalas dúas en Salceda de Caselas, ou Torneiros-Mosende e Mosende-Morgadáns, no Porriño.

No caso de Salceda, o presidente local do PP, Santiago Rodríguez, criticou que no proxecto que está previsto para Cerquido e Borralliño non contemplan unha mellora integral da seguridade viaria, mentres que para a estrada Entenza-Soutelo, que precisa de un mantemento urxente, tamén reclama unha mellora integral.

Pola súa parte, o presidente local do PP do Porriño, Alejandro Lorenzo, denunciou o lamentable estado das estradas de Torneiros-Mosende e Moseden-Morgadáns. Os populares visitarán proximamente estas vías para comprobar o seu deterioro, e presentarán unha moción no pleno do Porriño para pedir o seu pintado e a súa limpeza.

No caso da Guarda, Conchi Ortega lamentou que despois de case dous anos esperando a que Carmela Silva cumprise a súa promesa coa rúa Concepción Areal, o que ofrecen agora é un lavado de cara. Foi a raíz da última visita que os populares fixeron a este concello para denunciar os atrasos, “non se fixo nada da reforma prometida, agora temos parches e novos aprazamentos”, lamentou.

 

O goberno de Carmela Silva achega case 325.000 euros para novos investimentos en tres concellos do Baixo Miño

A Presidenta da Deputación de Pontevedra, Carmela Silva, anunciou a aprobación, na vindeira Xunta de Goberno da institución provincial, de novas achegas, por valor de 323.835 euros, ao abeiro da liña 1 do “Plan Concellos 2017”, para A Guarda, Tomiño e Tui que investirán na urbanización e mellora de camiños e rúas e na rede de saneamento.

A Guarda recibirá 160.216,68 euros, destinados á urbanización da Rúa subida a San Amaro entre os números 1 e 12, o que supón que este concello ten xa adxudicado o 65,16 por cento do orzamento que lle corresponde do “Plan Concellos 2017”.

Tomiño recibirá 96.207,02 euros, para acondicionar a estrada de Cristelos, no cruce de San Miguel e conexión co cemiterio de Barrantes. Ata o momento, este concello ten adxudicado o 62,94 por cento do orzamento que lle corresponde do “Plan Concellos 2017”.

Pola súa banda, Tui beneficiarase de 67.412,37 euros, para a ordenación de rotondas e entornos no concello. Con esta axuda, Tui recibiu o 59,92 por cento das achegas correspondentes ao Plan Concellos deste ano.

 

Xoves, 25 de maio de 2017   

AgruDeBaM estará presente en el Campeonato Provincial de Bádminton

El domingo 28 de mayo, se celebrará el Campeonato Provincial de Bádminton en el Pabellón Álvaro Pino de Ponteareas, de 9.30 a 14 horas, con la participación de los deportistas de AgruDeBaM con equipos de las categorías Benjamín Mixto, Alevín Masculino A y B, Infantil Femenino y Cadete Masculino

 

Sábado, 20 de maio de 2017   

A campaña da Deputación do certificado de calidade turística SICTED acada un centenar de novas adhesións

                A Presidenta da Deputación de Pontevedra, Carmela Silva, subliñou que a campaña iniciada pola institución provincial para aumentar o número de empresas co certificado de calidade turística SICTED foi todo un éxito ao cifrar en cen empresas as que solicitaron a súa adhesión “incluso hoxe mesmo coñecemos que o Parador de Turismo de Tui pediu tamén a súa adhesión ao SICTED”.

                Carmela Silva recordou que a campaña de promoción para a implantación do certificado de calidade  do Sistema Integral de Calidade Turística Española en Destinos (SICTED) entre o sector turístico da nosa provincia concluíu o pasado martes coa última xuntanza celebrada en Tui, con xuntanzas anteriores feitas en Vigo, Pontevedra, Silleda, Vilagarcía, Cambados, Bueu, A Guarda e Cuntis. Nesta campaña, a Presidenta da Deputación destacou que se fixeron dez xuntanzas comarcais para presentar o selo de calidade ao sector turístico de cada zona  pero, que a campaña é moito máis ampla xa que ofrece todo o asesoramento e formación necesaria para que cada empresa que queira adherirse poda superar os exames.

Silva subliñou que “o resultado destas dez xuntanzas ao longo da provincia foi espléndido. Acadamos un resultados moi por riba das nosas previsións, que como sempre eran moi cautas. Calculamos un obxectivo de aumentar nun vinte por cento o número de empresas co certificado SICTED e neste intre  xa estamos por riba do 50%”.

Ate finais de 2016, na provincia de Pontevedra 203 empresas contaban con este certificado e “tras a campaña destes primeiros meses do ano acadamos outras cen firmas, de dezaseis concellos,  que van desenvolver o seu certificado de calidade. Entre as novas adhesións destacan 12 restaurantes da provincia e as primeiras empresas de organización de congresos, aluguer de embarcacións, convention bureaux, turismo industrial e campo de golf.

Por outra parte,   Carmela Silva tamén quixo facer unha valoración do proxecto “Degusta Europa: A gastronomía do Camiño” que tivo a participación de doce mil persoas, dúas mil máis que no ano anterior. “Este é un proxecto que cun orzamento moi pequeno, ponse en valor a nosa gastronomía cos produto do día, os nosos mercados e a alta calidade que ten a formación dos nosos profesionais en hostalería porque como recordarán todas as degustacións foron feitas polo alumnado das dúas escolas  de formación profesional da provincia Carlos Oroza e o Manuel Antonio”, destacou Silva.

“Degusta Europa” percorreu os mercados de abastos das cidades de Vigo, Tui, Baiona, Pontevedra, O Grove e Soutomaior.

 

Venres, 12 de maio de 2017   

O plan de cofinanciamento de servizos comunitarios básicos inclúe ayudas para a comarca do Baixo Miño

A Xunta de Goberno da Deputación de Pontevedra aprobará as primeiras achegas do Plan de Cofinanciamento dos Servizos Sociais Comunitarios Básicos deste 2017, que por primeira vez abranguerá á totalidade dos concellos da provincia de menos 20.000 habitantes, incluídos aqueles que non contaban con financiamento de persoal en base ao establecido no Decreto 99/2012 de 16 de marzo da Xunta de Galicia polo que se regulan os servizos sociais comunitarios, segundo explicou en rolda de prensa a presidenta da Deputación, Carmela Silva.

            Entre os concellos beneficiarios están os do Baixo Miño, que recibirán un total de 183.295,59 euros para financiamento de persoal e do SAF, que se repartirán entre A Guarda, 59.866,12 euros; O Rosal, 27.847,29 euros; Tomiño, 59.042 euros, e Tui, 36.540,18 euros.

 

O goberno de Carmela Silva aproba axudas para os concellos do Baixo Miño

O goberno de Carmela Silva aprobou destinar, na liña 1 do Plan Concellos, preto de tres millóns de euros para levar a cabo vinte proxectos e investimentos en trece concellos da provincia de Pontevedra. Entre eles  Tomiño e Tui.

Para este dous concellos do Baixo Miño, as achegas teñen un valor de 334.110,92 euros destinados a saneamento e mellora da pavimentación de núcleos rurais así como adquirir material informático.

Carmela Silva, informou que Tomiño beneficiarase dunha achega de 212.962,95 euros a través da cal se vai realizar o saneamento dos núcleos de Vilachán e Sanomedio. Con estes proxectos e os xa aprobados ata o momento, Tomiño, tal e como manifestou a presidenta da Deputación, ten xa o 38,53 por cento do orzamento correspondente ao Plan Concellos aprobado.

No caso de Tui as achegas ascenden a 121.147,97 euros, a través dos cales o concello porá en marcha a mellora da pavimentación que une os núcleos de As Chans (Randufe) con Circos (Pazos de Reis) así como o subministro de material e software informático para o concello. Silva informou, ao respecto, que ata o momento Tui ten aprobado o 37,68 por cento do orzamento correspondente ao Plan Concellos deste ano.

Dentro da Liña 2, que contempla ayudas para amortizacións, pagamento de débedas e gasto corrente así como gastos derivados da realización de actividades culturais,deportivas ou sociais os concellos beneficarios do Baixo Miño son A Guarda, Oia e Tui, que recibirán en conxunto 91.397,49 euros. A Deputación de Pontevedra achegará 65.045,63 euros a Oia para a limpeza dos edificios municipais e o consumo eléctrico. Pola súa banda, Tui beneficiarase de 20.351,86 euros para a intervención na ponte de Mosteiro de Pexegueiro, para o Entroido, a Cabalgata Internacional de Reis e o campamento de verán, e no caso da Guarda, recibirá 6.000 euros da Deputación de Pontevedra para investir na Feira do Libro e en actividades musicais nas prazas da vila.

 

Xoves, 11 de maio de 2017   

Preto de 3 millóns de euros para o territorio transfronteirizo do Miño

O territorio transfronteirizo do Miño beneficiarase dun investimento de preto de 3 millóns de euros grazas á concesión dos fondos europeos do programa Interreg VA-POCTEP anunciada onte. O deputado de Cooperación Transfronteiriza Uxío Benítez cualificou de “histórica” a aprobación dos proxectos presentados pola Deputación de Pontevedra e a CIM Alto Minho e subliñou que a contía dos fondos aprobados “é a máis alta destinada dende a UE a un proxecto común e global para a mellora e desenvolvemento da fronteira do Miño” dende a construción das diferentes pontes entre o Sur de Pontevedra e o Norte de Portugal.

Benítez destacou que os cartos que se investirán, dous millóns de euros dentro do programa ‘Visit Rio Minho’ e 942.022,47 euros do programa ‘Smart Minho’ (dos que a UE aporta o 75%) beneficiarán a todos e cada un dos concellos da raia (A Guarda, O Rosal, Tomiño, Tui, Salvaterra, As Neves, Arbo e Crecente, xunto coas câmaras portuguesas) e destinaranse ao deseño estratéxico do territorio, con intervencións inmateriais e culturais para poñelo en valor e fomentar o turismo. Así mesmo, relanzarase o plan de transportes transfronteirizo que leva tempo en proxecto. Todas as actuacións, segundo asegurou Benítez, serán xestionadas pola nova Agrupación Europea de Cooperación Transfronteiriza (AECT) Río Miño que está a piques de ser aprobada de xeito definitivo.

A concesión destes fondos europeos supón un grande paso adiante para o desenvolvemento do territorio do Miño. Hai que ter en conta que se trata da primeira vez que a Deputación de Pontevedra, a través da nova área de Cooperación Transfronteiriza creada polo novo goberno provincial da man do deputado Uxío Benítez, se implica - con éxito- ao solicitar fondos europeos nunha candidatura de estratexia común que propón un concepto global do Miño transfronteirizo. É preciso destacar que na Península Ibérica só foron admitidas 130 candidaturas escollidas entre centos de programas presentados relacionadas coas fronteiras e, en dúas delas, a Deputación de Pontevedra e o territorio do Miño son protagonistas.

Logo da confirmación da concesión dos fondos que chegou onte será preciso realizar a sinatura dos convenios co POCTEP, actualizar os proxectos adaptándoos ao territorio de xeito definitivo, e presentar as intervencións finais. A intención é desenvolver os primeiros estudos, proxectos e actuacións no que queda de ano.

O deputado de Cooperación Transfronteiriza Uxío Benítez, destacou que a Deputación ten como obxectivo seguir optando a máis fondos europeos en vindeiras convocatorias xa que existen máis iniciativas para o territorio do Miño.

Problemas de forma solucionados

A aprobación da candidatura e dos fondos para o proxecto ‘Visit Río Minho’ coñecida hoxe supuxo para a Deputación de Pontevedra a confirmación de que o traballo para desenvolver a fronteira do Miño tiña unha base sólida. Hai que lembrar que nas últimas semanas a Deputación e a Comunidade Intermunicipal (CIM) Alto Minho tiveran que plantexar un recurso, que finalmente foi admitido, logo de que se considerara que había un defecto de forma na presentación.

A proposta galego-portuguesa fora introducida na plataforma telemática da UE por un funcionario da CIM cuxa sinatura non estaba autorizada, o que supoñía que o documento nin sequera ía ser analizado no seu contido: simplemente quedaba fóra.

Unha vez salvado este primeiro contratempo, a candidatura de cooperación transfronteiriza dos concellos do Miño acaba de pasar o segundo filtro: o comité de valoración, logo de analizar as actuacións propostas para as que se solicitaba financiamento, resolveu de xeito positivo.

 

Martes, 9 de maio de 2017   

Queremos Galego convoca unha grande manifestación de unidade a favor da nosa lingua con autobuses desde o Baixo Miño

A plataforma cidadá Queremos Galego, composta por máis de 500 colectivos sociais de todo tipo, anuncia a convocatoria dunha multitudinaria manifestación para o 17 de maio baixo o lema “en galego sen límites”. A manifestación percorrerá as rúas de Santiago de Compostela saíndo ás 12h da Alameda.

Co lema “en galego sen límites” a plataforma cidadá pretende pór en evidencia os innumerábeis obstáculos para vivirmos en galego con normalidade, e a exclusión sistemática do idioma da maioría dos espazos.

Desde  Queremos Galego indicamos que as promesas incumpridas de posibilidade de uso pleno e normal da lingua propia, contidas no Estatuto e na Lei de normalización lingüística, xunto cos importantes retrocesos, son os que ademais provocaron unha reacción social a favor do galego cada vez máis ampla e máis estendida que se visualizará unida, máis unha vez, este 17 de maio. Esta reacción colectiva é a que permitirá reverter o proceso de substitución lingüística e que a garantía de futuro do galego está na forza e na dignidade do pobo galego. Esta forza e dignidade inmensa a de todas as galegas e galegos sen distinción é a que convocamos para este 17 de maio en Compostela. Entre todas e todos podemos mudar a situación e por iso será unha grande manifestación de unidade en torno ao noso idioma.

Fronte a esta resposta de dignidade colectiva,o governo actual non só non actúa senón que camiña na dirección contraria: sabedores da enorme contestación social e a reacción unánime en todos os ámbitos,  dentro e fóra das nosas fronteiras , que tivo e ten o decreto de plurilingüísmo, nunha nova mostra de desprezo ao seu cargo e de servilismo ao goberno central, aínda o manteñen a sabendas de que mesturado coa LOMCE nin tan sequera permite que o galego chegue aos límites máximos nos que reclúe o galego”. En vez de avanzarmos cara un ensino co galego como lingua vehicular, avanzamos cara ao afogamento no castelán omnipresente, como  se ve nos datos de exclusión do galego no ensino infantil.

Para Queremos Galego a situación no ensino é indicativa do que tamén acontece noutros moitos ámbitos como a administración, o económico ou o laboral. Os problemas na administración son crecentes grazas, en parte, á chamada Lei de transparencia que obriga a que administracións que como os concellos deran importantes pasos cara á normalización,  teñan que publicar  toda a documentación en castelán. Curiosamente moitos dos defensores no Estado de que só hai transparencia coa eliminación da lingua propia, están hoxe na cadea ou camiño dela.

Por iso lle pedimos ao señor Feixó que mostre por fin a dignidade que debería de ter o seu cargo e corresponda a dignidade coa que o pobo galego mantén viva a súa lingua malia ser todo en contra, mesmo un goberno como o da Xunta que prometeu cumprir a obriga de promover o uso do galego. Coa actitude contraria ao galego mostran estar tamén en contra da súa propia existencia como goberno

Por outra banda tamén estase a limitar cada vez máis o uso do galego no ámbito socieconómico mesmo favorecendo situacións de deslocalización e despedimentos como os que denuncian os traballadores dos centros de chamadas, que melloraría a súa situación só con que a opción de galego estivese sempre presente. Neste sector a única resposta que se está a ver en 36 anos de autonomía é a das propias organizacións sociais que impulsan iniciativas como a ILP para o recoñecemento dos dereitos lingüísticos no ámbito socieconómico.

Para poder asistir á manifestación, a Plataforma cidadá Queremos Galego disporá de autobuses por todo o País. Na Comarca do Baixo Miño os autobuses terán paradas na Guarda, O Rosal, Tomiño e Tui cunha tarifa de 5€ por persoa, mais, cómpre reservar praza antes do luns dia 15 de maio nos teléfonos: 616090632/986610465

 

Venres, 31 de marzo de 2017  

A nova Agrupación Galego Portuguesa de Cooperación Transfronteiriza para o Miño aprende da experiencia de Verín-Chaves para desenvolver proxectos europeos 

A Agrupación Europea de Cooperación Transfronteiriza (AECT) Rio Miño, formada pola Deputación de Pontevedra e a CIM Alto Minho para desenvolver proxectos no territorio da fronteira do Miño, xa está a traballar a pesares de non estar aínda aprobada formalmente, deste xeito, representantes de ambas administracións, xunto con alcaldes galegos e portugueses da raia, desprazáronse ata Verín para coñecer a experiencia da AECT Verín-Chaves.

Esta iniciativa, organizada polo deputado de Cooperación Transfronteiriza Uxío Benítez, tivo como obxectivo aproveitar o coñecemento da agrupación galego portuguesa da raia seca, que xa leva constituída varios anos e que ten levado adiante proxectos europeos. “Queriamos coñecer unha experiencia real, aproveitar as sinerxias e o coñecemento dunha AECT que xa funciona e aplicar ese ‘saber facer’. Nós estamos en proceso de constitución e podemos aprender moito dos problemas que salvar e de como debemos traballar”, subliñou o nacionalista.

O deputado Uxío Benítez explicou que a nova AECT Río Miño ten intención de ser unha entidade con personalidade xurídica para xestionar fondos europeos, promover e organizar accións de cooperación do territorio de forma directa, así como servir de foro estable sobre o río Miño, no que a día de hoxe están implicadas moitas administracións. “Moitos organismos interveñen e toman decisións sobre o noso territorio -Augas de Galiza, Comandancia de Marina, Costas-. Este novo organismo poderá coordinar, a través dunha estrutura con poder para actuar, aquelas actuacións de interese para o Miño. Queremos unir os dous lados administrativos desa fronteira artificial que nos separa e que en total abrangue 3.312 quilómetros cadrados de territorio e 375.995 habitantes”, subliñou.

A día de hoxe, a AECT Río Miño está á espera da súa aprobación oficial en Madrid, que deberá chegar nas vindeiras semanas logo de terse presentado a mediados de 2016.

Benítez indicou que “os fondos transfronteirizos da UE son os únicos que medraron nos últimos anos e é necesario aproveitar esa posibilidade para sacar adiante proxectos interesantes que precisan os concellos”. Nestes momentos, de feito, a Deputación de Pontevedra e a CIM Alto Minho (que reúnen 16 concellos pontevedreses -A Guarda, O Rosal, Oia, Tomiño, Tui, O Porriño, Salceda de Caselas, Salvaterra, Ponteareas, As Neves, Mondariz, Mondariz Balneario, Arbo, Crecente, A Cañiza e Covelo- e outros dez do Norte de Portugal) están tamén á espera da resolución das candidaturas presentadas ao programa Interreg para desenvolver turisticamente o territorio do Miño. A financiación europea para esas actuación podería alcanzar os cinco millóns de euros no caso de aprobarse na súa totalidade.

O traballo sobre cooperación transfronteiriza da Deputación non quedará no encontro levado a cabo coa AECT Verín Chaves. Uxío Benitez explicou que o vindeiro 21 de abril a institución provincial, xunto coa Universidade de Santiago de Compostela, celebrará as xornadas ‘A nova AECT Río Miño desde unha visión comparada: A raia e Europa’,  que se celebrarán en Tomiño coa participación de moitas mais AECT tanto estatais como europeas. O fin deste novo evento será “intercambiar moitas mais experiencias e facer alianzas para ter peso en Europa”.

O encontro cos membros da AECT Verín-Chaves realizouse na sede da agrupación, o antigo edificio da alfándega a cen metros da fronteira. Alí estiveron Uxío Benitez, deputado delegado de Cooperación Transfronteiriza; Sandra González, alcaldesa de Tomiño; Xosé Manuel  Rodríguez Méndez, alcalde de As Neves; Miguel Capón, concelleiro de  Tui; Manoel Batista, presidente da Câmara Municipal de Melgaço e presidente da Uniminho; Fernando Nogueira, presidente da Câmara Municipal de Vila Nova de Cerveira; Paulo Esteves, Vereador da Câmara Municipal de Monção; Tiago Cunha, vicepresidente Câmara municipal de Paredes de Coura; António Pereira Torres, secretario técnico conxunto de Uniminho; Marcós Areán, técnico de  Cooperación da Deputación, así como outros técnicos e aserores.

 

Venres, 24 de marzo de 2017  

Acto de Difusión do Programa LEADER 2014-2020 do Grupo de Desenvolvemento Rural GDR14

O Sala de Plenos do concello de Nigrán acolleu unha reunión dos máximos representantes das entidades locais do territorio xunto con membros da Deputación de Pontevedra para dar a coñecer a convocatoria de axudas do novo período do LEADER 2014-2020.

O alcalde de Nigrán, Juan A. González Pérez, como anfitrión, foi o encargado de iniciar o acto de difusión do novo Programa LEADER.  

Pola súa banda, a presidenta do Grupo de Desenvolvemento Rural GDR14 e alcaldesa de Tomiño, Sandra González Alvarez, resaltou as características desta nova etapa onde o grupo xestionará mais de 3 millóns de euros atá o 2020, importe que se podería ampliar con vistas ao ano 2023.

Nesta presentación o equipo técnico do grupo, salientou as peculiaridades e as diferentes liñas de actuación, facendo fincapé tanto nas actuacións de proxectos produtivos coma non produtivos.

Neste acto tamén se presentou a nova imaxe corporativa da asociación, tendo como relevancia o cambio da denominación social da entidade que foi aprobado a semana pasada pola súa Asemblea Xeral de socios, a cal pasará a denominarse a partir de agora Asociación de Desenvolvemento Rural Galicia Suroeste Eurural.

A difusión do novo Programa LEADER xa está en marcha por todo o territorio do GDR14 formado polos concellos de Baiona, Fornelos de Montes, Gondomar, A Guarda, Mos, Nigrán, Oia, Pazos de Borbén, O Porriño, Redondela, O Rosal, Tomiño, e Tui.

 

Venres, 10 de marzo de 2017  

O BNG chama a mobilizarse e apoiar a manifestación  do dia da clase obreira galega convocada pola CIG

Nos últimos anos, os efectos das reformas laborais dos diferentes gobernos do PSOE, e máis destacadamente do PP, afectaron enormemente ás nosas condicións de vida e de traballo.

A reforma laboral do ano 2012 do Partido Popular está causando estragos nos dereitos laborais conquistados en tantos anos de loita.A deterioración das condicións de traballo implica un incremento da pobreza. Así como en décadas anteriores a proporción de galeg@s que vivían baixo o limiar da pobreza se reducira, actualmente estas porcentaxes non fan máis que incrementarse.

Hoxe sabemos que o Estado español é o único caso no que a suma dos salarios da clase traballadora descendeu nestes 6 últimos anos preto dun 11%. Contrariamente, no resto da UE os salarios subiron por encima do 9% nos casos de Alemaña e Francia e do 4,45% en Portugal. Os salarios que perdemos, que “nos roubaron” en tan pouco tempo, pasaron a mans dos ricos (o capital), que incrementaron a súa riqueza neste mesmo período en máis do 18%.

Así pois desde o Bloque Nacionalista Galego facemos un chamamento a toda a veciñanza a que acudan con nós a manifestación do dia da clase obreira, este venres 10 de marzo ás 20:00 en Vigo para rachar coas reformas e recuperar os nosos dereitos laborais. Desde a CIG poñen a disposición un autobús de balde con paradas na Guarda, O Rosal, Tomiño e Tui para o que é preciso reservar praza no: 986610465/616090632.

 

O acoso é desigualdade, é violencia: erradiquémolo!

Hai xa máis de cen anos que o movemento feminsita estendeu o 8 de marzo como  unha data internacional e referencial na loita pola igualdade de dereitos das mulleres.Celebramos e reivindicamos a loita incansábel de moitas mulleres e colectivos de mulleres de todo o mundo que ten constribuído a conquistar dereitos colectivos e traballamos para que todos os dias sexan 8 de marzo.

Contamos con numerosos indicativos que amosan como a igualdade é un obxectivo aínda lonxe de conquistar en moitos campos, tamén no laboral. Organismos e observatorios tanto internacionais como galegos teñen alertado da enorme desigualdade que aínda sufrimos as mulleres no mundo. Por exemplo, o informe 2016 do Foro Económico Mundial indica que a igualdade podería tardar até 170 anos e os datos referentes ao mercado laboral de 2015 amosan como as galegas ingresamos o 77,8% do que os homes.

Fica moito por facer nun contexto no que as consecuencias da crise económica e o empeoramento das condicións laborais a partir das reformas laboaris de PP e PSOE teñen contribuído tamén a profundar na desigualdade. Somos as mulleres quen ocupamos as peores porcentaxes de traballo precario, temporal, parcial e bolsas de traballo fóra da lei nun marco onde a lexislación e a inspección son aínda insuficientes. Esta desigualdade esténdese tamén ao ámbito do trabllo non remunerado xa que as políticas austericidias do Partido Popular teñen recortado servizos de apoio a coidados, conciliación, dependencia, etc supoñendo unha sobrecarga para moitas mulleres que acaban de suplir esas carencias.

Aínda que cada 8 de marzo cómpre insistir en combater todas as desigualdades en materia económica e outras como a dificultade para acceder a postos de responsabilidade en igualdade de condicións, é necesario facer ver que hai outras consecuencias do patriarcado que tamén se dan nos nosos traballos. Cómpre ampliar o foco e denunciar que as situacións de acoso sexual e moral que sofren moitas mulleres no seu traballo tamén son desigualdade e tamén son violencia. O machismo no ámbito laboral tamén abrangue actitudes e comportamentos que atentan contra a dignidade e que se alimentan dun sistema patriarcal que compre denunciar e desmontar. Para isto, é hora de pisar o acelereador para erradicar todas  as desigualdades e vilencias. Desde o Bloque Nacionalista Galego chamamos a denunicar con forza que as galegas e galegos non nos vale esta situación, esiximos unha Galiza en igualdade e feminista.

 

Xoves, 2 de marzo de 2017  

O BNG pide á Xunta control do xabarín e axudas para paliar os danos na comarca do Baixo Miño

A deputada do BNG por Pontevedra, Montse Prado, leva ao Parlamento as demandas da veciñanza do Baixo Miño, en particular no Concello da Guarda, en relación á poboación de xabaril que experimentou un importante incremento nos último anos  sen que exista un control por parte da Administración. Ese incremento, unido a falta de control, tradúcese en colleitas esnaquizadas, instalacións inutilizadas e mesmo accidentes de tráfico.

 “A invasión deste animal é tal que a miúdo poden ser vistos en zonas urbanas remexendo no lixo, cruzándose no camiño con persoas e incluso entrando en propiedades”, explica Prado, quen advirte que a actuación descontrolada do xabarín unida a “pasividade das institucións” está a provocar a abandono de terras que ata foi pouco cultivadas.

Ante esta situación, o BNG traslada o asunto para o seu debate no Parlamento a través dunha batería de iniciativas nas que demanda ao Goberno da Xunta medidas de control da poboación de xabaríns e axudas ás persoas que tivesen soportado algún tipo de dano causado por estes animais.

En concreto, o Bloque demanda un estudo sobre a situación da especie na comarca do Baixo Miño, un reconto tamén dos danos causados en cultivos, incursións urbanas e accidentes de tráfico, “de tal xeito que serva de base para elaborar un plan de actuación da Xunta”. En segundo lugar, axilidade no control dos danos e a adopción de medidas preventivas e, por último, establecer unha orde de axudas para compensar os danos producidos polo animal con suficiente dotación orzamentaria para dar resposta á gravidade do problema.

 “O que non é de recibo é a pasividade da Administración ante esta situación que leva anos sendo motivo de denuncia por parte dos e das veciñas”, concluíu Prado, de aí as propostas que o Bloque presenta no Parlamento para o seu posterior debate.

 

Venres, 24  de febreiro de 2017  

A candidatura dos concellos transfronteirizos do Miño volve ter opcións para conseguir fondos europeos

A candidatura de cooperación transfronteiriza ‘Visit Río Minho’ presentada pola Deputación de Pontevedra e a Comunidade Intermunicipal (CIM) Alto Minho será finalmente admitida e valorada na primeira convocatoria para obter fondos europeos do programa INTERREG V A –POCTEP. Así llo comunicou verbalmente o director xeral de Fondos Comunitarios Jorge García ao deputado provincial de Cooperación Transfronteiriza Uxío Benítez. Isto supón que os concellos galego-portugueses da ‘raia’ volverán ter opcións para acadar os 5,6 millóns de euros solicitados á UE para desenvolver actuacións conxuntas que poñan en valor o territorio do Miño.

Segundo puido saber o deputado no encontro mantido en Madrid, os servizos xurídicos do Ministerio de Facenda teñen intención de resolver de forma positiva as alegacións presentadas logo de que a candidatura ‘Visit Río Miño’ non fora admitida inicialmente por un defecto de forma na súa presentación. Hai que lembrar que a proposta galego-portuguesa fora introducida na plataforma telemática da UE por un funcionario cuxa sinatura non estaba autorizada, o que supoñía que o documento nin sequera ía ser analizado no seu contido: simplemente quedaba fóra.

Nas alegacións presentadas pola CIM e a Deputación solicitouse que o defecto de forma non se tivese en conta, xa que na documentación presentada quedaba claro que todas as administracións implicadas respaldaban a candidatura. Así mesmo, subliñábase que o beneficiario da proposta era o territorio con maior poboación de toda a fronteira galego-portuguesa. Finalmente, dende o Ministerio sinalan que nos próximos días solicitarán ás partes implicadas documentación aclaratoria e comunicarán formalmente a decisión definitiva de aceptar as alegacións.

Unha vez salvado este primeiro contratempo, a candidatura de cooperación transfronteiriza dos concellos do Miño terá que pasar un segundo filtro: o comité de valoración debe analizar as actuacións propostas para as que se solicita financiamento (o 75% dos 7,5 millóns de euros de investimento total). A resolución chegará no mes de marzo, cando se saberá se a ‘raia’ do Miño terá cartos europeos e a cantidade definitiva que recibe, xa que pode suceder que só sexan aceptadas parte das iniciativas ou subvencionadas nunha porcentaxe diferente da prevista.

Que supón a candidatura?

A candidatura ‘Visit Rio Minho’ pretende desenvolver actuacións para preservar e poñer en valor o río Miño transfronteirizo mediante un orzamento total de 7.465.603,74 euros. O obxectivo principal é capitalizar a marca ‘Rio Minho’ a través dun conxunto de actividades que potencien os recursos endóxenos da zona como un destino ecoturístico de referencia estatal e internacional.

Estas actuacións, entre outras, concrétanse na elaboración da candidatura do estuario do Miño como paisaxe cultural da Unesco, a promoción e organización de eventos experienciais de deporte, a asistencia a feiras de turismo, inversións para a mellora da preservación do patrimonio natural do río, o desenvolvemento de centos de interpretación dos recursos naturais, a valorización dos produtos da pesca mediante a súa trazabilidade ou actuacións de vertebración do espazo común cunha rede de itinerarios transfronteirizos.

Os concellos beneficiarios destas actuacións serán A Guarda, O Rosal, Tomiño, Tui, Salvaterra, As Neves, Arbo e Crecente pola parte pontevedresa, e Caminha, Vila Nova de Cerveira, Paredes de Coura, Valença, Monçao e Melgaço, pola parte portuguesa.